Porrón
O porrón[1][nota 1] ye un recipient de vidre que s'emplega ta contener y administrar una bebida, muit frecuentment vino, que se bebe directament prochectando en a boca un churro que amaneix por o pitón cuan o recipient s'inclina. Se considera un recipient tipico d'Aragón y Catalunya que ha difundiu dica atras rechions a posteriori.
Caracteristicament, o porrón ye un recipient de forma troncoconica con canyos largos que rematan en aperturas. Por la una, a mas alta y ampla (que se conoix como «respirador» u «respiradero»), penetra l'aire con libertat y permite que o porrón se vuede por l'atra cuan s'inclina, privando que se produzca garra fenomeno de retención por vuedo. L'atra ye o «pitón» u «pichera», ye a on remata un canyo de forma conica, y ye por a on brinca o liquido.
Ta beber, o porrón se subchecta por o respiradero con una man y s'alza adebant de a cara y mas alto que a cabeza. Alavez, s'aboca con a pichera mirando t'a boca d'o bebedor y cuan o churro escomienza a manar (a «pichar», que se diz) s'afina ta fer-lo coincidir con a boca. Ista forma de beber tipica de porrons y botas se diz «beber a galet» u «a gargalet». As primeras vegadas que se fa marchar un porrón ye recomendable tener una servilleta aman, pus no ye fácil fer-se la cuenta d'a on cairá o churro dica que se'n tiene bella experiencia.
A forma de beber d'un porrón resulta mas hichienica que muitas atras, pus o recipient nunca no gosa entrar en contacto con a boca d'o comensal. Por ixo, ye un instrumento especialment útil en as celebracions y as chentas populars, con as cuals s'asocia la suya imachen.
Notas
[editar | modificar o codigo]- ↑ Con a variant purrón
Referencias
[editar | modificar o codigo]- ↑ (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
