Erosión regresiva

De Biquipedia
Ir a la navegación Ir a la búsqueda
En lo Parque Nacional de Canyonlands (Utat) s'observa la erosión regresiva. La erosión que fa lo riu en la ribera que bi ha dichós de los cinglos se va propagando a traviés de barrancos dica la plana alta y la va fendo cada vegada mes chica dica fer-la desapareixer.

La erosión regresiva ye un proceso d'erosión fluvial que consiste en una erosión de la cuenca hidrografica que se va fendo dende abaixo dica d'alto en sentiu contrario a la circulación de l'augua.

La erosión regresiva encomienza en lo libel de base, y s'adreza poquet a poquet enta lo cabalto de la cuenca hidrografica afondando lo cauz y ixamplando la val con la fin de plegar dica un perfil d'equilibrio en que s'invierte toda la enerchía hidraulica en transportar la carga sedimentaria y en superar lo rozamiento. Lo perfil ideyal d'equilibrio ha de tener una pendient maxima en lo cabalto y una pendient nula en lo cabaixo u libel de base, estando concavo visto dende alto.[1]

Los cambios de libel de la mar en los periodos glacials y interglacials de lo Quaternario han feito que lo libel de base haiga cambiau unas quantas vegadas obligando a los rius a creyar nuevos perfils d'equilibrio. En los periodos glacials lo libel de la mar mes baixo favoreixeba la erosión regresiva y los cauces encomenzaban a afondar-se dende las boqueras. En los periodos interglacials los libels de la mar mes altos favoreixeban la sedimentación. Las actuals Bocas de Kotor (Montenegro) corresponden a foces fluvio-karsticas que se facioron quan los cauces s'afonaban en las boqueras en periodos glacials, que dimpués quedoron baixo lo libel de la mar en l'actual periodo interglacial holocenico.

La erosión regresiva puet facilitar procesos de captura fluvial, como se puet observar actualment en la cuenca hidrografica de Xalón, que creixe a costa de las cuencas de lo Tacho[2] y lo Duero[3].

Referencias[editar | editar código]

  1. (es) Diodora Calvo Aldea, Maria Teresa Molina Álvarez, Joaquín Salvachúa Rodríguez: Ciencias de la tierra y medioambientales. 2º Bachilleraro. 2010. McGraw-Hill, pp 180-181.
  2. (es) Eumenio Ancochea Soto, Francisco Anguita Virella, Fernando Moreno Serrano: Geología Procesos Externos. Editorial Edelvives, 1990. pp 83.
  3. (es) Francisco Pellicer Corellano: El Relieve del Moncayo. Diputación general de Aragón, 1987. p 19, pp 29-31.

Bibliografía[editar | editar código]

Se veiga tamién[editar | editar código]