Barrancada

Una barrancada^[1]^{[nota 1]} ye una inundación rapida en fondonadas, tierras baixas, barrancos, ramblas, torrents en cheneral, ríos, a causa d'una tronada, huracán, deschelo rapido u causas humanas. As barrancadas u "inundacions lampit" se distinguen d'as inundacions normals por una escala temporal menor de seis horas.^[2] Son comuns en os barrancos, garonas y torrents en cheneral d'os Pireneus. Unatra parola aplicable a istas inundacions en cursos d'augua ye garonada.^[1] En benasqués tamién tenemos a parola botinada^[1] pa dicir o frent d'una creixida que baixa por un cauz seco u que s'anyade a atra corrient por puyar de sopetón o cabal.

En os hidrogramas de creixida d'as barrancadas se veye un periodo de respuesta dende a caita d'as precipitacions dica l'inte cuan s'observa o cabal punta u maximo de pocos minutos, y esto no permite fer sistemas d'alerta eficients pa os plans d'evacuación.

En a zona prepirenenca as barrancadas dimpués d'una tronada se producen de sopetón auguas enta baixo, con un tiempo de respuesta breu, como se desvinió o 7 d'agosto de 1996 a las 19:00 horas en Biescas cuan cayó una precipitación de 160 l/m² en 45 minutos y l'augua s'entibó en os barrancos de Sía, Betés, y Arás por a existencia en o suyo cauz de piedras y ramas y dimpués baixó a una velocidat de 4 m/s inundando o camping de las Nieves, que yera en un cono de dechección con materials sedimentaus d'atra barrancada pareixita 50 anyadas enantes.