Perfume

De Biquipedia
Ir ta: navego, busca
[[{{{4|Wikipedia:Articlos destacatos|...]]
LinkFA-star Aragon.svg

Lo perfume ye la mezcla feita d'aceites esencials aromaticas, alcohol y un fixador, usata ta dar una ulor agradable a lo cuerpo humán, un obchecto u bell espacio habitato.

La cantidat d'alcohol pende d'a mena de perfume que se'n quier obtener. Por un regular, la mezcla se deixa aviellir lo tiempo d'una anyata.

Aparador con pomos de perfume de formas diferents

Descripción d'os perfumes[editar | editar código]

Ye imposible describir un perfume seguntes los suyos components perque las formulas se mantienen en secreto. Y mesmo si se conoixen, los ingredients son muitos ta poder ufrir-ne una clasificación unica y útil. Manimenos, los conoixedors pueden apercibir-ne en cheneral los ingredients principals. Una d'as maneras de describir-los ye clasificando-los ya siga seguntes la familia olfativa a la que pertenix la fragancia u seguntes la suya concentración.

Las familias olfativas[editar | editar código]

Las fragancias pueden estar clasificatas en qualques familias olfativas seguntes lo suyo "acuerde" (accord).

  • Florals: fragancias dominatas per l'aroma d'un u més tipos de flors. Quan només que se i fa servir una flor, en dicen un soliflore (como lo Diorissimo de Christian Dior, con o lirio de puerto)
  • Chypre: fragancias feitas en un acuerde pareixito, que consiste en bergamota, molsa de caxico, pachuli y laudano. Lo nombre ye derivato d'un conoixito perfume de François Coty. (Se veiga baixo la lista de perfumes)
  • Aldeidicas: fragancias que incorporan aldeídos. Lo primer perfume aldeidico estió Nº 5 de Chanel, creyato per lo perfumista francés Ernest Beaux en 1921. Los perfumes aldeidicos tienen una nota piquant caracteristica.
  • Fougère: fragancias feitas sobre una base d'espícol, cumarina y la "molsa de caixico" (lo líquen Evernia prunastri). Lo nombre provién d'o Fougère Royale de Houbigant, pionero de l'uso d'ista base. Muitas fragancias d'hombres perteneixen a ista familia aromatica, caracterizata per una ulor penetradera y afustata.
  • Cuers: fragancias con aromas de miel, tabaco y fusta en as suyas notas meyas u baixas, més una aroma que remembra lo cuero.
  • Afustatas: fragancias dominatas per ulors afustatas, como lo sandalo y lo cedro. Lo pachuli acostumbra a estar present en istos perfumes.
  • Orientals u ambres: fragancias en as que predominan las aromas de vainilla y las ulors animals chunto con aromas de flors y fustas. Pueden reforzar-sen per meyo d'aceites canforosas y rasinas d'inciens, que remeran la simbolochía y concepcions orientals d'a era vitoriana.
  • Citricas: fragancias de larga tradición que consistiban dica abe poco en colonias ta refrescar per la baixa persistencia d'as aromas citricas. Lo desembolicamiento de components més recients han premitito de creyar verdaderas fragancias citricas.

Las notas d'as fragancias[editar | editar código]

Ta disolver las sustancias aromaticas se fa servir una mezcla d'alcohol y augua. En aplicar-se, la calor corporal fa que lo disolvent s'esparda a priesa, deixando que la fragancia se vapore a espacio lo tiempo de bellas oras. Lo ritmo de vaporación y la fuerza d'a ulor d'o compuesto en determina parcialment la suya persistencia, devez que la clasificación d'a nota d'o perfume.

  • Notas altas: las napas d'a fragancia que se notan de seguida que un perfume s'aplica. Son las que causan la impresión inicial d'un perfume, per lo que son de gran importancia ta la venda d'o producto. Los elementos que composan las notas altas son fuertes en ulor pero muito volátils y se vaporan a escape.
  • Notas meyas: las napas que apareixen a la que se son disipatas las notas altas. Son l'autentico "corazón" d'o perfume, y emmascaran la impresión inicial a ormino desagradable d'as notas baixas, que a bonico se tornan agradables. Las notas meyas acostumbran a fer-se notar entre 2 menutos y 1 ora dimpués de l'aplicación d'o perfume, y duran arredol d'unas quatre oras.
  • Notas baixas: las napas d'o perfume que apareixen en despareixer las notas altas, mezclando-sen con as meyas ta formar lo tema principal d'o perfume. Son las que atorgan fondura y cuerpo a lo perfume, compuestas a ormino per lo fixadors que enforteixen las notas superiors. No acostumbran a percibir-sen antis d'haber pasato 30 menutos dende l'aplicación d'o perfume, pero la suya durata puet estar de més d'un día.

La concentración d'os perfumes[editar | editar código]

Las aceites d'os perfumes se disuelven con un disolvent apropiato ta premitir un millor uso d'o perfume. La disolución d'as aceites se fa ta privar que ibi haigan reaccions alerchicas u se malmetan la piel u la ropa per causa de l'alta concentración de components volátils.

Lo disolvent que s'emplega d'ordinario ye lo etanol u una mezcla d'etanol y augua. Lo percentache de l'aceite d'o perfume per lo volumen que bi ha determina lo tipo de fragancia. Contra més baixo ye lo percentache de compuestos aromaticos, més baixa la intensidat y durata d'a fragancia:

  • esprito de perfume: 20%-40% de compuestos aromaticos
  • augua de perfume u perfume (eau de perfume) EdP: 15%-30% (~15%) de compuestos aromaticos
  • augua de banyo (eau de toilette) EdT: 7%-14% (~10%) de compuestos aromaticos
  • augua de colonia u colonia (eau de cologne) EdC: 3%-6% (~5%) de compuestos aromaticos
  • Splash Perfumes EdS: ~1% de compuestos aromaticos

Aromas naturals y sinteticas[editar | editar código]

Fuents vechetals[editar | editar código]

En perfumería, las plantas son dende abe tiempo la fuent més usata d'as aceites esencials y los compuestos aromaticos. Las fuents d'ixos compuestos se derivan de diversas partes d'a planta:

Fuents animals[editar | editar código]

  • L'almesc: Derivato en orichen d'as glandulas d'almesc d'o ciervo almisquero d'Asia, huei ye estato sustituito per l'uso d'almisque sintetico debito a lo suyo pre y a qüestions eticas.
  • L'algalia: Tamién conoixita como l'almesc d'a civeta, s'obtién d'as glandulas ulorosas d'as civetas.

Fuents sinteticas[editar | editar código]

Las aromas sinteticas se creyan per meyo d'a sintesi organica de diferents compuestos quimicos que s'obtienen de destilatos de petrolio, rasinas de pin u belaltra reserva organica barata. Istos sinteticos pueden tener fragancias que no se troban en a natura.

La mayoría d'as aromas sinteticas d'o mundo son feitas per unas pocas companyías.

Tecnicas t'a obtención d'odorants naturals[editar | editar código]

Antis que los perfumes puedan composar-sen, cal obtener en primeras los odorants usatos. Los odorants sinteticos se producen per meyo de sintesis organicas y se purifican. Los odorants de fuents naturas han menister de l'uso de diferents metodos ta extrayer los aromas d'as materias primas.

Las tecnicas distorsionan la ulor d'os compuestos aromaticos obtenitos d'as materias en crudo. Ixo se debe a l'uso d'a calor, los disolvents u la exposición a l'oxicheno en o proceso d'extracción, que desnaturalizan los compuestos aromaticos, lo que u bien cambía lo carácter d'a suya ulor u los deixa inodoros.

  • Destilación: Tecnica común ta obtener compuestos aromaticos de plantas. La materia prima s'escalfa y los compuestos fragants se recullen per meyo d'a condensación d'a vapor destilata. Puet estar destilación per meyo de vapor u destilación ixuta u directa.
  • Expresión: La materia prima se comprime y se'n cullen las aceites. Només que s'extrayen asinas las aceites fragants d'as pelas de fruitas citricas ya que l'aceite i ye tan present que iste metodo d'extracción ye economicament fesible.
  • Enfleurage: Tecnica ta absorber l'aroma per meyo d'a cera, extrayendo-ne dimpués l'aceite ulorosa con alcohol. La tecnica, usata quan la destilación no yera posible, no se fa ya hue debito a lo suyo coste prohibitivo y a la existencia de metodos d'extracción més eficaces.

Composición d'os perfumes[editar | editar código]

La composición d'un perfume ye important t'a industria d'o perfume pero tamién ta qualques altras, como las que venden artícols de luxo u productos alimenticios. La fin ultima d'usar las composicions aromaticas en ixas industrias ye atrayer los clients y encitar-los per meyo d'o suyo sendito de l'olfacto a mercar lo perfume u lo producto perfumato. Per ixo ibi ha siempre un gran interés a formular perfumes que la chent considere esteticament agradables.

Lo perfumista[editar | editar código]

Lo treballo d'a composición de perfumes se dixa a las mans d'un expierto en ixe quefer conoixito en o sector como lo perfumista u, de manera més familiar, lo naso, per lo suyo acusato y fin sentito de l'olfacto y habilidencia en a composición d'ulorías. Lo perfumista ye en verdat un artista y un buen conoixedor d'a estetica d'as fragancias. Lo perfumista no solament ha de tener buenas conoixencias d'un gran amero d'ingredients aromaticos y las ulors que en fan, y destinguir cadagún d'os ingredients ya siga per deseparato u en combinación con altras fragancias; d'igual manera ha de conoixer la manera en que se manifiesta cada ingredient con altros ingredients a lo largo d'o tiempo. La fayena d'o perfumista ye pareixita a la d'os saboristas en o feito que los dos composan ulors y gustos ta muitos productos alimenticios comercials.

Lo proceso d'a composición emprencipia per un regular con un chicot informe d'os patrons d'o perfumista u de bell client, normalment casas de moda u sociedatz grans formatas per diversas industrias. Cada informe contién las especificacions t'o perfume deseyato, describindo-ye a ormino en térmens poeticos u abstractos las aromas u ingredients a usar en a composición d'o perfume.

Lo perfumista encomienza alavez lo proceso de combinar muitas mezclas de perfumes y mira de trobar las sensacions deseyatas especificatas en o informe. Dimpués d'haber presentato las mezclas a los clients, si s'apreba, lo perfumista puet proceder a vender-ne la formulación a lo client, a ormino con modificacions d'a composición d'o perfume. Iste proceso abraca en cheneral dende uns pocos meses a bells anyos. La composición d'o perfume s'usará alavez ta reforzar un altro producto como fragancia funcional (xampús, etz.) u comercializato y vendito dreitament como fragancia fina.

Lo perfumista tamién puet simplament creyar un perfume per inspiración que se comercialice dimpués u que pase un informe. Ixo ocurre per un regular en perfumerías chiquetas u independients.

Lo proceso[editar | editar código]

D'ordinario, las aceites d'os perfumes contienen decenas u centenas d'ingredients. Incluyitos en o perfume i son los fixadors, como per ixemplo l'ambra grisa u l'algalia, encargatos de ligar bien las diversas fragancias. Istas sustancias fan ulors desagrables pero en solución alcoholica actúan como achents conservaders.

La mezcla se dixa aviellir una anyata, alto u baixo. La mayoría d'os perfumes y colonias de huei se fan per meyo d'aceites d'as fragancias que s'elaboran a las casas usando aceites esencials y sustancias quimicas aromaticas. Istas aceites se combinan con alcohol y augua, se deixan en contenedors un minimo de 14 días y se filtran ta sacar-ne qualsiquier resta de solache antis que la solución pueda enfrascar-se ya en os recipients ta perfumes.

Historia d'o perfume[editar | editar código]

Lo vocable provién d'o latín per fume ("per meyo d'o fumo"). La perfumería, l'arte de fer perfumes, s'orichinó a l'antigo Echipto, pero se desembolicó y refinó entre los romans y los arabes. Los perfumes tamién existiban en Asia oriental, pero muitas d'as suyas fragancias se basaban en o inciens.

Las culturas islamicas contrebuyoron de trazas notorias a lo desembolicamiento d'a perfumería en o mundo occidental, igual en o respective a lo perfeccionamiento d'a extracción de fragancias per meyo d'a destilación d'a vapor como en a introducción de nuevos ingredients crudos. Los mercaders arabes y persas teneban mayor acceso t'as diferents especias, hierbas y altras materias primas t'as fragancias. Amés de fer-las servir t'o comercio, muitas d'ixas materias yeran coltivatas per los musulmans a fin que podesen medrar bien difuera d'os suyos climas orichinals. Un ixemplo en sería lo chasmín, orichinario d'Asia oriental.

L'uso documentato de perfumes en a cultura islamica recula lo menos t'o sieglo VI, considerato un deber relichioso. L'alquimista Chabir ibn Hayyan, clamato a ormino "lo pai d'a quimica arabe", desembolicó muitas tecnicas, incluyitas la destilación, la vaporación y la filtración, que premitiban d'aplegar la uloría d'as plantas en una vapor que podeba cullir-se en forma d'augua u aceite.[1]

Augua de Colonia de Johann Maria Farina, con texto de 1811

Manimenos, lo fundador autentico d'a industria d'o perfume estió lo scientifico al-Kindi, que esperimentó con as combinacions de plantas y altras fuents ta elaborar una variedat de productos aromaticos y conseguir buena cosa de "recetas" ta perfumes, cosmeticos y farmacos.

L'almesc y los perfumes florals s'introducioron en Europa en os sieglos XI y XII, procedents d'Arabia, per meyo d'o tracto entre arabes y la chent que tornaba d'as Cruzatas. La conoixencia d'a perfumería medró dende lo sieglo XIV.

En o Renaiximiento, yera més que més la nobleza qui emplegaba los perfumes como hichiene diaria ta asconder las ulors corporals. Debito en parte a lo suyo patrocinio, se creyó la industria perfumera en Occident. Una d'as fabricas de perfume consideratas més antigas ye la d'o perfumista italián afincato a Colonia, Johann Maria Farina, qui en honor a la suya ciudat d'adopción decidió de clamar a la suya fragancia Eau de Cologne ("Augua de Colonia"). En una carta de 1708, Farina definiva asinas la suya fragancia:

Lo mío perfume ye como un maitín italián de primavera zaga la plevia: recuerda las naranchas, los limons, los pomelos, las bergamotas, los cedros, las flors y las hierbas aromaticas d'a tierra mía.

Ta las envueltas d'o sieglo XVIII, se coltivaban plantas aromaticas en a rechión francesa de Grasse, a fin de somenistrar materias primas a la creixent industria d'o perfume, y fendo-ne un centro de gran referencia t'os perfumers.

En l'actualidat, Francia contina estando lo centro principal d'a perfumería europea.

La conservación d'o perfume[editar | editar código]

Los components d'as fragancias d'os perfumes pierden la suya natura si se guardan de trazas incorrectas en presencia de:

  • calor
  • luz
  • oxichén
  • materials organicos estranios

Una conservación adequata d'os perfumes pasa per mantener-los luenyes de fuents de calor y alzar-los a puestos en os que no sigan exposatos a la luz. Un frasco ubierto puet conservar-ne l'aroma intacta lo tiempo d'una anyata, siempre que siga plen u quasi plen, pero a la que lo nivel baixe, la presencia d'oxicheno en l'aire que contién lo frasco alterará lo carácter odorifero d'o perfume, distorsionando-lo a la fin.[2]

Listas de perfumes[editar | editar código]

Perfumes celebres per anyo de creyación[editar | editar código]

Ista lista ye una relación de bells perfumes conoixitos. Se i endican, de cucha ta dreita, l'anyo de creyación, lo nombre d'o perfume y los nombres d'a companyía y d'o perfumista:

1714 Eau de Cologne Johann Maria Farina Johann Maria Farina (1685-1766)
1872 Hammam Bouquet Penhaligon's William Henry Penhaligon
1889 Jicky Guerlain Aimé Guerlain
1902 Blenheim Bouquet Penhaligon's William Henry Penhaligon
1912 L'Heure Bleue Guerlain Jacques Guerlain
1911 English Fern Penhaligon's William Henry Penhaligon
1917 Chypre François Coty François Coty
1919 Mitsouko Guerlain Jacques Guerlain
1919 Tabac Blond Caron Ernest Daltroff
1921 N°5 Chanel Ernest Beaux
1925 Shalimar Guerlain Jacques Guerlain
1927 Arpège Lanvin André Fraysse
1929 Soir de Paris Bourjois Ernest Beaux
1930 Joy Jean Patou Henri Alméras
1932 Je Reviens House of Worth
1934 Pour Un Homme Caron Ernest Daltroff
1944 Bandit Robert Piguet Germaine Cellier
1945 Femme Rochas Edmond Roudnitska
1947 Vent Vert Balmain Germaine Cellier
1948 L'Air du temps Nina Ricci Francis Fabron
1956 Diorissimo Christian Dior Edmond Roudnitska
1959 Monsieur Givenchy
1959 Cabochard Parfums Grès Bernard Chant
1966 Eau sauvage Christian Dior Edmond Roudnitska
1969 Ô Lancôme Robert Gonnon
1973 Charlie Revlon Harry A. Cuttler
1976 Lily of the Valley Penhaligon's
1976 Violetta Penhaligon's
1976 Z-14 Halston Arden
1977 Opium Yves Saint-Laurent Jean-Louis Sieuzac
1978 Azzaro Pour Homme Azzaro Gérard Anthony, Martin Heiddenreich, Richard Wirtz
1978 Bluebell Penhaligon's
1978 Magie Noire Lancôme PFW
1979 Anaïs Anaïs Cacharel Roger Pellegrino
1979 Ivoire Balmain
1981 Nombre Noir Shiseido Serge Lutens, Jean-Yves Leroy
1981 Giorgio Giorgio Beverly Hills Harry A. Cuttler
1983 Paris Yves Saint-Laurent Sophia Grojsman
1984 Coco Chanel Jacques Polge
1985 Poison Christian Dior Jean Guichard
1986 Prescriptives Calyx Prescriptives Sophia Grojsman
1987 Loulou Cacharel Jean Guichard
1988 Eternity Calvin Klein Sophia Grojsman
1990 Trésor Lancôme Sophia Grojsman
1992 Angel Thierry Mugler Olvier Cresp and Yves de Chiris
1993 Jean-Paul Gaultier Jean-Paul Gaultier Jacques Cavallier
1995 CK One Calvin Klein Harry Fremont and Alberto Morillas
1995 Dolce Vita Christian Dior Pierre Bourdon and Maurice Roger
1995 Le Mâle Jean-Paul Gaultier Francis Kurkdjian
1996 Acqua di Gió Pour Homme Giorgio Armani Alberto Morillas
1997 Envy Gucci Maurice Roucel
1999 No 1 Clive Christian
2001 Coco Mademoiselle Chanel Jacques Polge
2001 Nu Yves Saint-Laurent Jacques Cavallier
2003 100% Love Shaping Room Sophia Grojsman
2005 Chinatown Bond No. 9 Aurelien Guichard
2005 Rose 31 Le Labo Daphne Bugey
2005 Vertigo Vertigo Parfums Cecile Krakower

Perfumes promocionatos per personaches celebres[editar | editar código]

En os zaguers anyos, bells personaches celebres han sinyato achustes con marcas de perfumes ta asociar los suyos nombres a una fragancia como meyo d'autopromoción. Ixa asociación se considera un atractivo comercial en as campanyas d'a marca d'os productos, perfumes que no gosan de tener la lonchevidat d'as fragancias clasicas. Astí baixo puet veyer-se-ne una relación:

Referencias[editar | editar código]

  1. Levey, Martin (1973), "Early Arabic Pharmacology", E.J. Brill: Leiden, ISBN 90-04-03796-9
  2. Burr, Chandler (2003). The Emperor of Scent: A Story of Perfume, Obsession, and the Last Mystery of the Senses. Nueva York: Random House. ISBN 0-375-50797-3
  3. [1]

Vinclos externos[editar | editar código]

  • Biblioparfum Replega de més de 600 libros sobre perfumes. (En francés y anglés)
  • Scented Pages Catalogo birtual adedicato a la cultura d'as ulors. (En anglés)
  • Images de Parfums Replega d'imáchens comercials de fragancias.