Wolfram von Richthofen

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Wolfram von Richthofen
10 d'octubre de 1895 - 12 de chulio de 1945
O mariscal de campo Wolfram von Richthofen (áa dreita d'a imachen) con o Generalleutnant Adolf Galland (a ezquierda), en 1942
O mariscal de campo Wolfram von Richthofen (a dreita d'a imachen) con o Generalleutnant Adolf Galland (a ezquierda), en 1942.
Información personal
Embotada
Puesto de naixencia Striegau (Imperio Alemán)
Puesto de muerte Bad Ischl (Tercer Reich)
Información militar
Leyaltat Imperio Alemán
Republica de Weimar
Tercer Reich
Anyos de servicio 1913-1918
1933-1944
Rango Generalfeldmarschall
Mandos Lechión Condor
Fliegerkorps VIII
Luftflotte 2
Luftflotte 4
Unidat Jagdstaffel 11
Batallas/guerras Primera Guerra Mundial
Guerra Civil Espanyola
Bombardeyo de Guernica
Segunda Guerra Mundial
Campañnya de Polonia
Batalla de Francia
Batalla d'Anglaterra
Batalla de Grecia
Batalla de Creta
Operación Barbarroya
Batalla de Stalingrado
Premios Cruz de Caballero d'a Cruz de Fierro con Fuellas de Caixico
Atras funcions

Wolfram Freiherr von Richthofen, naixito de Striegau (Silesia, Imperio Alemán, hue Strzegom en Polonia) o 10 d'octubre de 1895 y muerto en Bad Ischl (Tercer Reich, hue Austria) o 12 de chulio de 1945 cuan yera prisionero de guerra, estió un piloto militar alemán d'a Luftwaffe d'o Tercer Reich en a Guerra Civil Espanyola y en a Segunda Guerra Mundial, que plegó en 1943 a o ran de mariscal de campo (Generalfeldmarschall).

Estió o responsable d'o bombardeyo de Guernica o 26 d'abril de 1937, sobre o cual o pintor Pablo Picasso pintó o suyo celebre cuadro Guernica, y amás i prenió parte, en dito bombardeyo.

Tamién ye conoixito por estar familia (primo) de Manfred von Richthofen (O Barón Royo), un famoso piloto de caza d'a Primera Guerra Mundial, prenendo parte en ixa guerra dende marzo de 1918 en o Jagdstaffel 11 que manaba o suyo familiar. Tamién yera primo de Lothar von Richthofen, chirmán de Manfred.

Oríchens y primeras anyadas[editar | modificar o codigo]

O futuro mariscal de campo alemán naixió de Striegau (Baixa Silesia, Silesia, Imperio Alemán, hue Strzegom en Polonia) o 10 d'octubre de 1895 en a familia Richthofen, d'a nobleza d'Alemanya. Wolfram yera sobrín y fillo adoptivo d'o cheneral de Caballería Manfred von Richthofen, con o mesmo nombre que o suyo primo, o celebre Manfred von Richthofen, que estió piloto de l'aviación alemana en a Primera Guerra Mundial, tamién conoixito como O Barón Royo. O choven Wolfram continó os pasos de su pai adoptivo, dentrando en 1913, con 18 anyadas, como aspirant en o 4eno Rechimiento de Husars de l'Exercito alemán, l'anyo anterior a la Primera Guerra Mundial. En 1914, luego de seguir estudios en una Academia d'Estato Mayor en Kassel, plegó a o ran de subtenient.

Primera Guerra Mundial[editar | modificar o codigo]

Dende o inicio d'a Primera Guerra Mundial y dica 1917, Wolfram von Richthofen continó prestando os suyos servicios en o mesmo 4eno Rechimiento de Husars, dica plegar a o ran de comandant d'un escuadrón de Caballería.

Sindembargo, en ixa anyada de 1917 fue transferito a una escuela de pilotos d'aviación en a ciudat de Halle, y en marzo de 1918 fue destinato a una fomación d'aviación de caza, o Jagdstaffel 11, que manaba o suyo primo Manfred von Richthofen, O Barón Royo, por a color roya d'o suyo avión. Mientres o suyo servicio y dica rematar a guerra en noviembre de 1918, von Richthofen logró 8 victorias (u derribos d'avions enemigos) y recibió a Cruz de Fierro de 2ª y de 1ª clases.

Periodo d'entreguerras[editar | modificar o codigo]

En 1920 Wolfram von Richthofen albandonó o servicio activo en l'Exercito alemán, con o ran d'Oberleutnant (tenient), fendo estudios de Mecanica en a Escuela Tecnica Superior de Hannover, dica rematar-los con o suyo títol d'incheniero en 1923. En noviembre d'ixa mesma anyada, von Richthofen tornó a l'Exercito, a la Reichswehr, o disminuito Exercito alemán que li permeteba a la Republica de Weimar o Tratato de Versailles. Recibió o ran de subtinent en un Rechimiento de Caballería, l'11º Rechimiento de Caballería con seu en Ohlau. Sindembargo, a escape partecipó en a creyación secreta d'a Luftwaffe, l'aviación militar, que no yera permesa seguntes as clausulas d'o Tractau de Versailles.

Antiparte, o 18 de setiembre de 1920 heba casato con Jutta von Selchow en Breslau (hue Wroclaw, Polonia).

Dende 1925, teneba o ran de tenient, y l'1 de noviembre de 1928 se convertió en comandant en cabo d'una companyía de transporte, a 5ª Companyía de Transporte. L'1 de febrero de 1929 puyó a o ran de Hauptmann (capitán). Paralelament, estudiaba en a Escuela Tecnica Superior de Berlín ta obtener o suyo doctorato.

En abril de 1929, von Richthofen fue destinato por un periodo de dos anyadas y meya a la embaixada d'Alemanya en Italia, en cualidat d'agregato militar, ta i estudiar (encara que oficiosament) a evolución d'a Regia Aeronautica italiana. Luego de tornar enta Alemanya, fue destinato tamién a mandar una companyía de transporte, dica l'1 d'octubre de 1933, cuan dentró en a nueva Luftwaffe establita por o Tercer Reich d'Adolf Hitler.

En os inicios d'a suya carrera militar en l'Aviación, von Richthofen fue destinato a o Ministerio de l'Aire como comandant en cabo d'o departamento d'investigación d'o Ministerio. A escape puyó a o ran de Major (comandant) en 1934, y en 1936, plegó a o ran d'Oberstleutenant (tenient coronel).

Guerra Civil Espanyola[editar | modificar o codigo]

A ciudat basca de Gernika-Lumo luego d'o bombardeyo de Guernica o 26 d'abril de 1937 por a Lechión Condor de von Richtofen mientres a Guerra Civil espanyola.

O 18 de chulio de 1936 heba prencipiato en Espanya a Guerra Civil Espanyola, dimpués d'una sublevación militar contra o Gubierno d'a Segunda Republica Espanyola, y o Tercer Reich (como a Italia de Benito Mussolini) aduyaba a los sublevatos de Francisco Franco con armas, material de guerra y soldatos, incluyindo-ie os avions d'a Lechión Condor ninviatos por a Luftwaffe. Wolfram von Richthofen bi prenió parte en a guerra dende 1936, partecipando en o bombardeyo de Guernica o 26 d'abril de 1937, una prebatina d'os bombardeyos aerios masivos sobre a población civil que luego se facioron mientres a Segunda Guerra Mundial, y que fació que o pintor Pablo Picasso pintase o suyo celebre cuadro Guernica. En palabras de Patrick Bishop:[1]

...estió responsable d'as atrocidaz comesas en Guernica.

En a suya presencia en a Guerra Civil Espanyola, Wolfram von Richthofen ganó experiencia de combate ta aplicar-la en a Segunda Guerra Mundial, que yera uno d'os obchectivos que os nazis miraban de fer con a suya aduya a os franquistas sublevatos. Ocupó o cargo de chefe d'Estato Mayor d'Hugo Sperrle.

En octubre de 1937 von Richthofen tornó a Alemanya, y en chinero de 1938 puyó a o ran de coronel, manando dende o 1 d'abril a 257ª Escuadrilla de bombarders en Lüneburg, y l'1 de noviembre fue nombrato Generalmajor (cheneral de Brigada aeria), tornando a Espanya ta manar a Lechión Condor dica mayo de 1939, luego de rematar a guerra con a victoria franquista.

Segunda Guerra Mundial[editar | modificar o codigo]

O 17 de febrero de 1943, con importants mesuras de seguredat, Hitler vesita o Cuartel Cheneral d'o Grupo d'Exercitos Sud en Ucraína. En a imachen, Erich von Manstein recibe a Hitler en un chicot aeropuerto militar, en presencia de Hans Baur y d'o Generalfeldmarschall d'a Luftwaffe Wolfram von Richthofen.

Invasión de Polonia[editar | modificar o codigo]

En prencipiar a Segunda Guerra Mundial en setiembre de 1939 con a invasión de Polonia (campanya de Polonia), a Manfred von Richtofen, con as suyas unidaz aerias, se li mandó prestar o suyo soporte aerio a o 10º Exercito alemán. L'aviación mandata por von Richtofen destruyó cuasi tota l'aviación de Polonia en os primers días de combates, fendo-se asinas a propietaria d'os cielos de Polonia y prencipiando luego una estreita colaboración con as tropas de tierra d'a Wehrmacht en una aplicación cuasi de libro d'os prencipios d'a blitzkrieg u guerra lampago, en a cual os avions de bombardeyo colaboraban con a unidaz de tanques en destruir as linias esfensivas polacas penetrando dimpués en a suya retraguarda, ta luego dixar a l'infantería la labor de fer presoners a los repuis d'as tropas de l'Exercito polaco.

En a campanya, o suyo Fliegerkorps VIII estió o responsable d'os bombardeyos aerios sobre a ciudat de Varsovia, en a mesma actuación que ya heba feito con a Lechión Condor sobre a ciudat basca de Gernica en a Guerra Civil espanyola.

Batalla de Francia[editar | modificar o codigo]

Cuan prencipió en mayo de 1940 a campanya alemana en o Frent Occidental con a invasión d'os Países Baixos, Belchica, Luxemburgo y Francia, en a clamata batalla de Francia, Wolfram von Richtofen mandaba o Fliegerkorps VIII, un cuerpo aerio. A suya misión yera aduyar a o 6º Exercito de Walther von Reichenau en a campanya de Belchica, y a o Panzergruppe von Kleist de Paul von Kleist en a campanya de Francia con os suyos avions de bombardeyo Junkers Ju-87.

Por l'actuación d'as suyas tropas en ixa campanya, von Richtofen recibió a Cruz de Caballero d'a Cruz de Fierro o 10 de mayo de 1940, y o 19 de chulio fue nombrato General der Flieger, en saltando dos graus en l'escalafón.

Batalla d'Anglaterra[editar | modificar o codigo]

Tamién partecipó con o Fliegerkorps VIII en a batalla d'Anglaterra, a on la Luftwaffe d'o Tercer Reich fue redotada por a Royal Air Force britanica.

Operación Marita[editar | modificar o codigo]

Tamién partecipó en a batalla de Grecia (Operación Marita), a campanya en os Balcans contra Yugoslavia y Grecia, y mandaba as tropas en a batalla de Creta, a invasión d'a isla de Creta en 1941.

Operación Barbarroya[editar | modificar o codigo]

O 22 de chunio de 1941, mientres a Operación Barbarroya (a invasión d'a Unión Sovietica), a lo cuerpo aerio de Wolfram von Richtofen se li mandó aduyar a o 3º Panzergruppe, que manaba o General der Infanterie Hermann Hoth. A suya misión yera plegar dica la ciudat de Moscú, a capital d'a Unión Sovietica, y conquerir-la, encara que a Wehrmacht fue redotada en as mesmas puertas d'a ciudat, en a batalla de Moscú, en prencipiar o frío hibierno ruso. En a retirata d'os alemans, as unidaz aerias de von Richtofen prestoron a suya aduya a las unidaz terrestres alemanas.

Batalla de Sebastopol[editar | modificar o codigo]

L'1 de febrero de 1942, fue ascendito a o ran de Generaloberst (egualando asinas en o rango a Hans Jeschonnek y Ernst Udet), mandando a Luftflotte 4 en a conquiesta de Crimea, aduyando a las tropas d'Erich von Manstein en a batalla de Sebastopol dende o 7 de chunio de 1942 dica a cayita de Sebastopol y de tota Crimea.

Batalla de Stalingrado[editar | modificar o codigo]

Dimpués d'as luitas en Crimea, a la Luftflotte 4 se li mandó aduyar a o Grupo d'Exercitos Sud en o suyo abance a l'este, enta o río Volga en Stalingrado, y a lo sud, enta o Caucas. Cuan as tropas d'o 6º Exercito alemán de Friedrich Paulus yeran luitando en a ciudat en a batalla de Salingrado, l'Exercito Royo prencipió una contraofensiva, que cercló a las tropas de Paulus. Hermann Göring deciba que con nomás a Luftwaffe permetría proveyer a las tropas cerclatas, y mandó a von Richthofen que os suyos avions s'encargasen d'ixa labor. Sindembargo, as duras condicions climatolochicas y a escasa capacidat de transporte aerio d'os alemans facioron que von Paulus se rindiese o 2 de febrero de 1943, en un rendición que se considera uno d'os momentos clau d'a guerra. En as operacions aerias, a Luftflotte 4 perdió 500 avions y 1.000 pilotos, alto u baixo.

O 16 de febrero de 1943, Wolfram von Richtofen se convertió en Generalfeldmarschall (u mariscal de campo) d'o Tercer Reich, cuan nomás teneba 47 anyadas, estando asinas o mariscal mas chóven d'a Historia militar d'Alemanya.

Campanya d'Italia[editar | modificar o codigo]

O 12 de chunio de 1943 mandaba a Luftflotte 2 en Italia, y o 17 de chulio recibió as fuellas de caixico ta la suya Cruz de Caballero d'a Cruz de Fierro.

Dimisión[editar | modificar o codigo]

Por una malautía (cáncer), albandonó as suyas funcions militars o 27 d'octubre de 1944.

A suya muerte[editar | modificar o codigo]

O Generalfeldmarschall Wolfram von Richthofen morió por a suya malautía o 12 de chulio de 1945 en Bad Ischl (Austria), cuan yera presonero de guerra de l'Exercito estausunidense.

Vinclos externos[editar | modificar o codigo]


Predecesor:
???
Comandant en Cabo d'o Fliegerkorps VIII[2]
19 de chulio de 1939 - 30 de chunio de 1942
Succesor:
Cheneral Martin Fiebig
Predecesor:
Generaloberst Alexander Löhr
Comandant en Cabo d'a Luftflotte 4[3]
20 de chulio de 1942 - 4 de setiembre de 1943
Succesor:
Generaloberst Otto Deßloch
Predecesor:
Generalfeldmarschall Albert Kesselring
Comandant en Cabo d'a Luftflotte 2[4]
11 de chunio de 1943 - 27 de setiembre de 1944
Succesor:
Unidat disuelta


Referencias[editar | modificar o codigo]

  1. (es) Bishop, Patrick: Pilotos de caza. Los héroes de la Batalla de Inglaterra, Inédita Editores, Barcelona, 1ª edición, chinero de 2006, ISBN 84-96364-30-5, pachina 298.
  2. (de) VIII.Fliegerkorps en Lexicon der Wehrmacht.
  3. (de) Luftflotte 4 en Lexicon der Wehrmacht.
  4. (de) Luftflotte 2 en Lexicon der Wehrmacht.