Río de la Fuent d'el Berro

De Biquipedia
Ir a la navegación Ir a la búsqueda
Río de la Fuent d'el Berro
Administración
Estatos {{{estatos}}}
Territorios Flag of Aragon.svg Sierra d'Albarrazín (Aragón)
Cheografía
Longaria  km
Altaria d'o naixedero  m
Naixedero Fuent d'el Berro
Desembocadura río Guadalaviar
Superficie d'a cuenca {{{cuenca}}} km²
Cabal meyano {{{cabal}}} m³/s


Lo Río de la Fuent d'el Berro ye lo principal afluent de lo río Guadalaviar en la Sierra d'Albarrazín.

Naixe en la Fuent d'el Berro, situada en una "manga" u prolongación de lo termin d'Albarrazín que bi ha entre los termins de Fridas y Calomart. Antes de la Fuent del Berro lo cauz de lo río reculle las auguas d'un ventallo de barrancos que bi ha a lo norte de la Muela de Fridas, en lo termin de Fridas d'Albarrazín.

Tien dos tramos a on lo cauz ye entallau en lo substrato rocoso, la Foz d'el río Blanco u Canyón de los Arcos y la Foz de Calomart[1].

La Foz d'el río Blanco u Canyón de los Arcos s'ha feito por encaixamiento en calsineras y dolomías churasicas. Bi ha ripas u paretz quasi verticals, pinaclos como El Moricacho, covachos, y un puent natural (Lo Puente de la Toba). La vechetación natural pende en formacions de pins, sabinas y chinebros. Bi ha uns quantos molins (Molino de las Pisadas y Molino de abajo)[1], y una presa (La Presa del Pozo de los Ahogados)[2]. Ye un punto d'inspiración de leyendas como la historia d'El Moricacho de la Foz y l'aparición demoniaca en lo Molino de las Pisadas, a on que bi ha icnitas.

En Calomart lo río traviesa uns materials de chesos y archilas de facies Keuper y la val s'ixampla. Bi ha una chicota huerta.

Manimenos quan lo río deixa dezaga ixos materials torna a encaixar-se de sopetón ta l'este por trobar-se materials calsinosos y forma la Foz de Calomart (Canyón de Calomarde en castellán). A piet de las ripas bi ha tarteras, que a vegadas fosilizan atras acumulacions de materials de ladera més antigos indicadors de periglacialismo[1] en un clima que i heba en la zaguera glaciación u Würm. La carretera d'Albarrazín va paralela a lo río. En la marguin ezquierda de la val ye lo Rollo de Calomarde, un puent natural calsinoso envistable dende la carretera, y que puet corresponder con lo Despenyadero de Ruello mencionau en lo "libro de pasos, masadas, abrevaderos y dehesas" de l'archivo de la Comunidat d'Albarrazín y con materials escritos dende 1326.

En este endreito se troba la Cascada Batida[2], un salto de bells 20 m y con una gorga rodeyada de tot por paretz de travertins que se formoron entre fa 10.000 y 7.000 anyadas, quan lo río no yera tan rapido y lo clima yera més calido. La formación de travertins encara ye activa, pero menos, porque predominan los procesos d'erosión[1].

Pasa tamién cerca de Royuela. En un prau embadinau temporalment por lo río bi ha una localidat de lo endemismo botanico Puccinellia pungens, que tamién se troba en la Laguna de Gallocanta.

Lo río de la Fuent d'el Berro se reculle en lo río Guadalaviar en frent d'un puesto dito en la baixa Edat Meya Entramasaguas y huei en castellán Entrambasaguas, que vien de lo latín INTER AMBAS AQUAE y da ideya de forcallo de ríos.

Referencias[editar | editar código]

  1. 1,0 1,1 1,2 1,3 (es) José Luis Peña Monné, Luis Alberto Longares Aladrén, Marta Espinalt Brillas: Paisajes naturales de la provincia de Teruel. Guía del medio natural. Instituto de Estudios Turolenses, 2000. ISBN: 84-86982-97-9. pp 53-58.
  2. 2,0 2,1 (es) Prensa Diaria Aragonesa: Los ríos de Aragón. Ríos Mijares, Turia y Tajo. El Periódico de Aragón, Diputación General de Aragón, 2005, pp 58-59.

Bibliografía[editar | editar código]


Ríos de la cuenca hidrografica de Guadalaviar
Marguin izquierda Griegos | Garganta | Alfambra | Camarena | Deva | Arcos | de Chelva
Marguin dreita Fuent d'el Berro | Rambla de la Chartera | Ebrón | Boílgues | Sot