Bada cheneral europea de 2012

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Cartel d'a bada cheneral 14N

A bada cheneral europea u bada cheneral iberica de 2012 (mas conoixita por as siglas de 14-N) ye una vada cheneral convocata ta o miércols 14 de noviembre de 2012 en primeras por cuantas organizacions sindicals espanyolas, a la que adhibioron atros sindicatos y colectivos europeus.

Por primera vegada en a historia d'a Unión Europea se convocó simultaneament una chornada d'atures en diferents estaus con una reivindicación común. Chipre, Malta, Portugal, Italia y Espanya vivioron una chornada de bada cheneral que fue refirmata con movilizacions en Francia, Grecia y badas sectorials en a Belchica francofona.

En Aragón convocoron a bada os prencipals sindicatos d'o país como SOA-STA, CATA, IA, CNT y CGT (amás d'as centrals estatals de CCOO y UGT) y la refirmoron organizacions como Puyalón, Purna , A clau roya y A Enrestida

A bada en Aragón

Cartel de Purna refirmando a bada.

A bada cheneral se desembolicó en Aragón con un seguimiento total d'un 75% seguntes os sindicatos y "prou baixo" seguntes os gubiernos espanyol y aragonés.

As manifestacions se pudioron sentir por as carreras d'as prencipals localidaz d'o país. En Zaragoza a manifestación convocata por os sindicatos CGT, CNT, SOA, CATA y Intersindical d'Aragón y organizacions como a "Plataforma Stop Desahucios" salió a las 18:00 dende a Plaza Reina Sofía. Una hora dimpués, a las 19:00 salió dende a Plaza Paraíso de Zaragoza un atra manifestación convocata por UGT y CC.OO. Seguntes os líders sindicals estioron 200.000 personas as que facioron parti d'a manifestación de Zaragoza, estando asinas a mas gran desde as manifestación contra o Plan Hidrolochico Nacional.

En Uesca bi habió una manifestación con mas 6.000 personas baixo o lema "Nos deixan sin futuro. Bi ha culpables. Bi ha solucions" y en Teruel, se facioron dos manifestacions, a de UGT y CC.OO, y una atra convocata por o "Bloque Critico". Atras ciudaz con manifestacions importants estioron Monzón, Casp, Alcanyiz u Exeya.

O seguimiento d'a bada en as prencipals empresas con seu en Aragón estió important, prencipiando ya de nueiz en os prencipals poligonos industrials.. L'ature en Opel estió total con a fabrica zarrata de raso fueras d'os servicios minimos. En atras empresas como Johnson Controls (80% de seguimiento) u HP (90%) o seguimiento tamién estió gran.

A chornada de bada se notó tamién en a Universidat de Zaragoza, a on os campus de Sant Francisco y o Río Ebro amaneixioron vuedos de tot y con piquez informativos de diferents organizacions politicas, sindicals y estudiantils. Se rechistroron bel par d'incidents en a Facultat de Dreito y a Biblioteca María Moliner sin mayors consecuencias, manimenos a mayoría d'estudiants decidioron no ir a clase. Bels millars de personas perteneixients a o colectivo estudiantil facioron una manifestación de maitins por as carreras d'a capital aragonesa en favor d'a educación publica. Tamién bi habió concentracions en a frontera d'o Paraninfo d'a Universidat de Zaragoza.

Vinclos externos

• Se veigan as imáchens de Commons sobre a bada cheneral europea de 2012.

• Datos: Q3572286
• Multimedia: 2012 November 14 European Strike / Q3572286