Tronca de Nadal

De Biquipedia
(Reendrezau dende Tizón de Navidat)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Una tronca de Nadal.

A tronca[1], toza u tizón de Nadal (u tamién de Navidat) ye un elemento caracteristico d'as tradicions nadalencas altoaragonesas, asinas como d'as tierras vecinas catalana y occitana, probablement ligata a lo folclor, a machia y a mitolochía pirinencas, a la tradición de l'árbol de Nadal y a ritos y celebracions antigos d'o solsticio d'hibierno.

Como s'indica mas enta debant, se troba buena cosa de variants d'istos ritos, pero por un regular consiste en posar a Nueit de Nadal (Nueit Buena) en o fogaril u a canto d'iste, a toza mas gran d'a lenyera, que s'ha guardato a esprés ta ista fiesta. Modernament se posa tamién chunto con l'árbol de Nadal. Os ninos d'a casa son os encargaus de decir bellas frases y bendicions rituals (encara que en bels lugars a bendición la fa o mas viello u l'amo d'a casa). En ocasions, a bendición se fa dimpués de ruixiar a tronca con un sinyalín de vin mientres se prenuncia a bendición. En as zonas orientals de l'Alto Aragón, o ritual teneba una parte mas ludica, cuan os ninos d'a casa pegaban trucazos a la toza ta que ista "cagase" os presents,[2] que gosaban estar lamins, carambels, fruitos secos y altras cosetas ta minchar u chuguetz chicoz.

Con a despoblación y o progresivo declive d'a cultura popular de l'Alto Aragón, ista tradición, bien enradigata hue en Catalunya, cuasi dispareix d'os rituals nadalencos aragoneses. En l'actualidat cuantos colectivos miran de conservar y fomentar a suya celebración per tot Aragón.

Rituals tradicionals d'a tronca de Nadal[editar | modificar o codigo]

Ninos fendo cagar a la tronca

En l'Alto Aragón bi ha dos menas de rituals ta fer uso d'a tronca u toza de Nadal: en a zona occidental, o ritual consiste en bendecir a toza y deixar que ista se creme, mientres en a zona oriental, os ninons tamién gosan fer cagar a tronca.[3].

A bendición y crema d'a toza[editar | modificar o codigo]

En l'Aragón occidental, se fica a tronca en o fogaril, se bendiz, se li preta fuego y se deixa que se consuma. En muitos lugars se li encomendaba a o mas chicot d'a casa que s'asentase a escarramanchons sobre a toza y bendecise a tronca decindo as frases rituals, fendo o sinyal d'a cruz con un porrón de vin y una torta.[3].

Belunas d'as oracions de bendición d'a tronca que s'ha replegau son istas:

Buen Tizón, buen Varón,

buena casa, buena brasa, que Dios mantenga a paz en ista casa

y en toz os que i son

Dimpués se tornaba a repetir o sinyal d'a cruz con o porrón, decindo

Tronca de Navidat

yo te bendizco en o nombre d'o Pai,

d'o Fillo y d'o Espritu Santo. Amén

Y se bebeba un trago de vin. Dimpués se rezaba por os muertos d'a casa, por os pais y os lolos.

Atras bendicions son:

Bebe tizón, bebe porrón

tú por a boca y yo por o garganchón buen tizón, buena casa, buena brasa

que dios conserve a os amos d'esta casa (Cortiellas)
Yo te bendigo en el nombre de Dios y en el del Niño Jesús que va a nacer esta noche (Alquezra)
Buen turrón, buena brasa viva la gente de esta casa (Aflor)
San Juan bautizó a Cristo

Cristo bautizó a San Juan Yo te bautizo a ti toza en el día de Navidad

(Lanaja, an se baptiza a tronca con anís)

.

Buen tizón, buen varón

buena brasa Y Dios conserve

buen amo en esta casa (A Fueba)
Buen tizón, buen varón

buena casa, buena brasa Dios mantenga a l'amo

y a la duenya d'esta casa

(y fendo o sinyal d'a cruz con o porrón)

Tú yes negro, yo soy blanco y en a tripa te me zampo

En Escalona, o mas viello u l'amo d'a casa, encendeba o tizón y deciba o sermón:

Tizón de Navidat

Tú yes o tronco d'a casa

por ixo yo bendizco

con vin esta troncada

En nombre de Dios y o nino

que baixa ta la tierra

ta que ta ista casa traigas

a felicidat mas plena

O primer trallo ta Tú,

porque Tú tot lo navegas

O segundo por nusatros

que nos des salut a espuertas

O tercero ta que nieve

y se críen as cosechas

O cuarto ta que as arreses

no se disgracien ni mueran

Y o quinto ta que a Paz

nos espante toda guerra.

Fer cagar a tronca[editar | modificar o codigo]

En a zona oriental (encluyindo-ie o Semontano, a Cinca Meya y mesmo bel lugar d'o Baixo Aragón) a tronca gosa tener, de conchunta con o sentiu ritual de bendición d'a tronca, un sentiu ludico que no amaneix tanto en a parte occidental. Asinas, s'ha de trigar una tronca que tienga bels foricons ta ficar-ie lamins, galletas, nueces, pinyons, guirlaches, mandarinas, figos, monedas, chuguez, y asinas asinas.[3]

En bel momento d'a nueit, os pais ninvían a os fillos ta atra cambra (por eixemplo, con a enchaquia de ir a mullar as estenazas) ta que no veigan como se replena a tronca. Dimpués se lis grita y se les diz que ya pueden fer cagar a tronca, pegando-les firmes trucazos, que s'acompanyan de bellas frases, ditos u bendicions, fendo asinas que amaneixcan os presents ta os mas chicoz. Dimpués, a tronca prencipia a cremar-se.

Beluns d'os ditos que se dicen son:

Tronca, tronca de Nadal, caga turrones i pitja vi blanc (Camporrells)
Tronca de Nadal

caga turrons

y pixa vi blanc (Soperún)
Tronca Nadal

picha vino blanc y caga turrón

de mazapán (Estadilla)
Tizón, caga turrón...

En Veri, se chita dimpués un chorro de vin d'o porrón, y fendo o sinyal d'a cruz, se diz

viva la casa, viva el varón, viva els amos qu'ara i son

Recuperación d'o costumbre[editar | modificar o codigo]

En os zaguers anyos a tradición de bendecir a tronca, y mas que mas, a de fer cagar a tronca como forma de dar as estrenas de Nadal a os ninos s'está recuperando fito fito, mesmo en as ciudaz, gracias a la faina divulgadera que fan bellas asociacions culturals como Ligallo de Fablans de l'Aragonés.

Referencias[editar | modificar o codigo]

  1. (es) María Pilar Lacasa Carrascosa:El habla de Alcolea de Cinca: breve caracterización lingüística y vocabulario. Archivo de filología aragonesa Nº 66, 2010, pp. 193-216, ISSN 0210-5624
  2. (es) María Bobadilla, "El fuego ritual de Navidad en un pueblo de la Ribagorza, pp. 139-152 en I Congreso de Aragón de Etnología y Antropología (PDF), Institución Fernando el Católico, 1981, ISBN 84-00-04802-4
  3. 3,0 3,1 3,2 (es) Sánchez, Mª Elisa. La tronca de Navidad en Albada al Nacimiento. La Navidad en Aragón. Siete textos sobre la Naidad en Aragón. Libret que acompaña a o disco Albada al Nacimiento de La Orquestina del Fabirol.
2. BB. AA. La Navidad en Aragón. Colección CAI 100 (Nº 9), Edita CAI, Zaragoza, 1998.
3. Moreno Rodríguez, Pilar. La Navidad en el Alto Aragón. en Revista de Ciencias Sociales del Instituto de Estudios Altoaragoneses, ISSN 0518-4088, Nº 90, 1980 , pags. 407-424.

Vinclos externos[editar | modificar o codigo]