Arte romanico

L'arte romanico estió l'estilo artistico predominant en Europa mientres os sieglos XI, XII y parti d'o XIII.

L'arte romanico estió un arte cristiano, como agrupación de bels estilos diferents que heban estau emplegaus en l'Alta Edat Meya (romanos, prerromanos, bizantins, chermanicos, arabes...), que plegó a unificar bellas trazas comuns a totas as suyas manifestacions. No estió pas producto d'una evolución local u vinclada clarament a una nacionalidat concreta, sino que se produció arredol de bels países, como Francia, Alemania, Italia u Espanya. En cadagún d'istos paises apareixió con matices propios, pero en toz éls se i manifestaban trazas comuns que fan d'o romanico o primer estilo artistico internacional d'ambito europeu.

Dica o sieglo VIII, bellas fitas historicas fación posible que s'extendillase un esviellamiento d'a cultura europea: A puyada a lo trono d'os Capetos en Francia, a consolidación d'o cristianismo, l'encomienzo d'a reconquiesta en a Peninsula Iberica, y fundamentalment, a naixencia d'as luengas romances arredol d'o viello Imperio Romano, son as fitas que marcón iste surtimiento.

Sindembargo, iste estilo artistico no puede considerar-se coderent dica arredol de l'anyo 1000, cuan una corrient d'expansionismo cultural, y prou acomboyau d'una bonanza economica, fizo d'as sociedaz europeas occidentals puestos d'ebullición cultural, y una creiximiento demografico prou important obligó a xarticar nuevas tierras nuevas ta l'agricultura, menó a la producción de grans excedents de producción que levaban enta la ubertura de viellas rotas comercials arredol d'o continent europeu, o que portaba asociada a ubertura de camins de pelegrinación y comunicación cultural. En ixas envueltas, pues, tota Europa se trobaba capuzada en una fiebre de construcción; yera a hora an que s'heba pronunciau un nuevo estilo de construcción: o Romanico.

O termin romanico, como vocable que fa referencia ta l'estilo artistico, fue emplegau por primera vegada en 1820 por De Grabille, incluyindo en iste termin tot l'arte que se i feba antis de l'arte gotico, dica la cayida de l'Imperio Romano d'Occident, por analochía con o termin "luengas romanicas"; asinas, l'arte romanico substituye l'arte antigo d'a mesma manera que as luengas romances substituyoron o latín.

Posteriorment, l'acepción d'o termin romanico se restrinchió ta l'arte que se feba en Europa Occidental en os sieglos XI y XII, encara que hue bi ha bellas discrepancias arredol d'a exactitut de l'espacio y d'os tiempos que cubrió iste estilo.

ta la definición d'iste estilo arquitectonico, ye fundamental a reforma que fació a orden monacal cluniacense, como resultau d'una revisión en profundidat d'as órdens benedictinas. O monesterio de Clunyego, en Francia, establiu en 930, se convertió en ista epoca en o mas gran difusor d'ista reforma, fendo-ne una gran expansión y conseguindo que a traviés d'os suyos monesterios l'arte romanico se difundise por toda l'Europa cristiana.

*Caneciellos* en a ilesia de **Sant Chuan Baptista**, de Villanueva de la Nía, Cantabria.

Antes que Clunyego no capitalizase o estendillamiento d'o romanico, ya s'heba desembolicau en a rechión italiana de Como, igual como en os Pireneus espanyols y franceses, o que s'ha clamau Primer Romanico, especialment en o Pireneu catalán (provincias como Lleida u Chirona) y aragonés, an se troban muitos eixemplos (fundamentalment en Uesca) de construccions d'iste sub-estilo caracteristico. Os mayestros de Como, con os suyos apariellos de madonería, a estructura d'una nau con as suyas populars "bandas lombardas", igual como as primeras vueltas de canón d'as ilesias aragonesas y catalanas, posaron as bases ta un rico desembolique de l'arquitectura romanica:

Piedra escuairada.
Cabezeras de semitambor, garlanadas con arquez y bandas ritmicament disposadas.
Templos cuvillaus por vueltas de canón y forno.
Naus amplas y alzadas, en comparanza con os antigos edificios prerromanicos.
Pilonas como suporte.
Escasa o denguna figuración escultorica.

A epoca dorada d'o estilo, por a suya calidat y firmeza, s'estendilló ta la zaguera metat d'o sieglo XI y a primera d'o sieglo XII, plegau dende Francia y transmeso fundamentalment a las comarcas que trescruza o Camín de Sant Chaime. As caracteristicas d'iste tiempo estioron: