Sarratiás

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Sarratiás
Despoblau d'Aragón
Entidat  • País  • Provincia  • Comarca  • Municipio	Despoblau  Aragón  Uesca Sobrarbe L'Aínsa-Sobrarbe
Partiu chudicial	Boltanya
Población  • Total	0 hab. (2010)
Altaria  • Meyana	675 m.
Distancia  • 108 km  • 10 km	enta Uesca enta L'Aínsa
Codigo postal	22395
Patrons	Sant Lino
Parroquial  • Diocesi  • Arcipestrau	Uesca Semontano-Sobrarbe
Río	Bco. de Bruello
Coordenadas
Sarratiás Sarratiás en Aragón

Sarratiás ye una aldeya aragonesa d'o municipio de l'Aínsa-Sobrarbe, en a comarca de Sobrarbe y a provincia de Uesca. Actualment se troba despoblau.

Toponimia

O toponimo Sarratiás presenta una forma arcaica d'evolución d'o sufixo -iello con diftongo -ia-, y tamién una forma arcaica d'o suyo plural ya desapareixida en aragonés.

• SERRATĔLLO > Sarratiacho.
• Sarratiacho + -s > Sarratiach(o)s > Sarratiachs > Sarratiás.

En o toponimo fovano Moliniás a terminación latina -ĔLLU precursora de -iello ha teniu a mesma evolución.

Cheografía

Sarratiás ye en a valleta que describe o barranco de Bruello, a 675 metros sobre o nivel d'a mar en as garras d'o sarrato de Bruello, en a marguin ezquierda de lo corso d'augua, aman d'o suyo vivero.

Ye en un cantimplano que domina lo cabo d'alto d'a valleta d'o barranco de Bruello, a poqueta distancia d'a collada por a on que la cuenca d'o barranco se mete en comunicación con a valle de l'Ena, tot estando lo zaguer nuclio poblau d'a valleta, por a part d'alto. Se i puede arribar por a pista de Bruello, que en pasando Bruello deixa d'estar asfaltada.

Sarratiás, con Bruello y as altras pardinas que se troba en a valleta d'o barranco, fizo parte d'o municipio de Santa María de Buil, que desapareixió en os anyos 1960 absorvido por l'Aínsa. Dende 1981, o municipio se diz l'Aínsa-Sobrarbe.

Casas

O lugar se composa de dos casas, con bels edificios auxiliars d'entre os que se destaca un puzo t'abastir-las d'augua, y bellas bordas. Una d'as dos casas tiene a frontera totalment dominada por balconeras suportaladas, lo que tamién resulta destacable.

Sarratiás fa parte d'una dita popular en a redolada, que se mira ta expresar a baixa densidat de población d'ista parte de Sobrarbe, muit repartida en pardinas y aldeyas de no mas de tres u cuatro casas cadaguna. A dita diz:

O Sarrato, Sarratiello y Sarratiás,
once casas y tres lugars.

Popular

Efectivament, se fa alusión a las dos casas que tradicionalment han formau o Sarrato, siete que formaban Sarratiello, y as dos, sabidas, que feban Sarratiás.

Fiestas

• 23 de setiembre, Fiesta Mayor, fendo-le honras a Sant Lino. Se celebra de conchunta con os vecins de Bruello y Coroniellas. Tradicionalment, toz chuntos feban romería dica la ermita de Sant Lino, en a que se feba las bailes.

Vinclos externos

• (es) En http://www.despobladosenhuesca.com/

• Datos: Q13050125