Muhammad ibn Mardanix

De Biquipedia
Ir ta: navego, busca
Arabic components (letters) in the word Allah.svg Iste articlo contién transliteracions de l'alfabeto arabe. Ta mas información veyer "Transliteración de l'alfabeto arabe a l'aragonés".
Muhammad ibn Mardanix
Rei d'a Taifa de Murcia

1147 - 1172

Nombre real أحمد المقتدر
Naixencia 1124
Peniscola
Muerte 1172
Murcia

Muhammad ibn abd Allab ibn Sad ibn Mardanis (en arabe أبو عبد الله محمد بن سعد بن محمد بن أحمد بن مردنيش الجذامي, Peniscola, 1124 - †Murcia, marzo de 1172), conoixito por los cristians como Rei Lop u Rei Lupo, d'orichen mozarabe, gosó estar rei de tota la zona oriental de l'al-Andalus.

Descendient d'una familia cristiana mozarabe de la Val de l'Ebro (Mardanis ye l'arabización de Martínez y Ibn Mardanix significa Fillo de Martínez). Esta familia se convirtió a l'Islam esdevenindo uns muladís que a más yeran aristocratas. Lo Rei Lupo pasó a la historia como simbolo de la resistencia de los musulmans nativos hispans contra los musulmans berbers, primero independizando-se de los almorabetz, y dimpués luitando contra los almuades. Tamién pasó a la historia de l'Al Andalus como uno de los hombres més polemicos de lo suyo tiempo, entre atras cosas por lo suyo caracter libertín.

Fraga[editar | editar código]

Ibn Mardanix estió lo zaguer gobernador musulmán de Fraga, y n'heba feito una taifa independient aproveitando disputas familiars entre Zaragoza y Leida.[1] Contando con nomás 25 anyos habió de negociar la rendición de la ciudat con Remón Berenguer IV lo Santo lo 24 d'octubre de 1149, conseguindo un tracto de favor para los musulmans que se i quedoron, como lo que podiesen rechir-sen por las suyas propias leis.

Murcia[editar | editar código]

Ibn Mardanix succedió a lo suyo tío y lo nombroron rei de Murcia. La suya capacidat como estratega li permetió d'esfensar-se en tot inte de los almuades. En tot lo emirato de lo Rei Lupo, Murcia consigue un explendor asaber-lo de gran, tanto que la suya moneda (lo Lopín) se desvién en referent pa tota Europa. La prosperidat de la ciudat se basó en l'agricultura y, aproveitando lo río Segura, se creyó un complexo rete hidrolochico (zaiquas, tuberías, zutes, norias, gallipuents), estando la predecesora de l'actual sistema de reganos de la huerta de la Segura. L'artesanía tamién yera muito important y de gran prestichio, tanto que la ceramica murciana s'exportaba ta las republicas italianas. A tot esto s'ha d'anyadir que en su etapa d'emirato en Murcia bi heba muitos puestos d'ocio y cultura, considerata alavez como capital d'Al-Andalus. N'ixa epoca amaneix en Murcia lo cautivo de la seda, la fabricación de paper y mesmo una especie de fideus de pasta, ditos "aletría".

Edificó un estato poderoso. Compró la paz a los reis cristians con tributos, conseguindo largos periodos de paz. Por eixemplo firmó treguas con Remón Berenguer IV por quatro anyos, renovables por atros quatro dica 1157, quan os aragoneses y barceloneses atacan y pierde Alcanyiz. Las paces con lo sobirán d'Aragón y Barcelona se renuevan en 1161. Estos periodos de paz li permetioron ixamplar y enriqueixer lo suyo reino, y con ixo emitir la debant dita moneda.

Extendió lo suyo reino ocupando Albazet, Exatiba, Denya, Chaén, Baza, Ubeda, Guadix, Carmona, Ecicha y Granada, amenazó Cordoba y plegó a asitiar Sevilla.

Por prebar de prener Cordoba, en 1165 los almuades organizan un exercito en Sevilla con berbers venitos de lo norte d'Africa y refuerzos peninsulars. Ixe exercito sale ta Murcia y ye lo prinzipio de la fin de Ibn Mardanix, que ya dos anyos enantes no heba puesto prener Granada pa cutio a los almuades.

Lo exercito berber días dimpués derrota a l'exercito de lo Rei Lupo y los suyos 13000 cristians on la Val de lo Guadalentín s'achunta con la ribera murciana. Lo emir se refuchió dezaga las murallas de Murcia con las restas de lo suyo exercito y la población civil, pero la huerta y las luxosas villas de los nobles murcians quedoron en mans de los invasors que las malmetioron y escachoron. Tamién malmetioron la residencia que teneba Mardanix en Mont Agut.

Se crebó l'alianza que bi heba entre Ibn Mardanix y lo suyo suegro, o sinyor de Chaén, y doncas nuevas campanyas de los murcians y lurs aliatos pa anexionar-se ixos territorios chienenses que teneban muita importancia economica y estratechica pa defender Murcia.

En 1165, aproveitando l'inte, lo rei Alifonso II lo Casto li ubrió un nuevo frent a las suyas espaldas, abanzando por la cuenca de lo río Blanco y lo río Guadalop (reconquista de lo Matarranya y Teruel capital). Entre 1165 y 1168 os cristians aragoneses y catalans ocupan ya pa cutio las tierras de lo Matarranya, Algars, y por 70 anyos la muga entre cristians y musulmans será lo terreno entre la linia Cantaviella-Penya Roya-Ulldecona y las fortalezas musulmanas de Segorb, Moriella y Peniscola. Pa los musulmans andalusins la perduga de lo Baixo Aragón yera ya pa cutio y n'ixa tierra principió una historia con atra relichión, atra chent y atra cultura. En lo Guadalop y Matarranya, recient conquiestos, només en pocos lugars como Calanda i quedó una población musulmana significativa.

En 1170, y en cercustancias no guaire claras, lo sinyor d'Estella Pero Ruíz d'Azagra consiguió de lo rei Lupo l'antiga Taifa d'Albarrazín, seguntes diz la tesi més aceptata, comprando-la u recibindo-la a cambeyo de la aduya suya.

L'exercito almuade tornó en setiembre de 1171. Tamién fracasoron en lo setio de la capital, pero atras poblacions cambeoron de bando, pasando-se a los almuades una a una, fendo pareixer que preneban lur doctrina y fendo fuera a los melitars y civils cristians (mozarabes). Aguardaban rematar con la guerra y la presión fiscal que levaba dende feba muito tiempo. A la fin quan quasi no li quedaban aliatos, lo rei Lupo morió en marzo de 1172, y los suyos fillos no tardoron en declarar-sen vasallos de los almuades y partidarios de la suya doctrina.

La suya fama estió tan gran que cristians y musulmans encara lo recordarían muitos anyos dimpués de la suya muerte. En lo reinato de Chaime I d'Aragón, quan se conquista Valencia, lo gobernador musulmán yera nieto de Ibn Mardanis y Chaime I li se diriche como tal quan se firma la capitulación:

Nos Jacobus Dei gratia rex Aragonum et Regni Maioricarum Comes Barchinone et Urgelli et Dominus Montispesulani promitimus vobis Zayen regi nete Regis Lupi et filio de Madef quod vos et omnes mauri tam viri quam mulieres qui exire voluerint de Valentia vadant et exeant salvi et securi cum suis armis et cum tota sua ropa mobili quam ducere voluerint et portare secum in nostra fide et in nostro guidatico et ab hac die presenti quod sint extra civitatem usque ad viginti dies elapsos continue

Referencias[editar | editar código]

  1. (es) Ibn Mardanix protector de los fragatinos. La Voz del Bajo Cinca (2007).