Calso
De Biquipedia
Lo calso u osido de calzio (CaO) ye un compuesto quimico que se saca de la piedra calsinera sozmesa a cozión.
La piedra calsinera gosan cozer-la en fornos (calsinars) á una tempreratura de 1.000°C - 1.200°C, que trasforma lo carbonato calzico (CaCO3) en osido calzico (CaO) (calso bibo). En combinar-lo con augua, s'idrata (u siga, se trasforma en idrosido calzico (Ca(OH)2) e desprene calor. Lo calso idratato (calso esmortexito u calso aerio) espuesto á l'aire se carbonata, u siga, se combina con lo diosido de carbonio (CO2) de l'aire pa tornar á formar carbonato calzico.
Ye de color blanca, de poca dureza, lichera e si toca la pelleta la malmete. Ye un aglomerant que se fa serbir muito como base de mezclas, pa fer blancas las cosas e como aglutinant de pigmentos e pinturas.
Lo calso, seguntes lo tratamiento á lo que se sozmete puet estar:
- Bibo: calso no idratato.
- Esmortexito: calso idratato con augua dica perder la caustizidat.
- Bullito: s'obtien de lo calso esmortexito, en forma de pasta, obtenita mezclando calso bibo e augua e fendo-bullir la mezcla.
Lo material obtenito cozendo piedra calsinera con una porzión d'archila u dreitament salagón se clama calso idraulico e tien la propiedat de fer-se més duro dentro de l'augua, porque bi ha una reazión quimica entre lo idrosido calzico, los silicatos (prozedents de l'archila) e l'augua, e doncas no cal que i aiga esposizión á lo diosido de carbonio de l'aire.
[editar] Denominazions tradizionals
Calso ye lo termin cheneral en luenga aragonesa e por la s parix influenziato por l'oczitán caus u catalán calç, que bienen de lo latín CALCE(M) acusatibo de CALX, CALCIS. En aragonés bi ha atra parabra relazionata: calzina, documentata ya en 1287 en Zaragoza e que probién d'una bariant ultracorreuta d'ixa parabra latina, CALIX, CALICIS, con sufixo -ina, e que en aragonés zentro-oriental se pronunzia con s, calsina, por probable influyenzia de calso.
En bellas zonas de lo Sobrarbe como A Buerda, Piarruego, Rebiella, Bal de Bielsa, e Bal de Bio, calsina ye lo calso esmortexito mezclato con arena (encara que Rudolf Wilmes en 1937 lo replegó como calzina por lo que fa á esta zaguera bal).
Sin d'embargo lo sennificato de calsina que s'ha trobato estudeyando l'aragónes de Peña Montañesa e Biello Sobrarbe ye la cal que se queda dentro de lo forno de calso u calsinar.
En belsetán, chistabín e atras bariants güegals menos conoxitas la tierra que tien muito carbonato calzico se clama tierra de calso.
En aragonés d'o Biello Sobrarbe e Peña Montañesa s'emplega l'adchetibo calsinoso pa dizir que una cosa tien muito calso.
