Tou

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo tracta sobre Tou. Ta atros emplegos d'o toponimo «Tou» se veiga Tou (desambigación).

Tou
Despoblau d'Aragón
Enrunas de Tou.
Entidat  • País  • Provincia  • Comarca  • Municipio	Despoblau  Aragón  Uesca Sobrarbe l'Aínsa-Sobrarbe
Partiu chudicial	Boltanya
Población  • Total	0 hab. (2010)
Altaria  • Meyana	737 m.
Distancia  • 106 km  • 6 km	enta Uesca enta l'Aínsa
Codigo postal	22395
Parroquial  • Diocesi  • Arcipestrau	Balbastro-Monzón Sobrarbe-Ribagorza
Ríos	Cinca
Coordenadas
Tou Tou en Aragón

Tou ye un lugar historico aragonés en o municipio de l'Aínsa-Sobrarbe, en a comarca de Sobrarbe y a provincia de Uesca.

En l'actualidat, no tiene garra población y se considera aria arqueolochica, protechida con a figura de Bien d'Intrés Cultural.

Cheografía

Tou se troba en l'altura de la Penya d'o Cotón, en l'antigo termin municipal de Moriello de Tou, población que probablment en quita lo suyo nombre. Por a suya orientación, como tamién Moriello y os nuclios d'a redolada, fa parte natural d'a valle d'a Cinca.

Se i gosa acceder por un caminet balizau, de firme desnivel, que puya dende Moriello. O camín salva un desnivel de 159 metros en 0.81 km, lo cual da una costera promedio de cuasi o 20% d'inclinación.

O conchunto d'as enrunas de Tou se forma de las restas d'un castiello (en l'extrimo mas septentrional) y as parez y muros estorrocaus d'un recinto fortificau, que talment hese puesto concaber as casas de lo poblau medieval, de forma semellant a como ye Muro de Roda. Tot se troba en a corona petrosa d'un penyastro, que en a redolada omne conoix como Penya d'o Cotón, y que presenta por a cara que mira directament ta la Cinca un cinglo extraplomau de bella docena de metros, que se puede suposar serviba de defensa natural ta lo conchunto por ixe costau.

L'edificio mas visible de Tou, que s'albira dende buena cosa d'a suya redolada, ye lo campanal d'a suya antiga ilesia, parcialment estorrocau. A construcción se data en o sieglo XII.

Estructura

A torre de Tou (s. XII).

A población fortificada de Tou yera encletada por una muralla tot arredol y, sacando-ne lo costau que tiene un cinglo natural que la guarda, feba 3 metros d'amplaria. As restas de paretz no totalment desapareixidas diz que parlan de casas feitas con parez meyanils con as que s'aprofitón os firmes muros perimetrals ta refirmar-las-ie.

En l'extrimo norueste encara i ha un troz de muralla de 3 metros d'altaria. O modelo constructivo de la población, anque no s'ha puesto documentar-ne l'antiguedat por garra cabo, pareix que s'encuadraría en o periodo cuan se construyón tamién as fortificacions de Griébal u Muro de Roda, con as cuals Tou tiene connexión visual directa, y tot ixo ye camín ta finals d'o sieglo X u principios de l'XI.

A ilesia, parcialment estorrocada, yera romanica y se trobaba en contacto anque difuera d'os muros perimetrals d'o recinto. No se'n sabe l'advocación, pero se piensa que la pudon construir en o sieglo XII, y destaca contra la resta d'o conchunto no solo que por trobar-se encara (parcialment) de peu, sino por a finura d'a suya construcción.

Poblamiento y despoblación

No se'n tiene datos, ni sobre cuan se construyó lo conchunto nian sobre cuan se despobló, pus Tou no se gosa mencionar en garra documentos que se conoixca. Manimenos, l'historiador Adolfo Castán proposa que a mayoría de lo conchunto s'habió d'executar d'entre las zaguerías d'o sieglo X y as primerías de l'XI.

O procés de despoblación posiblement i fue paulatino, en marchando los pobladors ta belaltras localidaz en a redolada a mesura que a necesidat de protección comenzó a perder importancia contra la proximidat t'as tierras de labor, que yeran mas t'abaixo. Moriello de Tou ha estau sinyalada como población receptora mas probable ta los emigrants de Tou.

Imáchens

• 
  O pantano de Mediano dende Tou.
• 
  O castiello de Tou.

Toponimia

D'alcuerdo con l'investigador aragonés Manuel Benito Moliner, o toponimo «Tou» ye un descriptivo con radices prerromanas, que dimanaría de la parola <*TOW que gosa significar «torre».

Vinclos externos

• Se veigan as imáchens de Commons sobre Tou.

• Datos: Q13050322
• Multimedia: Tou / Q13050322