River of No Return

River of No Return
Títol	River of No Return
Póster teatralizau d'a cinta en a suya edición en Chapón.
Ficha tecnica
Dirección	Otto Preminger
Aduyant de dirección	Paul Helmick
Dirección artistica	Addison Hehr Lyle Wheeler
Producción	Stanley Rubin
Guión adaptau	Frank Fenton
Basau en	una historia de Louis Lantz
Musica	Cyril J. Mockridge
Soniu	Bernard Freericks Roger Heman Sr.
Fotografía	Joseph LaShelle
Montache	Louis R. Loeffler
Escenografía	Chester Bayhi Walter M. Scott
Vestuario	William Travilla Charles Le Maire
Maquillache	Ben Nye Allan Snyder
Efectos especials	Ray Kellogg
Actors	Robert Mitchum Marilyn Monroe Tommy Rettig Rory Calhoun
Color	Cinemascope
Datos y cifras
País(es)	Estaus Unius
Anyo	1954
Debantadera	30 d'abril de 1954 Denver (Colorado)
Chenero(s)	Cine de western Cine de romance
Durada	91 min.
Idioma(s)	Anglés
Companyías
Productora(s)	Twentieth Century-Fox Film Corp.
Presupuesto	2,195.000 dólars
Recauto	3,800.000 dólars
Informacions en bases de datos especializadas:

Robert Mitchum y Tommy Rettig en una escena d'a cinta.

Robert Mitchum, Tommy Rettig y Marilyn Monroe en una escena d'a cinta.

River of No Return (títol orichinal en anglés, en aragonés Río sin retorno, enguerau en Aragón con iste zaguer títol) ye una cinta de western romantico de cine estausunidense de l'anyo 1954 dirichida por Otto Preminger seguntes un guión de Frank Fenton basau en una historia de Louis Lanz (qui heba pillau la suya idea d'a cinta italiana Ladri di biciclette, de Vittorio De Sica en 1948), con una Banda Sonora Orichinal de Cyril J. Mockridge, una dirección de fotografía de Joseph LaShelley que fue producida por Stanley Rubinta la productora cinematografica Twentieth Century-Fox Film Corp., estando los actors principals d'a cinta Robert Mitchum, Marilyn Monroe, Tommy Rettig y Rory Calhoun.

A cinta se rodó en exteriors en dos parques nacionals d'a provincia d'Alberta en Canadá, os parques de Banff y Jasper; y s'ambienta en o norueste d'Estaus Unius en 1875. Ye considerada unanimement como un western clasico, encara que mesmo Mitchum que Monroe, os actors protagonistas y que en ixas envueltas yeran dos grans estrelas de Hollywood, la rodoron por desichencias d'os suyos respectivos contractos con a productora y consideroron que lo guión yera masiau superficial.

Argumento

En 1875 en Idaho, en o norueste d'Estaus Unius, Matt Calder ye un viduo que fa poquet que ha surtiu d'a garchola a on bi yera en haber matau a un hombre en esfender a un atro. Plega en una ciudat provisional formada por cabanyetas en rechira de su fillo Mark, de 9 anyadas. Matt heba dixau su fillo ta que lo cudiase a un conoixiu, pero iste l'ha albandonau y l'ha dixau con Kay, una cantaire de saloon. Cuan a la fin Matt troba a Mark, iste no lo conoixe, pero lo pai li fa la promesa d'una vida de caza, pesca y agricultura en a suya grancha y marchan chuntos enta ixa grancha.

Dimpués de que marchen lo novio de Kay, lo chugador de cartas Harry Weston li diz que han de marchar enta lo lugar de Council City ta inscribir-ie en o Rechistro d'a Propiedat a propiedat d'una mina que acaba de ganar en chugando a lo poquer y rematan marchando chuntos dencima d'una navata pero troban problemas en os rapedos cuan se troban amán d'a grancha de Matt y Matt y su fillo los rescatan. Alavez Harry quiere mercar o rifle y lo caballo de Matt ta plegar en Council City por tierra pero Matt se niega, en estar o solo rifle y lo solo caballo que poseye y en haber-ie en a redolada indios hostils. A respuesta de Harry ye noquiar-lo y robar-li fusil y caballo y marchar él, en dixando a Matt, a Mark y a Kay albandonaus chusto cuan i plegan os indios.

Sin armas y debant d'o periglo de l'ataque inminent d'os indios, nomás queda un camín ta fuyir: fer servir la navata y fuyir por o río, y los tres marchan tamién camín de Council City. Kay con l'asperanza de retrobar a lo suyo novio y Matt rondoniando la suya venganza contra qui los ha dixau albandonaus. Y los indios continan perseguindo-los. Poquet a poquet, en compartir a experiencia, Matt y Kay cambian as opinions que cadagún d'éls teneba de l'atro antes d'escomencipiar o viache.

Elenco

Actor	Papel	Notas
Robert Mitchum	Matt Calder
Marilyn Monroe	Kay Weston
Rory Calhoun	Harry Weston
Tommy Rettig	Mark Calder
Murvyn Vye	Dave Colby
Douglas Spencer	Sam Benson
Fred Aldrich	Buscador d'oro	No acreditau
Claire Andre	Surrey Driver	No acreditada
Hal Baylor	Choven rebelde	No acreditau
Don Beddoe	Ben	No acreditau
Phil Bloom	Buscador d'oro	No acreditau
Buck Bucko	Bebedor en Council City	No acreditau
Roy Bucko	Buscador d'oro	No acreditau
Larry Chance	Choven rebelde	No acreditau
John Cliff	Hombre lascivo	No acreditau
Edmund Cobb	Barbero	No acreditau
Cecil Combs	Buscador d'oro	No acreditau
John Doucette	Hombre en o saloon	No acreditau
Tex Driscoll	Buscador d'oro	No acreditau
Geneva Gray	Bailarina	No acreditau
Al Haskell	Conductor d'a dilichencia	No acreditau
Chuck Hicks	Buscador d'oro	No acreditau
Ed Hinton	Chugador	No acreditau
George Huggins	Buscador d'oro	No acreditau
Michael Jeffers	Buscador d'oro	No acreditau
Dick Johnstone	Buscador d'oro	No acreditau
Mitchell Kowall	Buscador d'oro	No acreditau
Richard LaMarr	Buscador d'oro	No acreditau
Anthony Lawrence	Choven rebelde	No acreditau
Jarma Lewis	Bailarina en o saloon	No acreditau
Jack Low	Buscador d'oro	No acreditau
Hank Mann	Ciudadán de Council City	No acreditau
Jack Mather	Repartidor de cartas	No acreditau
Ann McCrea	Bailarina	No acreditau
Harry Monty	Choven	No acreditau
Fay Morley	Bailarín	No acreditau
Charles Morton	Buscador d'oro	No acreditau
Paul Newlan	Buscador d'oro	No acreditau
Barbara Nichols	Bailarina sora	No acreditau
Anton Northpole	Buscador d'oro	No acreditau
George Patay	Bebedor en Council Bay	No acreditau
Jack Perrin	Buscador d'oro	No acreditau
Charles Perry	Buscador d'oro	No acreditau
Joe Phillips	Buscador d'oro	No acreditau
Ford Raymond	Buscador d'oro	No acreditau
John Rice	Buscador d'oro	No acreditau
Robert Robinson	Buscador d'oro	No acreditau
John Roy	Buscador d'oro	No acreditau
Danny Sands	Buscador d'oro	No acreditau
Ralph Sanford	Cambrero	No acreditau
Lucile Sewall	Colono	No acreditada
Harry Seymour	Pianista	No acreditau
Arthur Shields	Mosén en Tent City	No acreditau
Cap Somers	Bebedor en Council City	No acreditau
George Sowards	Bebedor en Council City	No acreditau
Charles Sullivan	Buscador d'oro	No acreditau
Jack Tornek	Buscador d'oro	No acreditau
John Veitch	Choven rebelde	No acreditau
Fred Walton	Buscador d'oro	No acreditau
Bob Whitney	Bebedor en Council City	No acreditau
Harry Wilson	Buscador d'oro	No acreditau
Will Wright	Comerciant	No acreditau

Producción

Preproducción

Otto Preminger yera preparando-se ta l'enguero d'a suya cinta The Moon Is Blue cuan Darryl F. Zanuck, executivo d'a 20th Century Fox, li dició que heba estau designau ta dirichir River of No Return como parte d'o suyo contracto con ixe estudio. O productor Stanley Rubin, que ya teneba experiencia previa en a producción de westerns, preferiba que la dirichise directors con experiencia en o chenero, como William Wellman, Raoul Walsh u Henry King y li preocupaba que Preminger, a qui él consideraba como mas adecuau a cintas de cine negro u de cine de comedia sofisticada, no podese estar a l'altaria requerida ta dirichir una cinta d'una tematica tan propia d'a cultura estausunidense. O mesmo Preminger no teneba pas guaire intrés inicial dica que en leyó lo suyo guión y podió veyer que l'argumento teneba potencial. Preminger tamién aprobó la decisión d'asignar os papels protagonistas a Robert Mitchum y Marilyn Monroe, a qui ya se lis heban asignau ixos papels antes de decidir-se por Preminger como director.

Zanuck decidió que la cinta se filmase en Cinemascope, asinas que en augmentó lo suyo presupuesto. A parte principal d'o rodache se faría en Canadá, en os parques nacionals de Banff y Jasper y en o laco Louise en a provincia canadiense d'Alberta y en o río Salmon en Idaho, a on realment s'ambienta la historia. Preminger y Rubin marchoron chuntos enta ixas redoladas ta buscar localizacions y mientres ixe viache Rubin podió veyer que, dillá d'a suya obligación contractual, Preminger sí que teneba un intrés real en a cinta.

Rodache

Elenco y equipo marchoron a finals de chunio de 1953 enta Calgary, dende on marchoron enta l'Hotel Banff Springs, en bel meyo d'o Parque Nacional Banff, que se convertió en la suya base mientres o rodache en Canadá.

Monroe portó en o set de rodache a Natasha Lytess, qui yera la suya entrenadora personal d'interpretación, y bien luego prencipioron os problemas entre ella y Preminger. Lytess daba a Monroe instruccions sobre cómo heba d'actuar radicalment contrarias a las que li daba Preminger, fendo por eixemplo que Monroe pronunciase cadaguna d'as silabas d'o suyo papel con un enfasi desacherau, dica que Preminger trucó a Rubin a la suya oficina en Los Angeles ta desichir que se fese fuera d'o rodache a Lytess, y iste accedió. Tanimientres, Monroe trucó directament a Zanuck y li dició que no continaría con o rodache dica que Lytes no bi tornase. Zanuck, en considerar que Monroe yera una actriz que podeba garantizar un buen recaudo ta la cinta, accedió y fació tornar-ie a Lytes. Preminger, que no yera conforme, amostró lo suyo malestar con Monroe dica la fin d'o rodache.

Mientres o difícil rodache, Preminger tenió que lidiar con una frecuent plevia y con l'excesivo consumo d'alcol por parte de Robert Mitchum. Amás, Monroe se lesionó y cuasi s'orchega y no podió filmar mientres bels días, rodando finalment bella escena enchesada. Ta protecher o suyo vestiu mientres l'ensayo heba feito servir botas muit altas, que li plegaban dica lo peito y esbarriló, cayendo en o río y omplindo-se las suyas botas d'augua de modo que no podeba levantar-se d'aintro d'o río dica que corrioron a socorrer-la, torcendo-se la calcanyeta.

O choven Tommy Rettig yera o solo consuelo de Preminger, porque en respectaba la suya profesionalidat y mesmo l'aduyaba muitas vegadas a centrar a Monroe. Tanimientres, Lytess tamién escomencipió a interferir en a interpretación de Rettig en socavando la suya confianza y alavez Preminger reunió a tot l'elenco ta informar-lis d'o comportamiento de Lytess, trobando-se con que l'elenco principio a refirmar la suya petición de fer fuera a Lytess.

En primerías de setiembre l'equipo marchó enta Los Angeles ta filmar-ie as escenas d'interiors y planos d'as secuencias en o río, que se filmoron en un tanque d'augua y simultaniament, fendo servir dobles ta ixo, en o río Salmon d'Idaho a on ye ambientada la cinta. Monroe feba servir chancas y Preminger la evitava tot o que podeba.

Con tot y con ixo, Preminger consiguió rematar a cinta en o plazo previsto y sin superar o presupuesto que li heban fixau.

River of No Return estió una d'as primeras cintas en fer servir o truco d'o detonador de sangre ta simular un impacto real de bala con a consiguient emisión de sangre, encara que a sobén se gosa decir que la primer cinta en emplegar-lo estió Run of the Arrow, que no se filmó dica 1957. Tamién estió la primer cinta rodada en Canadá con o nuevo sistema de Cinemascope.

Postproducción

Mientres o proceso de postproducción d'a cinta, Preminger marchó enta Europa, dixando a l'editor Louis R. Loeffler y a Rubin o treballo de rematar-la y fer o montache cinematografico. Tenioron que clamar a Jean Negulesco ta que filmase bella escena complementaria. A visión d'as escenas en bruto confirmoron a primera opinión de Rubin de que Preminger no heba estau o director adecuau ta la cinta: consideró que Preminger no heba captau as esencias d'o western, que heba ignorau elementos clave d'a trama argumental y que heba filmau superficialment as escenas d'acción, en dixando-las con un aspecto escenificau y estatico; amás, en bellos casos no coincidiban as escenas filmadas en locación y en estudio. A experiencia de Preminger en ista cinta lo convenció de que no quereba tornar a dirichir como emplegau d'un estudio de cine y finalment pagó a la Fox 150.000 dólars ta cancelar o suyo contracto.

Posteriorment, Monroe afirmó que River of No Return yera la suya pior cinta, y Preminger la criticó de contino en cuantas entrevistas. No estió dica 1980 que no acceptó en una entrevista que Monroe s'heba dixau la pelleta en o suyo treballo en a cinta.

Critica

Bosley Crowther en The New York Times, afirmó que:

Ye dandalioso si ye lo paisache u l'adorno de Marilyn Monroe la caracteristica de mayor atracción en River of No Return.... O paisache montanyenco ye espectacular, pero tamién en ye, a la suya manera, la senyorita Monroe. La preferencia d'o espectador, si ye que bi ha belluna, fácil que penda d'o que li intrese. Ciertament, o guionista Frank Fenton ha feito lo millor que ha podiu ta lograr un equilibrio prou equitativo entre la naturaleza y la senyorita Monroe... Y ixo no puet tomar-se a ixalamandrón. Porque o director Otto Preminger ha vertiu toda la grandeza y la menaza d'istas características sobre la pantalla Cinemascope que omple los uellos. Una repugnant succesión de rapedos, espumiando y bullindo, presenta una muestra d'a violencia de la naturaleza que no puet evitar esteriquiar a l'espectador. La navata marchando a pitacodas a traviés d'istos rapedos ye todo un espectaclo digno de veyer. Y veyer os paisaches d'as Montanyas Rocosas en color tamién ye poliu. Pero l'atención d'o Sr. Robert Mitchum y de l'audiencia se dirichen enta la Srta. Monroe a traviés de frecuents y liberals poses d'ella en anvistas completas y significativas

Bosley Crowther

En Fotogramas indican que:

Una d'as cintas mas impersonals d'o suyo director, a on estió per baixo d'a suya linia habitual (...) historia ... excesivament convencional

Quim Casas comenta que:

Rodau en escenarios naturals canadienses, iste western ye azul y verde (por o permanent contraste entre lo cielo y las auguas fluvials, as dos linias horizontals en que s'enmarcan os escasos sers humans que pueblan os encuadres) poseye un aliento dramatico y sexual muit destacable, encara que ye posible que bellas escenas entre Mitchum y Monroe estasen retocadas por Jean Negulesco

Quim Casas

Se veiga tamién

• Cine en 1954.
• Cintas de 1954.

Vinclos externos

• Se veigan as imáchens de Commons sobre River of No Return.
• (en) River of No Return en Internet Movie Database.
• (en) River of No Return en AllMovie.
• (en) River of No Return en TCM Movie Database.
• (en) River of No Return en Rotten Tomatoes.
• (en) / (es) River of No Return en FilmAffinity.
• (en) River of No Return en l' American Film Institute Catalog de l'American Film Institute.
• (fr) River of No Return en Allociné.

• Datos: Q1470997
• Multimedia: River of No Return / Q1470997