Glacis

De Biquipedia
Ir a la navegación Ir a la búsqueda

Un glacis ye una superficie de terreno inclinada que se troba sobre tot en las rechions de semontano y a lo piet de los pueyos.

Ye definiu por Foucault y Raoult en lur Diccionario de Cheolochía[1] como:

"Un glacis ye una forma de releu no estructural consistent en una superficie plana y poco inclinada (qualques graus). Seguntes lo suyo orichen se distingue entre:

  • Los glacis d'erosión: en los quals se veye a roca viva sin suelo u bi ha fragmentos que son rapidament retiraus por la erosión. Este termin ye emplegau por un regular en las superficies erosionadas en rocas tovas, que las que se fan en rocas duras se dicen "pedimentos".
  • Los glacis aluvials: a ón la roca madre ye amagaba baixo un espesor d'aluvions gran (glacis d'acumulación) u chicot (glacis d'espardimiento). Los glacis son asobén cruzaus, seguntes la suya pendient por reguers poco profundos ditos rills."

En la toponimia aragonesa bells glacis pueden corresponder a "varellos", atros a "sasos", y si un glacis ye erosionau y despartiu en diferents superficies planas que rematan en ripas, estas superficies planas y poco inclinadas se dicen "coronas".

Los glacis en la Depresión de l'Ebro[editar | editar código]

Los glacis de la Depresión de l'Ebro presentan unas pendients inferiors a lo 2-3 %, son caracteristicos de los semontanos y de los pietz de las muelas y son glacis d'acumulación. Presentan cantals angulosos y de litolochía homochenia por dimanar de los mesmos puestos y por un transporte curto por la mesma augua de plevia u por barrancos. Conectan con las faixas fluvials. Se'n distingue tres libels principals: l'alto, lo meyo y lo baixo.

  • Lo libel alto de glacis enlaza con las faixas fluvials de lo libel T IV y ye lo libel de glacis que a vegadas corresponde a microtoponimos como "saso" u "sarda".
  • Lo libel meyo de glacis enlaza con las faixas T III.
  • Lo libel baixo de glacis empalma con lo libel T II en la mes gran part de los casos y presenta una morfolochía de cono.

A vegadas la erosión quaternaria recient ha feito desapareixer los puestos a on se produciba la contiguidat territorial glacis-faixa fluvial. Por atra part los glacis de libels meyo y baixo s'han desembolicau en puestos a on s'ha erosionau lo libel alto, crebando-li contiguidat.[2]

Referencias[editar | editar código]

  1. Alain Foucault y Jean-François Raoult Diccionario de Geología. Masson, 1985.
  2. Antonio Higueras Arnal (coordinador), Geografía de Aragón Tomo I. Editorial Guara. pp63-64

Veyer tamién[editar | editar código]

Referencias[editar | editar código]

Bibliografía[editar | editar código]

  • Roger Brunet (dir.), Les mots de la géographie, Paris, Reclus-La Documentation française, 1993, ISBN 2110030364, article « glacis », page 242.
  • Max Derruau, Les formes du relief terrestre. Notions de géomorphologie, Paris, Armand Colin, 1969, 2001, édition, ISBN 2200210140