Aragonés d'as Comarcas Churras

Aragonés d'as Comarcas Churras
Variedat de l'aragonés
Localización cheografica
Territorios	Alto Millars, Alto Palancia, Rincón d'Ademuz, Los Serrans, Fueya de Bunyol
Sociolochía
Vitalidat	Desapareixito
Literatura
Rasgos dialectals	pareixito a l'aragonés d'as comunidatz aragonesas pero con catalanismos

L'aragonés d'as Comarcas Churras (Alto Millars, Alto Palancia, Rincón d'Ademuz, Los Serrans, Fueya de Bunyol y Canal de Navarrés), yera pareixito a l'aragonés d'as comunidatz aragonesas y se castellanizó quedando-ne restos que caracterizan l'actual castellán churro, con un adstrato valencián que se suma a los aragonesismos d'o substrato aragonés.

A presencia de l'aragonés en as comarcas churras se debe a repoblacions feitas con aragoneses y navarros en estas comarcas interiors en a Edat Meya. A muga entre l'aragonés y o catalán se puet explicar en a Sierra d'Espadán por as mugas d'a Diocesi d'Albarrazín-Segorb, y en Penyagolosa por a muga entre a Comunidat de Teruel y o Reino de Valencia. As repoblacions con aragoneses u con valencians aragonesoparlants continoron en o sieglo XVII dimpués de ser forachitatos os moriscos.

Los textos meyevals en romance aragonés, dirichitos a chent aragonesoparlant son una prueba que se charraba aragonés, pero a a vegatas s'escribiban en a ciudat de Valencia por escribans que no yeran necesariament aragonesoparlants y tamién escribiban textos adrezatos a los castellans d'a Corona de Castiella. Estos textos combinan parabras de l'aragonés oriental comuns con lo catalán (bestiar), pero a sobent no presentan atra clase de lexico u fonetica aragonesa y coinciden con lo modelo castellán.

Una muestra de texto adrezato a la población aragonesoparlant d'as comarcas churras ye las ordinacions d'o Tribunal d'o ligallo de pastors de Segorb de 1312:

Primerament, queremos e atorgamos que en el comienço d'aquel legaxo sean esleýdos dos homines buenos, jurados, los quales juren fer e tener e mantener el dito legaxo dentro un anyo primero venidero e contínuament complido, dentro el qual anyo que dos vegades faga fer [legaxo] en aquel tiempo que los conozerá que sea más provechoso, e que todos los pastores del término de Sogorbe sean tenidos de venir al dito legaxo; e los jurados deven leer los hordenamientos de juso escriptos, en presencia de todos los senyores de las cabanyas ho de los bestiares, e nombrar cada uno por su nombre.

Y tamién un texto de Segorb de 1429:

Et por aquesto en los ditos nombres de la vna part. Et yo, María, muller quondam del dito defuncto, vecina del lugar de Viver, de la otra part. Scientment e de scierta sciencia la vna part de nos con la otra venjmos en diujsión, comjssión, partición, e amigable composición en e de todos los bienes, derechos e acciones assí sitios como mobles o por sí mouientes que en tiempo passado fueron e an stado comunes e jndiujsos entre el dito defuncto, padre de la dita Toda e mj, dita María, de la otra part por razón de la hermandat e jermanía entre mj, dita María, et el dito mj marido defuncto en el tiempo de nuestas nupcias ffeita la mjttat de los quales ditos bienes pertenesce e pertenescer debe e puede por derecho de herencia et succesión a los ditos Bartolomé Domjngo et Toda, legítimos succesores del dito defuncto (ROSA GÓMEZ CASAÑ, aproximación. doc.6 2 d'agosto de 1429

Lexico

Actualment bi ha parolas propias d'o castellán d'as comarcas churras (que pueden estar comuns con lo catalán valencián), y que plegan a l'este d'a comarca teruelana de Gúdar-Chabalambre; ye lo caso de dacsa ("panizo"). No podemos saber si yeran usuals quan se i charraba aragonés, pero en lo caso de azagador ("cabanyera") sí, porque se troba en los textos romances d'a Comunidat de Teruel.

Bibliografía

• Jose María Enguita Utrilla: Manifestaciones romances en los territorios medirionales del Aragón medieval. Aragón en la Edad Media XX (2008).

Vinclos externos

• Ordinacions d'o ligallo de Segorb en 1312.

Se veiga tamién

• Aragonés d'as comunidatz aragonesas
• Churro