Uga
A uga[1] u uva[1] ye una fruita mas u menos roncha y sucosa. Ye o fruito d'a vit y d'a parrera, que forma carrazos.
Morfolochía
[editar | modificar o codigo]
As ugas presentan una cubierta impermiable y dura dita borfollo[2] u forfollo que corresponde a l'epicarpo u l'exocarpo. As ugas son unidas con atras ugas d'o carrazo por a garraspa. A simient que bi ha adintro d'a uga ye a pepita u gran d'uga.[3]
Dimpués de prensar as ugas queda un repui solido formau por as garraspas, os borfollos y as pepitas y dito brisa.
Emplegos
[editar | modificar o codigo]
A mes gran parte d'a uga tien lo destín de fer vin, pero bi n'ha unas que se deixan secar pa fer pansas (uvas de colgar), y atras que se minchan dreitament porque son mes dulces (uvas lamineras). Dende zaguerías d'o sieglo XIX bi ha una tradición de minchar doce ugas a nueit de cabo d'anyo en Aragón, tota Espanya y buena part d'Hispanoamerica.
O vin se fa sozmetendo a un proceso de fermentación o suco d'a uga u mosto, que tamién se puet consumir y comercializar dreitament como producto no alcolico.
Pa obtener mosto en muitos puestos a chent pisaba as ugas en un trullar y dimpués las prensaban, pa dimpués[4] recullir o liquido en un laco que bi heba a cantos. Actualment o proceso d'obtener mosto ye un proceso industrializau
En o proceso de fermentación saliban gases que podeban intoxicar a la chent que bi heba amán d'o trullar. Cuan o mosto fermenta se diz que "bulle" en aragonés. En as Cronicas de los Chueces de Teruel se describe un caso d'intoxicación mientres bulliba o que yera fendo vin:
O vin que se deixa bullir sin o borfollo ye o clarete.[4] O vin que se deixa bullir con o borfollo se converte en vin tinto por a difusión d'as substancias colorants que bi ha.
Variedaz
[editar | modificar o codigo]En o Semontano de Balbastro y Viello Sobrarbe se cautivan u cautivaban bellas variants d'uga: alcanyón, aramón, garnacha, mamagastro, moristel, parraleta, parrel y salcenyo.
En a compleganza d'o río Martín (comarcas d'o Baixo Martín, Andorra-Sierra d'Arcos y Cuencas Meneras) as variedaz que se produciba yeran: garnacha, migueldarco, probetón (u probechón), negralejo, royal y blasco (vinya que no puya) y moscatel, collón de gato y bolsillo como variedaz de parra.[4]
En l'Alto Palancia y Alto Millars se conoixen as variants bobal, vernacha (u granacha), viradillo, morenillo, direta, temprana, botón de gato (u botón de gallo), escatajarra, farcalla, verdiel (u vidriel), royal, teta de vaca, señorito, de planta, terret, castellana y moscatel.
Ditos y mazadas
[editar | modificar o codigo]- "Cómete a uga que piquen as abelletas".[5]
- "No comas uga si no te la dan os esmolaticheras".
Referencias
[editar | modificar o codigo]- 1 2 (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).
- ↑ (an) Francho Nagore et al.: Endize de bocables de l'aragonés. Instituto de Estudios Altoaragoneses, Uesca 1999.
- ↑ (es) Manuel Alvar: Atlas lingüístico y etnográfico de Aragón, Navarra y Rioja. Tomo II. Institución Fernando el Católico. Departamento de Geografía Lingüística Departamento de Geografía Lingüística, Institución Fernando el Católico de la Excma. Diputación Provincial de Zaragoza, 1983
- 1 2 3 (es) Luis Miguel Bajén García, Fernando Gabarrús Alquézar: Memoria de los hombres-libro. Guía de la Cultura Popular del Río Martín. Biella Nuei Sociedad Cooperativa, 2002. p 33
- ↑ (es) Pedro Arnal Cavero: Refranes, Dichos, Mazadas... En El Somontano Y Montaña Oscense, Prames, 2013, ISBN 978-8483213957, p.73
