Ilesias de Sarrablo

Ilesia de Sant Pero de Larrede.

Se conoixe con o nombre d'ilesias de Sarrablo a un grupo d'ilesias construyidas en a comarca natural de Sarrablo, cuenca alta d'o río Galligo (comarca de l'Alto Galligo, en Aragón), por un regular en a marguin ezquierda, entre os sieglos X y XI seguntes as diversas hipotesis propuestas. En zaguerías d'o sieglo XI y primerías d'o sieglo XII a suya aria d'influyencia s'enampla y, por iste motivo, se construyen ilesias con caracteristicas parellanas en a marguin dreita d'o Galligo, como puet estar o caso d'as ilesias de Sant Fertús de Barós y Santa María y Sant Miguel de Lerés.

En función d'as dos prencipals corrients interpretativas sobre istas ilesias, son consideradas u bien mozarabes construyidas dende o sieglo X por comunidaz cristianas baixo dominio islamico (Antonio Durán Gudiol y l'asociación Amigos de Sarrablo); u bien (seguntes atros historiadors de l'arte d'a Universidat de Zaragoza) prerromanicas u d'un primer romanico d'o sieglo XI surchiu en os inicios d'o reino d'Aragón. En tal caso sería una arquitectura d'una época temprana d'o romanico con elementos de l'arte mozarabe presos de l'arquitectura musulmana y con influyencias d'o romanico lombardo.

Istas ilesias fuoron catalogadas como Molimentos Historico-Artisticos o 29 de setiembre de 1982 (fueras d'a ilesia de Larrede, que ya heba estau reconoixida en 1931) gracias en buena parti a la faina de restauración y difusión de l'asociación Amigos de Sarrablo, fundada en 1971.

Caracteristicas

Baquetons, arquillos ciegos y lesenas en Sant Pero de Larrede.

Por un regular adoptan una sencilla estructura. Tienen una sola nau de forma rectangular y de chicotas dimensions, rematada en un abside semicircular, a la que s'adosa una torre-campanal.

A cabecera u abside gosa decorar-se con un friso superior de gruesos baquetons verticals, baixo lo que apareixen molduradas una serie d'arquerías ciegas. O muro apareixe enforzau por estreitas pilastras (lesenas).

En a parti superior d'a torre s'ubren vanos con dos y tres arcos de ferradura refirmaus en toscas columnas que a vegadas rematan en capitels sin ornamentar. Tanto a puerta d'acceso a o templo como los vanos, istos muit estreitos y de chicotas proporcions a la manera de sayeteras, se gosan enmarcar con un alfiz. Os arcos son de meyo punto u de ferradura zarraus con dovelas irregulars y con frecuencia manca a clau de l'arco lo que da ideya d'o carácter rudimentario d'a construcción.

En istas ilesias ye muit poco frecuent a escultura molimental.

A ilesia de Sant Pero de Larrede ye considerada o prototipo de tot iste grupo arquitectonico homochenio.

Ilesias de Sarrablo y d'a suya aria d'influyencia

Sant Chuan de Busa.

Sant Bertolomeu de Gavín

• Arto (Sant Martín).
• Asieso (Sant Andreu).
• Barós (Sant Fertús).
• Basarán (Sant Miguel y Sant Urbez, tresladada ta o Fornigal).
• Biescas (Sant Chuan de Busa).
• Espierre (Sant Chuan y Santa María).
• Gavín (Sant Bertolomeu, monesterio de Sant Pelai, Santa María, tresladada ta Samianigo).
• Isún de Basa (Santa María).

Sant Pero de Lasieso

• Larrede (Sant Pero).
• Lasieso (Sant Pero).
• Latre (Sant Miguel).
• Lerés (Sant Miguel).
• Oliván (Sant Martín).
• Ordavés (Sant Martín).
• Orna (Sant Miguel).
• Orós Baixo (Santa Olaria).
• Orús (Sant Chuan).
• Otal (Sant Miguel).
• Rasal (Sant Chuan).
• Satué (Sant Andreu).
• Susín (Santa Olaria).
• Xabierre-Latre (Santos Reis).

Referencias

• (es) Arte Mozárabe: Las iglesias serrablesas.
• (es) Iglesias de Serrablo en Arteguías.com.

Bibliografía

• (es) Guía monumental y artística de Serrablo. A. Durán Gudiol y D.J. Buesa Conde. Huesca, Instituto de Estudios Altoaragoneses, 1987.
• (es) Nacimiento del arte románico en Aragón: Arquitectura. J. F. Esteban Lorente, F. Galtier Martí y M. García Guatas. Zaragoza, Caja de Ahorros de la Inmaculada, 1982.
• (es) Las iglesias lombardistas de Aragón y Serrablo. F. Galtier Martí. Zaragoza, 2019.
• (es) Arquitectura románica. Siglos X, XI, XII y XIII. M. Iglesias Costa. Barcelona, Akribós, 1987.
• (es) Enciclopedia del románico en Aragón. Huesca. Volumen I. J.M. Pérez González (dir). Chacetania. Aguilar de Campoo, Fundación Santa María la Real del Patrimonio Histórico, 2006.
• (es) "Serrablo". Samianigo, Amigos de Serrablo. 1977- . Periodicidat trimestral

Vinclos externos

• (es) Gubierno d'Aragón (2021). Iglesias de Sarrablo [aplicación móbil]. Google Play.
• (es) Guía digital del arte románico aragonés.
• (es) Guía del Arte mozárabe en el Serrablo de Huesca en arteguias.com.
• (es) Las iglesias mozárabes de "El Serrablo".
• (es) Mapa interactivo de l'arquitectura mozarabe y romanica de l'Alto Galligo con vínclos a cada molimento.
• (es) El románico del Gállego (1/5), 2/5 3/5 4/5 5/5, www.arquivoltas.com.