Penya Montanyesa

De Biquipedia
Ir ta: navego, busca
Penya Montanyesa
211.O Pueyo d'Araguás - Peña Montañesa.JPG
A Penya Montanyesa dende O Pueyo d'Araguás.
Situación
Situación Flag of Aragon.svg Sierra Ferrera, Pireneu de
Uesca, Aragón
Latitut 42º 31' 14" Norte
Lonchitut 0º 13' 55" Este
Cheografía
Cordelera Pireneus
Altaria 2291 m
Alpinismo
Primera puyada
Rota mas fácil Por «A Canal d'Os Molinos», por o camín que naixe en a pista que comunica Oncins y Sant Veturián.
Mapa
Perineu Aragonés (orografía).png
Montanya.svg

Penya Montanyesa ye a denominación popular que recibe en a comarca aragonesa d'o Sobrarbe l'estremo occidental d'a sierra Ferrera que se prolarga dica la val d'o río Cinca. Ha gosau estar sinyalada como uno d'os emblemas d'o Sobrarbe.[1]

A denominación gosa fer referencia a la estructura de a dita sierra, formada en a suya mayor parte por una gran formación sedimentaria de calsina, prefundament socavada por karsts, que exposa una paret de penya de qualques cientos de metros d'altaria, envistable dende muitos puestos en a comarca y os arredols por a suya elevada prominencia.

Anque l'estremo occidental d'a penya por o costau que mira t'a val d'a Cinca ye claro, no i hai garra consenso popular ta sinyalar en qué puesto remata por l'este el que puede decir-se propiamient Penya Montanyesa y escomienza el que no sería ya si que simplament sierra Ferrera. Manimenos, en bells lugars de la man sud se i emplega o nombre «Penya Montanyesa» ta referir-se a tot el que queda dende o collau d'o Ueso Santo ta ponient; ixo ye dende a cabecera d'o río d'A Nata, en l'antigo municipio d'o Toledo d'A Nata (en A Fueva), dica lo cabo que sinyorea la val d'a Cinca por alto de La Espunya, y se reserva la denominación «sierra Ferrera» bien ta nombrar toda la sierra u bien ta referir-se a la part que queda dende o collau dica la punta Ferrera (en termin municipal d'A Foradada) que ye a zaguer altura y a on remata a sierra, ya a dintro d'a vecina comarca d'a Ribagorza.

Alturas[editar | editar código]

Toponimia principal en a Penya Montanyesa.

L'altura mayor que se puede contar en a Penya ye o Picón d'o Libro, con 2.291 metros, que tamién pasa por estar a punta mas altera de toda la sierra. Recibe iste nombre popular como conseqüencia d'a colocación d'una caixa metalica en a que se i guarda un libro a on que os vesitants i pueden firmar. A segunda punta ye a dita Penya Madrid, con 2.267 metros.

O cuitiello d'a sierra comunica ixas dos puntas con A Tuca y a Penya Foratata (curioso toponimo que ha fosilizau una forma muit sonora d'o participio de «foradar», desusada fa muitos anyos en a redolada) en una zona en a que a lumera d'a sierra se prolarga, con altitut quasi constant, y que recibe o nombre de «Sarrato Batalla», fendo referencia a una guerra mitica que diz que remató en iste punto.[2]

Dende a Foratata dica o collau d'o Ueso Santo, o cuitiello d'a sierra guarda una altitut d'entre 1900 y 2100 metros. En a part que se conoixe como «A Estiva» i destacan dos puntas, que son A Forquiella a primera, con 2.172 metros, y a punta d'A Estiva, de 2.165 metros.

Rotas ta puyar-ie[editar | editar código]

Ta puyar t'a Penya i hai bellas rotas posibles. As principals sirven ta puyar ta'l Picón d'o Libro, por estar l'altura mayor y que mas cosa en ha dau siempre a os aficionaus.

A rota mas freqüentada ye a que puya por a «Canal d'Os Molinos», que va dende l'antigo termin municipal d'os Molinos, chusto dende a ermita d'o Pilar d'Oncins, a qualques cientos de metros d'o Reyal Monesterio de Sant Veturián en a part d'a Fueva alta que se conoix como «Baixo Penyas». Ista rota puya en sentido obliquo con o esquinazo d'a sierra, el que fa mas fácil l'ascensión pus se gosa salvar o desnivel en mas kilometros, anque a presencia de bell par de tarteras en o camín (a que se diz «o cantal de a Nariz» y a que en dicen «As Gotelletas») fa que s'haiga de plantiar a puyada como un exercicio que precisa tener bella pericia.

Unaltra rota, ista la más feriosa, ye a que se desvía en a mesma Canal d'os Molinos ta dir-se-ne a pillar a «Faixa' Toro», un estreto corredor que esnaviesa a meya altura por os cinglos a l'altaria de Torrolisa dica pillar unaltra vez terreno firme en a Canal "ancha" u «Canal Mayor». Ista rota reviste muito periglo, pus se resigue o cillo en a más parte d'a suya lonchitut, por un corredor natural que tansament si be de tener tres u quatro metros d'amplo en os puestos a on que más amplo i ye, con a paret de penya por un costau y o cillo totalment vertical en debaixo por l'altro. Una vegada s'adube a la Canal Mayor por a dita faixa tant garrotera, s'accede a lo Picón por o Cuello de Sens en ascensión por a tartera.

A tercer rota, y puede estar que a millor paisachisticament parlando, ye a que puya por a «Collada de Ceresa», dende iste portichón que comunica o solano de Ceresa (en o municipio d'a Espunya, en a val d'a Cinca) con «A Valle» d'A Espunya. Por ista rota, se puya ta'l Picón d'o Libro por o canto d'ubago, y s'asciende buens ratos con un desnivel muit acusau, por tarteras de buena cosa d'escamallo, lo que fa consellar muita prudencia quan se fa con oraches u periglo que se'n i chire, y sobre tot quan i hai bella acumulación de nieu.

Imáchens[editar | editar código]

Vinclos externos[editar | editar código]

Referencias[editar | editar código]

  1. (es) «Peña Montañesa» en o portal CaiAragon.com; consultau o 25 d'aviento de 2010
  2. (es) PALLARUELO CAMPO, Severino: José. Un hombre de los pirineos. 2ª ed. PRAMES. Zaragoza, 2006. ISBN 84-8321-077-0.