Naturaleza
De Biquipedia
A naturaleza encluye tot lo que esiste en l'uniberso, e que no ye artifizial u imachinario. En o suyo sentito más amplo, equibale á lo conchunto d'o cosmos, de l'uniberso esistent, lo que abraca dende particlas subatomicas dica os ochetos astronomicos, encluyendo-ie a Tierra, os sers bibos e os prozesos que se i relazionan.
O termín "naturaleza" fa referenzia á los fenomens d'o mundo fesico, e tamién á la bida en cheneral. Por un regular no encluye os ochetos artifizials ni a interbenzión umana. En un sentito más restrinchito, se gosa emplegar o termín ta referir-se á lo meyo ambient.
[editar] Etimolochía e senificato
A parola "naturaleza" probiene d'o latín natura, que senifica "o curso d'as cosas, o carauter natural".[1] "Natura" ye a traduzión latina d'a parola griega physis (φύσις) –d'on, entre atras, en deriba la parola fesica–, que en o suyo senificato orichinal feba referenzia á la forma innata en a que crexen espontaniament plantas e animals, á las suyas carauteristicas intrinsecas.[2] Asinas aparixe en o primer uso escrito d'o termín physis que fue emplegato por Omero, e fa referenzia á las cualidaz intrinsecas d'una planta.[3]
O sentito d'a parola naturaleza, en latín, se relaziona con o naximiento. A conzezión latina ye a de "mai naturaleza", ye un simbolo que tien relazión con a bida en un sentito muit amplo. Dibersas culturas han representato iste conzeuto con dioses. Manimenos, o conzeuto de naturaleza como un tot que s'identifica con l'uniberso fesico ye un conzeuto que ha estato encorporato más rezientment como consecuenzia d'o desembolique d'a zenzia moderna, con un uso cada begata más amplo en os zaguers sieglos.[4][5]
Aintro d'os dibersos usos que autualment se'n fa d'o termín, cuan se parla de "naturaleza" se puet fer referenzia á lo dominio cheneral, á los reinos en que se clasifican dibersos tipos de sers bibos, como as plantas u os animals. En bels casos se refiere á prozesos asoziatos con ochetos inanimatos: a forma en a que esisten os dibersos tipo de cosas e os suyos cambeyos espontanios, como l'orache, a cheolochía d'a Tierra, a materia e a enerchía que tienen toz istos entes.
Naturaleza á sobent tien o senificato d'entorno natural, que engloba animals salbaches, piedras, selbas, plachas e, en cheneral, totas as cosas que no han estato alteratas de traza sustanzial por o ser umán, u que persisten á tamas d'a interbenzión umana. Iste conzeuto más tradizional d'as cosas naturals embreca una distinzión entre lo que ye natural e lo que ye artifizial, entendendo que iste zarguer conzeuto como cualsiquier cosa elaborata por o conoximiento umán.
[editar] Referenzias
- ↑ (en) Nature. Harper, Douglas. Online Etymology Dictionary
- ↑ Se puet trobar informazión sobre l'uso d'o conzeuto por parti d'os presocraticos, encara que de traza una mica erratica, en Naddaf, Gerard: The Greek Concept of Nature, SUNY Press, 2006. L'uso d'a parola φύσις, feita serbir por Omero en relazión á una planta, yera emplegata pels filosofos griegos ya dende antigo, e en dibersos sentitos que, por un regular, son parellans á lo sentito autual, como confirma Guthrie, W. K. C.: Presocratic Tradition from Parmenides to Democritus (volum 2 History of Greek Philosophy), UP, 1965.
- ↑ "ὣς ἄρα φωνήσας πόρε φάρμακον ἀργεϊφόντης ἐκ γαίης ἐρύσας, καί μοι φύσιν αὐτοῦ ἔδειξε". (Asinas parló, Argeifontes [=Ermes] mientres me daba la yerba, prenendo-la d'a tierra, e amostrando-me a suya naturaleza.) Odissea 10.302-3 (ed. A.T. Murray). Tamién en Liddell i Scott: Greek Lexicon. Ta atros usos posteriors pero muit antigos d'o termín griego, se beiga lo que se comenta más entabant.
- ↑ Por exemplo, a obra d'Isaac Newton, Philosophiae Naturalis Principia Mathematica (1687) ye traduzita como "Mathematical Principles of Natural Philosophy", e reflexa l'uso abitual d'as parolas "natural philosophy" -filosofía natural-, parellán á un "estudeyo sistematico d'a naturaleza"
- ↑ A etimolochía d'a parola "physical" -fesica- endica o suyo uso como sinonimo de "natural" ya á meyatos d'o sieglo XV: Physical. Online Etymology Dictionary. Harper, Douglas
