Ir al contenido

Narancha (fruita)

De Biquipedia
Iste articlo ye sobre a fruita. Se veiga tamién a color narancha.
Naranchas en una naranchera
Naranchas

A narancha[1] u toroncha[1] ye a fruita d'a naranchera u toronchero[1][nota 1], eixemplo d'hesperidio. Ye un citrico, de color entre l'amariello y o royo, color que recibe o nombre de narancha, por ista fruita. Orichinariament d'o sud-este asiatico, s'adapta mui bien a lo clima mediterranio.

Como toz os citricos ye rica en vitamina C, y ye habitual minchar-ne enteras, asinas como en forma de suco.

Simbolicament se dice que belún ye a meya narancha d'unatro cuan ye la parella perfecta en o terrén de l'amor.

L'orichen bien documentau d'o fitonimo se troba en o sanscrito narang u नारंग. S'especula que a forma orichinal en sanscrito provienga d'una luenga dravidica. Dende o sanscrito fue adaptada en persa como نارنج u nārensh. Dende o persa pasó a l'arabe como narandj u نرنج l'árbol y narandjah u نرنجة la fruita. L'adaptación en as diferents luengas romances ha estau dispar: naranja en castellano, laranja en portugués, naronja en catalán medieval, arancia en italiano pa evitar confusions con os articlos, y orange en francés relacionando-la con la parola or.

As naranchas que se cautiva y vende actualment son por un regular naranchas dolzas Citrus × sinensis (narancha de China) y Citrus reticulata (mandarina), que introducioron os portugueses en o Sieglo XVI dende as suyas colonias d'Orient. Enantes os citricos equivalents que se cautivaba y vendeba en Europa yeran Citrus × aurantium, de gusto amargo, que teneban uso en a fabricación de perfumes y de mermeladas, y que en aragonés medieval recibiban a denominación de "toroncha", denominación que a vegadas tamién s'aplicaba a lo poncil (Citrus medica), lo solo citrico cautivau en tiempos d'os romanos. A introducción en Espanya d'a nueva fruita dolza traita por os portugueses en o sieglo XVI cheneralizó a denominación castellana naranja en Aragón, que s'adaptó como narancha en aragonés occidental.

A parola "toronja" se remonta a lo sanscrito मातुलङ्ग u mātulaṅga, que pasó a lo persa como torandj u ترنج, y dende o persa a las luengas semiticas como l'arameu, hebreu y arabe. En arabe clasico yera turunǧah y en arabe andalusí turúnǧa, que lo transmitió a l'aragonés pa dicir a fruita de Citrus × sinensis y a lo castellano pa dicir a fruita de Citrus medica, que en aragonés medieval yera poncil.

De fueras de textos comercials, de peaches y de duanas, bi ha pocas mencions sobre citricos en aragonés medieval, una d'as pocas ye en l'alchamiau d'Urreya, pero podría corresponder en realidat a atros citricos como Citrus medica:

Dixo: "Ké dizes en las toronjas?" Dixo: "La-ke ye amariella su kolor i se mantiene"[2]

En o sieglo XVII bi heba en Zaragoza un microtoponimo ilustrativo d'a presencia d'iste árbol, l'arbellón de la Toronjera.

  1. ↑ U en masculín "naranchero"

Referencias

[editar | modificar o codigo]
  1. 1 2 3 (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).
  2. ↑ (es) Federico Corriente, María Jesús Viguera Molins: Relatos píos y profanos del manuscrito Aljamiado de Urrea de Jalón. Institución Fernando el Católico, 1990. p 211.

Bibliografía

[editar | modificar o codigo]