Arctodus simus

Arctodus simus
Reconstrucción de l'aspecto que podió tener un Arctodus simus.
Denominacions populars
Onso de cara curta, onso de morro curto, onso de rostro curto
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Mammalia
Subclase:	Theria
Orden:	Carnivora
Suborden:	Caniformia
Familia:	Ursidae
Subfamilia:	Tremarctinae
Chenero:	Arctodus
Especie:	A. simus
Descripción
Arctodus simus COPE, 1897
Distribución cheografica
Distribución d'A. simus

L'onso de cara curta, de rostro curto u de morro curto (nombre cientifico: Arctodus simus (COPE, 1897)) ye una especie extincta de mamifero placentario d'a familia Ursidae y a subfamilia Tremarctinae que vivió en o Pleistoceno en America d'o Norte, dende fa arredol de 800.000 anyos dica fa 12.500 anyos.^[1]

Ye una d'as dos especies descritas que fan parte d'o chenero extincto Arctodus, en chunto con Arctodus pristinus. Todas desapareixión en o Pleistoceno. O suyo parient vivo mas amanau ye Tremarctos ornatus, l'onso andino.

Descripción

L'onso de rostro curto yera un onso grandismo, o mas granizo que s'ha conoixiu.^[1] Teneban una altaria de 1,60 metros en a cruz d'o lomo, y segurament entre 2,5 y 3 metros d'alto cuan se meteba dreito.^[1] Podeba pesar dica 900 kg,^[1] anque ye probable que a mayoría d'eixemplars estasen menos pesaus, arredol de 540 kg.^[2] As patas son mas largas en comparanza con o cuerpo y puet estar que a complexión corporal estase mas fina que en os onsos ursins.

Os isotopos de Nitrocheno conservaus en os suyos uesos charran d'una dieta por principal carnivora, a cual cosa, posada de conchunta con a suya mida y apariencia, ha contribuyiu a fer una imachen de depredador temible que s'ha visto potenciada por bels documentals y por a prensa divulgativa. Manimenos, as investigacions mas recients demuestran que anque yera un onso mas carnivoro que los actuals, tamién minchaba buena cosa de vechetals.^[3]^[4]

Habitat

L'onso de cara curta vivió en America d'o Norte, dende Mexico dica Alaska, y podió trobar-se en una diversidat d'habitats que iban dende selvas dica las planas centrals d'o que huei ye Estaus Unius. S'ha especulau con que podeba estar un depredador culminal en ixes ecosistemas, anque bels autors han sinyalau que probablement conseguiba la mayor parte d'o suyo alimento fendo de carnucero.^[2]