Venezuela

Republica Bolivariana de Venezuela República Bolivariana de Venezuela
(En detalle) (En detalle)
Lema nacional:
Himno nacional: Gloria al Bravo Pueblo
Situación Venezuela
Capital  • Población  • Coordenatas	Caracas 5.329.355 10°30′ N 66°58′ O
Mayor ciudat	Caracas
Idiomas oficials	Español
Forma de gubierno President Vicepresident	Republica Federal Delcy Rodríguez (interina) [[]]
Independencia Declarada Reconoixida	d'Espanya 5 de chulio de 1811 30 de marzo de 1845
Superficie  • Total  • % augua Mugas	Posición 33º 916.445 km² 0,3% 4.700 km
Población  • Total  • Densidat	Posición 37º 28.384.132 30 hab/km²
PIB (PPA)  • Total (2008)  • PIB per capita	Posición 31º US$ 379.765 millons US$ 13.365
Moneda	Bolívar (VEF)
Chentilicio	Venezolano/a
Zona horaria	UTC-4
Dominio d'Internet	.ve
Codigo telefonico	+58
Prefixo radiofonico	YVA-YYZ / 4MA-4MZ
Codigo ISO	862 / VEN / VE
Miembro de: ONU, OEA, Mercosur, CSN, OPEP, OMC, ALADI, SELA, G77

A Republica Bolivariana de Venezuela ye un estau que se troba situau en o norte d'America d'o Sud. O territorio venezolano incluye, amás, diversas islas localizadas en a mar Caribe. Venezuela muga con Guyana a l'este, Brasil a lo sud, y Colombia a l'ueste. As islas de Trinidad y Tobago, Grenada, Santa Lucia, Barbados, Curaçao, Bonaire, Aruba, Sant Vicent y as Granadinas y as Islas de Sotavento que se troban amán d'a costa venezolana.

Historia

Sieglo XXI

O 3 de chinero de 2026, avions y tropas de l'exercito estausunidense atacan Venezuela y secuestran a lo suyo president, Nicolás Maduro, y a la suya muller, anunciando que serán chuzgaus por narcotrafico. Ixe mesmo día lo Tribunal Supremo de Justicia de Venezuela anunció que Delcy Rodríguez, dica l'inte vicepresidenta de Venezuela, esdievendrá presidenta interina lo luns 5 de chinero.

Cheografía fisica

Venezuela ye situada en l'Hemisferio Norte, encara que l'extremo meridional continental se troba muit amán d'a linia d'o ecuador terrestre. O suyo territorio continental ye integrau por una masa compacta que s'estendilla d'este enta ueste y que perteneixe a la placa sudamericana; o territorio insular comprende un conchunto d'archipelagos, islas y isletas d'a mar Caribe. Por a suya cheografía bi ha una gran diversidat de recursos naturals, prencipalment enercheticos y minerals, y tamién una gran diversidat d'especies y ecosistemas.

O país muga a lo norte con a mar Caribe u mar d'as Antillas, con una longaria de costa de 2.813 km; tien mugas maritimas con as auguas territorials de Trinidad y Tobago, as Antillas Neerlandesas, Grenada, Puerto Rico y as Islas Vírchens. Comparte 2.050 km de muga terrestre con Brasil a lo sud; 743 km a l'este con Guyana y 2.250 km a l'ueste con Colombia.

Relieu

O relieu venezolano abarta tres unidaz cheograficas, que son d'ueste enta este:

• as cordeleras septentrionals andinas.
• as planas (llanos) de l'Orinoco.
• o sector occidental de l'altiplán de Guayana.

O Salto del Ángel, o salto d'augua mas alto d'o mundo.

Os Andes septentrionals se bifurcan en dos cadenas montanyosas, que se creyoron mientres a Era terciaria, que se deseparan en l'extremo norte d'a sierra oriental colombiana. A cadena occidental ye constituyida por a sierra de Perijá en a muga con Colombia, que tien una altaria maxima de 3.750 m. A cadena oriental forma la sierra de Mérida, que tien una altaria maxima de 4.980 m en o Pico Bolívar, o punto mas alto d'o país. Istas dos cadenas rodian a depresión d'o laco de Maracaibo, que con 13.280 km² ye lo mas gran d'America d'o Sud. O laco ocupa una ampla depresión ubierta a lo golfo de Venezuela. O suyo subsuelo tien numerosas reservas d'hidrocarburos. Entre lo laco de Maracaibo, a sierra de Mérida y a mar Caribe se troban as sierras y as vals fundas (hondonadas) d'o sistema Lara-Falcón formau por tres aliniacions orograficas orientadas de sud-ueste ta nord-ueste. Enta l'este, a rechión montanyosa venezolana s'estendilla y rodia una vegada mas a costa d'o Caribe, formando lo sistema montanyoso d'o Caribe, que tien una altaria maxima de 2.765 m en o Pico Naiguatá y que ye formau por a sierra d'o Caribe y a sierra d'o Interior, as dos orientadas d'este enta ueste, y en meyo d'ellas se troba la depresión d'o laco de Valencia. A la fin, a l'este d'o sistema montanyoso d'o Caribe se troba lo macizo de Cumaná, que forma las peninsulas d'Araya y Paria entre os golfos de Caraico y Paria.

A rechión d'as planas de l'Orinoco ocupa la depresión central que s'estendilla entre las montanyas andinas a lo nord-este y la val de l'Orinoco a l'este y a lo sud y que rodía a l'altiplán de Guayana. Ye integraa por una gran plana que fue cubierta por a mar en epocas historicas antigas, y que ha dau orichen a los chacimientos d'hidrocarburos. A l'este y a lo sud de l'Orinoco se troba l'altiplano de Guayana que, debiu a l'erosión, ha creyau un relieu secundario de chicoz serratos, que puyan a moniquet dica formar a muga con Brasil en a cadenas montanyosa de Tairapecó, Parima y Pacaraima; estando lo mont Roraima, con 2.810 o punto mas alto.

Delta de l'Orinoco, Parque Nacional Mariusa.

Hidrografía

Fauna acuatica de Venezuela.

Venezuela tien una gran cantidat de recursos hidricos. O 74,5% d'as auguas fluvials desembocan en l'oceano Atlantico, un 20,7% en a mar Caribe y o 4,5% s'unen a lo río Amazonas. Un chicot porcentache desembocan en a cuenca endorreica d'o laco de Valencia. Asinas, tres cuatrenas partis d'o país perteneixen a la cuenca de l'Orinoco, que desemboca en l'Atlantico a traviés d'un gran delta. Ye lo tercer río mas cabaludo d'America d'o Sud. Os afluents mas importants de l'Orinoco son o Ventuari, o Caroní, o Cauri, l'Aro, o Guaviare, o Vichada, o Meta y l'Apure. Una parti d'as auguas de l'Orinoco rematan en l'Amazonas por meyo d'a canal natural de Casiquiare que comunica con o río Negro. D'atra man, os ríos mas importants d'a cuenca d'a mar Caribe desembocan en o laco de Maracaibo: Cotatumbo, Escalante y Chamba, curtos y cabaludos.

Fauna

A fauna bi ye diversa y abundant, con presencia de mamifers caracteristicos d'a zona tropical. Venezuela ye un d'os países con mayor variedat d'especies d'aus. Os reptils i son tamién nombrosos, y se i troba una gran variedat de peixes. En 2004 i existiban 219 especies en periglo d'extinción, entre ellas o Thripophaga cherriei.

Clima

Venezuela se troba de tot en os tropicos sobre l'ecuador a arredol de 12° N. O suyo clima varía dende planas humidas de baixa elevación, a on as temperaturas promeyo anyals alcanzan os 35 °C, dica cheleras y tierras altas (os sasos) con una temperatura meya anyal de 8 °C. A precipitación anyal varía de 430 mm en as partis semiaridas d'o nord-ueste a mas de 1.000 mm en o delta de l'Orinoco en o cabo este y la chungla amazonica en o sud. Lo livel de precipitación ye mas baixo en o periodo dende agosto dica abril. Unatra caracteristica d'o clima ye ista variación en tot o país per a existencia d'una cadena montanyosa denominada cordelera d'a Costa que trescruza lo país d'este enta ueste. A mayoría d'a población vive en istas montanyas.

O país se divide en cuatro redoladas de temperatura horizontals basadas sobretot en a elevación. En a redolada tropical, per debaixo d'os 800 m d'altaria, as temperaturas son calidas, con promeyos anyals que oscilan entre 26 y 28 °C. A rechión templada oscila entre 800 y 2.000 m d'altaria con promeyos de 12 a 25 °C; muitas d'as ciudaz de Venezuela, incluyida la suya capital, se troban en ista rechión. As condicions mas fredas, con temperaturas de 9 a 11 °C, se troban en a redolada freda entre 2.000 y 3.000 m d'altaria, especialment en os Andes, an os feners y os campos de nieu permanent con promeyos anyals per debaixo de 8 °C cubre la tierra per dencima d'os 3.000 metros en os sasos.

A temperatura mas alta rechistrada estió de 42 °C en Machiques, y la temperatura mas baixa rechistrada estió de -11 °C; s'ha informau dende una gran altaria deshabitada en Páramo de Piedras Blancas (en l'Estau Mérida), encara que no existen reportes oficials, se conoixen temperaturas mas baixas en as montanyas d'a Sierra Nevada de Merida.

Organización politico-administrativa

Venezuela ye dividida politicament y administrativa en 23 estaus, 1 districto capital, 1 dependencias federales (72 islas) y 1 territorio reclamau (Guayana Esequiba).

¹ Territorio reclamau por Venezuela (perteneixient actualment a Guyana).

Politica y gobierno

Venezuela ye un estau democratico y social de Dreito y de Chusticia con forma d'estau Federal. En 1999 con a nueva Constitución s'establioron cinco poders publicos nacionals: o poder executivo, lechislativo, chudicial, electoral y ciudadán. O poder executivo domina l'estructura de gubierno nacional, o president ye esleyiu ta un periodo de 6 anyadas, exerce a la vez como chefe d'o estau y d'o gubierno. O Parlamento de Venezuela, dito Asemblea Nacional, ye composau por 167 deputaus. En o poder chudicial existe lo Tribunal Supremo de Justicia, lo maximo tribunal d'o país. O poder ciudadán tien un Consejo Moral Republicano que agrupa la Defensoria d'o Pueblo, o Ministerio Publico y a Contraloría Cheneral d'a Republica. O poder electoral ye conformau por o Consejo Nacional Electoral.

Partius politicos

• Movimiento V República.
• Un Nuevo Tiempo.
• Primero Justicia.
• Movimiento Podemos.
• Patria Para Todos.
• Partido Comunista de Venezuela.
• COPEI.
• Acción Democrática.
• Partido Socialista Unido de Venezuela.

Cheografía humana y sociedat

Gastronomía

A cocina venezolana ye influyenciada per as tradicions europeas (italiana, espanyola, portuguesa y francesa), africanas occidentals y indichenas. A cocina venezolana varía muito d'una rechión a unatra. As birollas basicas incluyen panizo, roz, platanos, fresols y cuantas carnes. As trunfas, os tomates, os brunos, as alberchenas, as crabazas, os espinais y os carbacins tamién son guarnicions comuns en a dieta venezolana. Venezuela tamién ye conoixida per tener una gran variedat de queso blanco, per un regular nombrau per rechión cheografica. Cualques platos tipicos son: l'arepa, o pabellón criollo, l'hallaca, o sancocho y la cachapa.

Esporte

Os esportes mas populars de Venezuela son o fútbol y lo béisbol; atros esportes importants son o basketbol, voleivol, tenis, boxeo y rugby.

Venezuela en os Chuegos Olimpicos

• Venezuela en os Chuegos Olimpicos.
• Categoría principal: Categoría:Venezuela en os Chuegos Olimpicos.

Venezuela en os Chuegos Olimpicos ye representada per lo Comité Nacional Olímpico y Deportivo Centroafricano, creau en l'anyo 1935 y miembro d'o Comité Olimpico Internacional dende ixemesmo anyo. Participó por primera vegada en os Chuegos de Londres 1948. Dende alavez ha participau de forma ininterrumpida en todas las edicions dica l'actualidat (2025).

En los Chuegos Olimpicos d'Hibierno, participó por primera vegada en os Chuegos de Nagano 1998 y dende alavez participa de forma intermitent en los que no ha aconseguiu garra medalla dica l'actualidat (2025).

Se veiga tamién

• Estaus de Venezuela.
• Lista de municipios de Venezuela.
• Lista d'estaus venezolanos por población.
• Lista d'estaus venezolanos por superficie.

Vinclos externos

• Se veigan as imáchens de Commons sobre Venezuela.
• (es) Gobierno en Línea - Pachina web oficial d'o Gubierno de Venezuela.

• Datos: Q717
• Multimedia: Venezuela / Q717