Fuesa de Teruel

De Biquipedia
Ir a la navegación Ir a la búsqueda
Envista de la fuesa de Teruel en lo sector cercano a la capital dende lo mirador de Los Mansuetos.

La fuesa de Teruel, fuesa d'Alfambra-Teruel-Mira[1]u fuesa d'Alfambra-Teruel-Ademuz ye una fuesa tectonica que con dirección NNE-SSO que s'ubrió en lo Sistema Iberico en lo Mioceno y continó fundindo-se en lo Plioceno. En la marguin oriental ye en contacto con la sierra d'Escoriuela, la sierra Gorda, la Sierra de Camarena y la sierra de Chabalambre con una falla de gran salto. En la marguin occidental ye en contacto con la sierra Palomera y la sierra d'Albarrazín. En lo sector que bi ha entre la sierra d'Escoriuela y sierra Palomera (fuesa d'Alfambra) presenta una estructura en semigraben[2], encara que baixando dende Teruel deixa d'estar un semigraben y prene forma de fuesa tectonica mes simetrica. Los sedimentos de la fuesa de Teruel son d'edat neochena con cambios laterals de facies entre formacions detriticas y evaporiticas, y un important conteniu paleontolochico con fósils de vertebraus.

Fallas[editar | editar código]

Una falla important en la marguin oriental ye la falla de Pasadera, que en la zona de Garaballa y Mira creba la continuidat d'afloramiento de l'Anticlinal de la Serranía de Cuenca[3].

Los materials neochenos que plenoron la fuesa de Teruel se vioron afectaus por lo fundimiento de la fuesa de Xiloca. La falla de Concut u Caudet ye una muga local entre las dos fuesas y deixa estos materials neochenos de la fuesa de Teruel aflorando en lo bloque levantau.[4]

Sedimentación[editar | editar código]

Los zaguers sedimentos que sedimentoron a lo norte de Villel (Calsineras d'el Paramo de lo Plioceno inferior-meyo), enlazan con la superficie d'erosión fundamental[5] y la han permeso datar: se remató de fer de tot a primers de lo Plioceno superior.

Dimpués bi habió una etapa distensiva a primers de lo Plioceno superior que deformó la superficie d'erosión fundamental y reactivó las fallas de las marguins de la fuesa. Se produció una fondada en la marguin oriental que se plenó con un manto de materials detriticos villafranquians.

Cheomorfolochía[editar | editar código]

En rematar los procesos sedimentarios y tectonicos de lo Plioceno superior encomenzoron a formar-sen glacis. Se reconoixe un amplo glacis de Perals que baixa dende la plana de Visiedo y ye d'edat plio-quaternaria. Atros que se'n formoron estioron lo de glacis de Val de Zebro y lo d'Aldeyuela.

En meyo d'esta topografía de glacis encomenzó a encaixar-se lo rete fluvial de lo río Guadalaviar en tot lo Quaternario. Se formoron atros glacis y faixas fluvials. En l'Alfambra se reconoixe 4 libels de faixas, manimenos en lo Guadalaviar auguas entabaixo de Teruel se'n reconoixe 5.

Los glacis d'Escoriuela y de Val de Zebro y las faixas fluvials de Teruel amuestran deformacions que indican que encara bi ha una actividat tectonica residual.

Los materials calsinosos favoreixerán la formación de muelas por tener más resistencia a la erosión que los materials detriticos, manimenos se veyerán afectaus por procesos de karstificación. Destacan la Muela de Teruel y Penyalba de Bellestar.

Capturas fluvials[editar | editar código]

Toda la cuenca de Guadalaviar amuestra sinyals d'anomalía producto de complexos procesos de captura fluvial[6].

La fuesa de Teruel yera inicialment endorreica u verchent enta lo río Cabriuel, como de feito encara en ye entre Landet y Mira a lo sud de Santa Cruz de Moya. La fundimiento de lo Golfo de Valencia activó la erosión regresiva de los ríos de la versant mediterrania y a zaguers de lo Terciario un d'estos ríos dobló la suya cuenca por un proceso de captura fluvial de la fuesa de Teruel en la redolada de Santa Cruz de Moya[6].

Lo feito que la fuesa de Teruel fuese plena de rocas sedimentarias tobas facilitó lo encaixamiento y la erosión regresiva d'este río y los afluents suyos, producindo-se mes tarde la captura fluvial de l'actual curso alto de Guadalaviar entre los Monts Universals y la sierra d'Albarrazín, que enantes debeba de desauguar enta Xiloca[6].

Referencias[editar | editar código]

  1. (es) Mateo Gutiérrez Elorza: Geologia y Recursos Minerales de la Provincia de Teruel. "Cartillas Turolenses Nº 1". Instituto de Estudios Turolenses. Geologia y Recursos Minerales de la Provincia de Teruel: Cartillas Turolenses Nº 1", pp 44-45.
  2. (es) Mateo Gutiérrez Elorza, José Luis Peña Monné: Las formas del relieve de la provincia de Teruel. "Cartillas Turolenses Nº 7º". Instituto de Estudios Turolenses, 1990. pp 46-48.
  3. (es) Instituto Geológico y Minero de España: Libro Jubilar J.M.Rios. Geología de España Tomo I. Instituto Geológico y Minero de España, 1983. p 516.
  4. (es) Jose Luís Peña Monné et al. : Geomorfología de la Provincia de Teruel. Instituto de estudios turolenses, 1984. p 73.
  5. (es) José Luis Peña Monné, Miguel Sánchez Fabre, María Victoria Lozano Tena: Las formas de relieve de la Sierra de Albarracín. Centro de Estudios de la Comunidad de Albarracín, 2010, pp 43-44.
  6. 6,0 6,1 6,2 (es) Jorge Hermosilla Pla (dir.):Los regadíos históricos del Alto Turia turolense. Generalitat Valenciana, Conselleria de Cultura, Educació i Esport, Universidad de Valencia, 2008. ISBN: 978-84-370-7316-3. p 101.

Bibliografía[editar | editar código]

Se veiga tamién[editar | editar código]