Mesura

De Biquipedia
Ir ta: navego, busca
Articlo d'os 1000
Medición d'o diametro con un calibre.

Una mesura ye un valor numerico u magnitut de bell atributo fisico d'un obchecto, como por eixemplo a longaria, a capacidat, o volumen u o peso, obtenito por experimentación a traviés de metodos empiricos y exprisato seguntes uns patrons, as unitatz de mesura, determinatas por bella norma estandar, como pueden estar o metro, o litro u o kilogramo. O termin tamién s'emplega ta decir o proceso ta obtener o valor d'una determinata magnitut.

A metrolochía ye a branca d'a sciencia que s'ocupa d'o estudeyo d'as mesuras y o establimiento d'os patrons de mesura, asobén fundamentatos en determinatos fenomens fisicos. O proceso de mesura embreca asobén a utilización d'instrumentos de mesura, como un regle u cinta metrica, una balanza, un barometro, un amperimetro u un velocimetro. Istos instrumentos han estato calibratos por comparanza con un patrón u unidat de mesura. A más de caracteristicas fisicas como a distancia, a enerchía, o tiempo u a cantidat de materia tamién se pueden mesurar atros aspectos como as aptitutz d'as presonas u as suyas percepcions, asinas as encuestas u os tests psicotecnicos tamién pueden estar consideratas formas de mesura.

A mesura d'una determinata magnitut ye una estimación y leva asociata siempre a presencia d'una error, siempre bi ha un cierto grau d'incerteza. Por tanto, a reducción d'a incerteza será un d'os prencipios fundamentals con o que treballará la metrolochía. Se considera que as errors de mesura presentan una distribución normal arredol d'o valor real d'a magnitut mesurata, baixo ista suposición cada mesura tendrá tres components:

  • o valor estimato.
  • o marguin d'error u d'incerteza.
  • o nivel u intervalo de confianza, a probabilidat de que o valor estimato sía aintro d'a marguin d'error.

A mesura ye un concepto fundamental d'a sciencia, ye un d'os principios que la caracterizan y la diferencian d'a pseudosciencia. Ye relativament fácil construir una teoría sobre aspectos d'a naturaleza, pero ye muit dificil fer-lo seguindo lo metodo scientifico que leva asociata la necesidat de prener mesuras con gran precisión. A mesura tamién ye fundamental en os campos como a industria, o comercio, a incheniería, a construcción u a electronica.