Bueito (fesica)

De Biquipedia

Se diz bueito á l'ausenzia d'aire, atros fluidos y en cheneral de cualsiquier clase de materia. En fesica se define como l'ausenzia de materia en un bolumen determinato de l'espazio.

En la prautica esta condizión ye imposible de conseguir de tot. Tanto en la incheniería pa la costruzión de maquinas, como en labotatorios pa fer un esperimento, lo bueito absoluto no se puet conseguir e alabez se diz bueito parzial. En este bueito parzial las pocas moleculas que i quedan fan una presión sobre las paretes de lo bolumen que las comprene. Ye por ixo que este bueito parzial s'espresa en unidaz de presión e á sobén se compara con la presión atmosferica normal (la presión que exerze l'atmosfera á ran de mar). La presión ye, doncas, una traza de mesurar en que grau s'ha conseguito creyar lo bueito en un bolumen. La unidat de presión en lo Sistema Internazional de mesuras ye lo Pascal (Pa). Tamién s'espresa en atras unidaz como lo Torr u milimetros de mercurio (mmHg) emplegando la escala barometrica, u tamién como porzentaches de la presión atmosferica en bars u atm (atmosferas).

[editar] Creyar bueito

Pa creyar lo bueito d'una traza simpla se parte d'un zierto bolumen, zarrato ermeticament, e s'espande, creyando un bueito parzial dentro lo bolumen. Exemplos d'este sistema se dan: en los pulmons respirando, que s'espanden e creyan un zierto bueito dentro d'ellos (la esferenzia de presión dentro e fuera de los pulmons i fa entrar l'aire), e tamién pa aspirar, absorber e suzionar. Lo mesmo prinzipio s'emplega en maquinas como l'aspiradora u bombas d'aire.

Tamién se puet fer un uso d'una bomba d'aire pa estrayer l'aire dentro una cambra de bueito. A mesura que se ba estrayendo l'aire quedan menos moleculas que espenten contra las paretes de la cambra, con lo que se reduze la presión de lo suyo interior. D'esta traza se puet conseguir un buen bueito, pero á causa de las fuyitas, efeutos d'esbaporazión e sublimazión en las paretes de la cambra e los atros elementos este nunca no será perfeuto.

[editar] Atros tipos de bueitos

Antiparte de lo bueito creyato artifizialment, bi ha tamién bueitos creyatos por la naturaleza. Este ye lo caso de lo bueito en lo espazio esterior. La presión en lo espazio ye muito chicota e se puet dizir que lo bueito ye cuasi perfeuto. Con tot e con ixo bi ha bellas particulas en lo espazio e no se puet dizir doncas que siga perfeuto. Dentro lo sistema solar, la més gran parte d'estas particulas probienen de lo Sol, ye lo que se clama biento solar. Este biento solar se composa en la suya més gran parte de fotons, pero tamién de protons e elio, componens prinzipals de la corona solar.

[editar] Los bueito en la mecanica cuantica

Si clasicament ye difizil obtener un bueito perfeuto á causa de las fuyitas, efeutos d'ebaporazión e sublimazión, la mecanica cuantica establexe que las paretes que delimitan lo bueito irradian fotons como consecuenzia de la radiazión de cuerpo negro.

Por atro costato, seguntes la teoria cuantica de campos, la enerchía de lo bueito nunca no puet estar zero. Esto ye por las flutuazions de lo campo. Estas flutuazions, clamatas flutuazions de lo bueito, tienen una bida muito curta e las fa la mesma creyazion e desaparizión de particulas birtuals.

Lo pleno total ye l'antitesis de lo bueito e tamién ye inabastable.