Vueito (fisica)

De Biquipedia
Ir ta: navego, busca
Articlo d'os 1000
Cambra de vueito.

Se diz vueito, vuido[1] u vuedo[2] a l'ausencia d'aire, atros fluidos y en cheneral de qualsiquier clase de materia. En fisica se define como l'ausencia de materia en un volumen determinato de l'espacio.

En la practica esta condición ye imposible de conseguir de tot. Tanto en la incheniería pa la construcción de maquinas, como en labotatorios pa fer un experimento, lo vueito absoluto no se puet conseguir y alavez se diz vueito parcial. En este vueito parcial las pocas moleculas que i quedan fan una presión sobre las paretes de lo volumen que las comprene. Ye por ixo que este vueito parcial s'expresa en unidatz de presión y a sobén se compara con la presión atmosferica normal (la presión que exerce l'atmosfera a ran de mar). La presión ye, doncas, una traza de mesurar en que grau s'ha conseguito creyar lo vueito en un volumen. La unidat de presión en lo Sistema Internacional de mesuras ye lo Pascal (Pa). Tamién s'expresa en atras unidatz como lo Torr u milimetros de mercurio (mmHg) emplegando la escala barometrica, u tamién como porcentaches de la presión atmosferica en bars u atm (atmosferas).

Etimolochía[editar | editar código]

La denominación de lo vuido fisico como substantivo se fa en muitas luengas romances a partir d'un adchectivo calificativo present en ellas que deriva de lo latín tardano VOCITU, adchectivo que se cheneralizó a costa de l'adchectivo latín clasico VACCUM, que manimenos ha sobreviviu en lo lexico cheografico aragonés en lo substantivo "vago". VOCITU ye un cruce entre lo participio latín VACATUS y l'adchectivo latín VACĪVUS a traviés de la suya variant VOCĪVUS. Manimenos esta variant con "o" no contribuyó a la formación de l'adchectivo aragonés "vacivo" relativo a bestiar que no cría[2] y dreitament derivau de lo latín VACĪVUS como lo cognato castellán vacío.

Ramón Menéndez Pidal considera que VOCITU evoluciona con sincopa ta VŎCTU y dimpués d'acuerdo con la lei fonetica -CT- > -it- da vueito en aragonés, que se troba en gran variedat de textos en aragonés medieval, y que corresponde a la parola asturiana occidental boito (barca sin carga), a lo castellán d'Alava bocho ("clot", "foyo") y a l'occitán gascón vueit (que en occitán coexiste con atras formas prou chenerals como vuèg u void).

Atra forma que se presenta en aragonés medieval y que plega a cheneralizar-se a costa de l'anterior ye vuido, manimenos no se documenta actualment que en la parla catalana de transición a l'aragonés de Peralta de la Sal. Ye la variant vuedo la sola que sobrevive d'este conchunto en aragonés, por lo menos en benasqués[2], en conexión con l'occitán aranés vued, ued. Las formas vuedo y vuido se pueden explicar dende VOCITU por sonorización de la oclusiva xorda intervocalica latina -T- (que ye común en aragonés), y por perduga de la -C- intervocalica debant de E, I, que no ye guaire común en aragonés pero que teoricament puet dar-se en benasqués, y fa part de las leis foneticas de lo catalán. De feito Bernard Pottier y Ramón Menéndez Pidal consideran que buydo ye un catalanismo,[1] pero sin parar cuenta que en occitán tamién existe void.

En lo castellán de lo sieglo XVI d'Aragón ye documentau l'uso de vuido como substantivo abstracto en Daroca[3]:

Primerament, han de obrir la paret de la iglesia dentro y de fuera entro la puerta principal y Santa Caterina a donde esta la sepultura del Sennor Merino que Dios aya, que terna lo buydo quatro codos poco mas o menos en anplo y de alto vint y quatro palmos de alto de coudo.
Item mas, que la dicha capilla o buydo della que se pique de manera que quede muy quadrada y enpues todas las paredes espalmadas de algez.
y a la parte de dentro se faga de media regola con sus travas dexando el buydo pora donde se a asentar todo el retablo y a su mesura.

Creyar vueito[editar | editar código]

Pa creyar lo vueito d'una traza simpla se parte d'un cierto volumen, zarrato hermeticament, y s'expande, creyando un vueito parcial dentro lo volumen. Eixemplos d'este sistema se dan: en los pulmons respirando, que s'expanden y creyan un cierto vueito dentro d'ellos (la esferencia de presión dentro y fuera de los pulmons i fa entrar l'aire), y tamién pa aspirar, absorber y succionar. Lo mesmo principio s'emplega en maquinas como l'aspiradora u bombas d'aire.

Tamién se puet fer un uso d'una bomba d'aire pa extrayer l'aire dentro una cambra de vueito. A mesura que se va extrayendo l'aire quedan menos moleculas que espenten contra las paretes de la cambra, con lo que se reduce la presión de lo suyo interior. D'esta traza se puet conseguir un buen vueito, pero a causa de las fuyitas, efectos d'evaporación y sublimación en las paretes de la cambra y los atros elementos este nunca no será perfecto.

Atros tipos de vueitos[editar | editar código]

Antiparte de lo vueito creyato artificialment, bi ha tamién vueitos creyatos por la naturaleza. Este ye lo caso de lo vueito en lo espacio exterior. La presión en lo espacio ye muito chicota y se puet dicir que lo vueito ye quasi perfecto. Con tot y con ixo bi ha bellas particlas en lo espacio y no se puet dicir doncas que siga perfecto. Dentro lo sistema solar, la més gran parte d'estas particlas provienen de lo Sol, ye lo que se clama viento solar. Este viento solar se composa en la suya més gran parte de fotons, pero tamién de protons y helio, components principals de la corona solar.

Los vueitos en la mecanica quantica[editar | editar código]

Si clasicament ye dificil d'obtener un vueito perfecto a causa de las fuyitas, efectos d'evaporación y sublimación, la mecanica quantica estableixe que las paretes que delimitan lo vueito irradian fotons como conseqüencia de la radiación de cuerpo negro.

Por atro costato, seguntes la teoria quantica de campos, la enerchía de lo vueito nunca no puet estar zero. Esto ye por las fluctuacions de lo campo. Estas fluctuacions, clamatas fluctuacions de lo vueito, tienen una vida muito curta y las fa la mesma creyacion y desaparición de particlas virtuals.

Lo pleno total ye l'antitesi de lo vueito y tamién ye inabastable.

Referencias[editar | editar código]

  1. 1,0 1,1 (es) Bernard Pottier, Pilar García Mouton: La evolución de la lengua aragonesa a fines de la Edad Media. Archivo de filología aragonesa, ISSN 0210-5624, Vol. 38, 1986 , pp 225-240 [1]
  2. 2,0 2,1 2,2 (es) Angel Ballarín Cornel: Diccionario del benasqués. Zaragoza, 1978. p 69, p93.
  3. (es) María Luz Rodrigo Esteban: La ciudad de Daroca a fines de la Edad Media. Selección documental (1328-1526). Colección "Documentos para la historia de Daroca y su comunidad", nº 3. Centro de Estudios Darocenses