Creixita (hidrolochía)

De Biquipedia
(Reendrezato dende Garonada)
Ir ta: navego, busca
A riada d'o Guadalaviar de 1957 en Valencia.

Una creixita ye en hidrolochía un aumento d'o libel y cabal de l'augua d'un curso d'augua continental, especialment d'os ríos, podendo salir d'o cauz, desbordar-se y embadinar de tot u en part a suya ribera u plana d'inundación. A causa d'una riada puet estar una tronada, una estación de plevias u os mayencos. As creixidas recibiban tamién a denominación d'aguaduitos en os textos medievals aragoneses y navarros, especialment si produciban desferras. As creixidas d'os ríos son riadas, as d'os barrancos son barrancadas y as d'as garonas, garonadas.

Riadas[editar | editar código]

As riadas fan part d'a dinamica natural d'os ríos, y producen inundacions de traza natural en a plana d'inundación, plana aluvial, ribera u vega de cada río, contribuindo a la suya formación por sedimentación de materials. Os materials son més gruesos contra més cerca sigamos d'a marguin d'o cauz. Os materials fins tals como as archilas son transportadas por suspensión y sedimentan por tota a plana d'inundación. Os limos y archilas contribuyen a la fertilidat d'o suelo en a ribera, por o que as inundacions representan una fertilización natural d'os suelos agricolas. N'este sentiu son celebres as creixidas d'o Nilo: As creixidas d'o Nilo son mencionadas en os textos antigos y medievals, y se troban en a traducción aragonesa de "La Flor de las Ystorias d'Orient":

el Rio de nill crece vna vegada en el anyo et comiença a crecer mediant agosto et va creciendo entro a la fiesta de sant miguel et quando es crecido ta(n)to como puede la gent de la tierra dexan correr las aguas por las ceq(u)ias et por los lugares ordenados et Riegan todas las encontradas et esta la agua sobre la (a) tierra .xl. dias apres la tierra dessota et la gent siembran et plantan et todos bienes creçen en aquella t(ie)rra por aquella abeuramiento tan solament car en aquellas partidas no plueue ni nieua assi q(ue) apenas conoce hombre estiu ni el yuierno encara los habitador(e)s de egipto tienen vna colona de marmol en medio del Rio de nill en vna chica ysla qui es deuant la ciudat de mesor et han fecho senyales en aq(ue)lla colona et qua(n)do el Rio es creçido tanto como puede ellos guardan en aquellos senyales et segunt que la agua sera crescida ellos sabra(n) si auran abunda(n)c'ia o fretura aquel anyo et sobre aquesto ellos meten preçio alas coses

O risgo d'inundación se produce quan l'hombre ocupa un aria inundable en una plana aluvial, ye por causas antropicas. Historicament as comunidatz humanas ocupaban preferentement as riberas con cautivos y preferiban tener os nuclios de población luent d'o cauz, por d'encima d'o nivel de risgo conoixiu d'inundación, tendendo a quedar os lugars y ciudatz fuera d'as planas d'inundación. En as "Cronicas d'os Chueces de Teruel" bi ha referencia a muito aguaducho d'o río Guadalaviar y os suyos afluents a causa de tronadas de verano u de mayencos:

esti año en el mes de agosto fizo un gran fiblon de agua et travose en la puent del Vado, et embalsose el royo que plegó a Sant Francisco et a la cequia Guadalaviar que nunca vidieron el rio salir tanto. Et la ciudat imbió a valencia un correo por darle avis del aguaducho
1255. Don Romeo Gil. En esti año fueron muy grandes aguaduchos y nieves.

As creixidas de l'Ebro tamién son conoixidas dende antigo, y en a Edat Meya bi ha textos medievals escritos en aragonés que en parlan.

Atra traza de referir-se a las creixidas la trobamos en o "Libro de los Emperadors", ir gran:

et trobo lo aloyado della un rio clamado sp(er)chio et en continent ordeno su aloyament de la otra part del rio contra los enemiguos, mas por q(ue) antes algunos dias auia plouido el dito rio yua gra(n)t et no lo podian passar

Dimpués d'a Revolución Industrial se producioron periodos de desembolique urbanistico incontrolau, con a urbanización masiva d'arias inundables en as ciudatz, zonas turisticas y dica en o medio rural. D'esta traza o risgo d'inundación ye previsible, pero a vulnerabilidat y a exposición ye gran.

Barrancadas, garonadas[editar | editar código]

Gnome-searchtool.svg
Ta más detalles, veyer l'articlo Flash floodveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

As creixidas d'os barrancos reciben a denominación de "barrancadas", y en o caso d'as garonas, "garonadas". Os cauces d'os torrents, barrancos, ramblas u garonas gosan estar secos u quasi secos y levan augua dependendo d'o caso mientres u dimpués de grans tronadas, plevias torrencials, quan a gota frida d'a santmigalada u quan os mayencos primaverals dependendo d'os casos. Tradicionalment l'hombre no ha feito construccions a man de torrents, pero o desembolique urbanistico y turistico incontrolau de ciertos países como Espanya, en especial en Levant ha levau a construir casas, torres, y complexos turisticos chusto en o canal de desaugue u o cono de dechección de muitos torrents.

En os torrents de montanya u en as garonas os aguaduitos se pueden producir dimpués d'una tronada u con o mayenco. En casos de mayencos de gran mida se diz que baixa una "mayencada". Un eixemplo de barrancada en torrents de montanya por causa de tronada estió a trachedia de Biescas.

En o sud y este d'a Peninsula Iberica son tipicas as ramblas, que levan augua dimpués d'una tronada de verano, pero especialment quan as plevias d'a santmigalada, que en os dos casos pueden estar muit intensas. En caso de plevias intensas, y especialment quan as gotas fridas gran cantidat d'augua puede circular por ixos cauces a gran velocidat podendo producir inundacions de sopetón muito periglosas. Os aguaduitos d'as ramblas de Daroca han estau importants en a Edat Meya por o menos dende 1392, por eixemplo en l'anyo 1489 o burdel de Daroca quedó embadinau de tot por l'aguaduito d'a Rambla Fondonera, y un d'ells quedó en a memoria colectiva en a leyenda d'o Ruello d'el Miraglo.

En atros tipos de torrents u barrancos pueden producir-se aguaduitos que causan danyos economicos u humans. En un texto de 1322 provinient de Calatayú parlan de l'aguaducho de la val, que malmetió os reganos d'a Vega d'Albudeha:

depues aca que las ditas pieças ay seydo suyas et tengan aquellas et agora las fronteras de la dita çequia de las ditas pieças sean plenas et irrunadas por el aguaducho de la dita Val, por el qual irrunamiento et enchimiento de las ditas fronteras de la dita çequia del aguaducho de la dita Val, el agua non puedan passar los herederos de la dita vega pora regar sus heredades por la çequia de las fronteras de las ditas pieças de los ditos don Nunno et Matheo Sobrarve, et por la dita raçon prendan et reciban grand danno et menoscabo en los fruytos de las pieças los ditos herederos

Periglosidat[editar | editar código]

A periglosidat d'una creixita depende d'a velocidat d'a corrient y d'o cabal. O cabal dependerá d'a intensidat d'as precipitacions, d'as estacions y d'a infiltración. Estacionalment se parla d'epocas d'estiache quan o cabal ye minimo y epocas de creixida quan ye maximo. Os ríos pirenencos presentan una epoca de creixida en primavera por deschelo dita o mayenco.

O estudio d'as variacions d'o cabal en tota l'anyada se representa en un hidrograma anyal, y comparando diferents diagramas anyals se puet veyer si bi ha un comportamiento regular con a fin de realizar prediccions sobre quan ye més probable que se produgan creixidas.

Atro tipo d'estudios sobre o cabal que se fan son os hidrogramas de creixida, en os que se veye o tiempo de respuesta dende a caita d'a precipitación dica l'inte quan s'observa o cabal punta u maximo. En o caso d'as ramblas y os uadis o tiempo de respuesta ye de pocos minutos y as creixidas producen flash floods u "inundacions lampedo". En a zona prepirenenca as barrancadas dimpués d'una tronada se producen de sopetón auguas enta baixo, con un tiempo de respuesta breu, como se desvinió o 7 d'agosto de 1996 a las 19:00 horas en Biescas quan cayó una precipitación de 160 l/m2 en 45 minutos y l'augua s'entibó en os barrancos de Sías, Betés, y Arás por a existencia en o suyo cauz de piedras y ramas y dimpués baixó a una velocidat de 4 m/s inundando o camping de las Nieves, que yera en un cono de dechección con materials sedimentaus d'atra barrancada pareixita 50 anyadas enantes.

Predicción[editar | editar código]

As mesuras pa predecir as inundacions son as previsions meteorolochicas, os diagramas de variación d'o cabal y fer mapas de risgo.

Prevención[editar | editar código]

As mesuras estructurals son a construcción de diques, l'aumento d'a capacidat d'o cauz, esbarrar cauces, mesuras de conservación d'o suelo y reforestación, construcción d'entibos, y creyación d'estacions de control. A reforestación de Sierras Espuña a zaguers d'o sieglo XIX[1] estió una mesura efectiva pa prevenir as desferras por as creixidas d'o río Segura en a rechión de Murcia.

As mesuras no estructurals son fer modelos de simulación de creixidas, plans de protección civil con sistemas d'alerta, seguros y aduyas publicas y ordinación d'o territorio con restriccions en l'uso d'o suelo dependendo d'o risgo. Con as mesuras no estructurals se reduce a vulnerabilidat.

Ordinación d'o territorio pa prevenir creixidas[editar | editar código]

En a ordinación d'o territorio a lechislación espanyola estableix en o Reyal Decreto 849/1986 que bi ha tres zonas con restricción d'uso d'o suelo:

  • A zona de servitut: una faixa de 5 m d'amplaria a cada marguin d'o cauz, on ye prohibiu de plantar árbols, cautivar plantas y qualsiquier clase de construcción.
  • A zona de policía: a os dos cantos d'o cauz dende a marguin dica os 100 m, a on se puet desvenir una inundación con risgo de 1/100. Se permiten os usos agricolas pero se prohibe qualsiquier alteración d'o releu: construccions de tot tipo, obstaclos que difulten a circulación d'a corrient, graveras, extraccions d'arena, ecetra, de fueras d'una autorización expresa.
  • A zona inundable: qualsiquier part d'a ribera on se puet desvenir una inundación con una probabilidat de 1/500. Bi ha normas de restricción d'uso pero menors que en as anteriors.

Referencias[editar | editar código]

Bibliografía[editar | editar código]

Se veiga tamién[editar | editar código]