Ragusa

Iste articlo tracta sobre una ciudat de Croacia. Ta la localidat italiana se veiga Rausa; ta atros usos, se veiga Ragusa (desambigación).

Ragusa Dubrovnik
Localidat de Croacia
Envista aeria d'o casco viello de Ragusa.
Estau  • Zupanija	Croacia Dubrovnik-Neretva
Superficie	23,35 km² km²
Población  • Total	42615 hab. (2011)
Altaria  • Meyana	3 m.
Alcalde	Andro Vlahušić
Codigo postal	20000
Coordenadas
Ragusa Ragusa en Croacia
Web oficial

Ragusa (en crovate Dubrovnik, en dalmata Rausa) ye una ciudat de Dalmacia (Croacia), capital d'a županija de Dubrovnik-Neretva. Ha teniu una gran importancia en a historia y cultura primero d'os dalmatas y dimpués d'os crovates. Por a suya gran riqueza monumental y a suya situación costera ye un foco d'atracción turistica. Fa parte d'a Organización d'as Ciudatz d'o Patrimonio d'a Humanidat.

A suya población ye de 43.770 habitants (2001) en una superficie de 23,35 km², con una densidat de población de 1.874,52 hab/km².

Historia

L'orichen de Ragusa se troba en a resistencia d'a población romanizada a las invasions d'eslavos y avaros. Os ilirio-romans no podioron resistir en as tierras d'o interior, pero sí en as islas y ciudatz costeras. En 614 os invasors avaros y eslavos adrezoron lur atención enta as ciudatz costeras de Dalmacia, en especial Salona, tan furament que a población costera evacuó a mayor parte d'as ciudatz d'o continent, fueras de Chadra y se trasladó t'a seguridat d'as islas costeras. Poco dimpués que lurs ciudatz natals d'o continent hesen estau cremadas, os dalmatas tornoron a lo continent pa repoblar-lo. Os epidaurans fundoron Ragusa. Este escayeiximiento marcó o principio d'una nueva Dalmacia, més chicota, agora confinada a la costa hadriana. Se caracterizó por un herencio román y ya a primers d'o sieglo VII por o cristianismo. As tierras d'o interior fuoron ocupadas y pobladas por eslavos pa cutio.

Si a lo principio a costa dalmata yera baixo sobiranía teorica de Constantinoble, entre l'anyo 1205 y l'anyo 1358 pasó a depender d'a Republica de Venecia. Tamién conoixió un periodo d'estar sozmesa a los reis d'Hongría.

A Republica de Ragusa se fació independient d'Hongría a principios d'o sieglo XV y dimpués estió un estau vasallo d'o Imperio Otomán con obligación de pagar un tributo. Baixo a protección d'os otomans Ragusa conoixió tres sieglos de prosperidat y florada de l'actividat cultural y artistica, y encara que en 1667 fue destruita por un tierratremol, fue reconstruita.

En 1806 Napolión en fació un protectorau y dimpués la unió a las Provincias Ilirianas. Dende 1815 perteneixió a la provincia de Dalmacia dentro d'o Reino d'Austria.

Fue atacada por l'Exercito Federal Yugoslavo y por irregulars serbos chetniks y montenegrins quan a Guerra d'independencia crovate y quan a Guerra d'independencia de Bosnia-Herzegovina.

Toponimia

En fuents aragonesas medievals como o "Libro de los fechos et conquistas del principado de la Morea" amaneix como Ragusa, igual que en textos italians y franceses. Bi ha una localidat homonima en Secilia.

A mención en "Libro de los fechos et conquistas del principado de la Morea" ye en relación con a Quatrena Cruzada:

Et quando fue arribado a parenço el capitan le fizo muy grant honor et lo detuuo por tres dias et depues se partio de parenço et tenie su camino he asi ordenaua el patron co<n> cada uno capitan por tal que tardas mas en el camino Et (^cadi) en cada un luguar que arribaua<n> el patron fazia foir dos o tr(^o)[^e]s marineros: Et quando fueron a ragusa aqui ordeno et fizo ferir la galea en una punta por tal que por ferla adobar tardasen mas en el camino: et adobada la galea se partieron et fueron a C(^a)[^o]rfon: et quando arribaron a Corfon. el capitan lo combido et le fizo grant honor Et despues el patron ordeno co<n> un su parient et fizo fer rumor et depues aquel su parient tomo la gualea et fuyo con ella et remanieron miçer Ruberto & el patron alli en Corfon:

A denominación eslava de Dubrovnik se troba ya en textos medievals como en un tractau con o Ban Kulin de Bosnia, y esdevinió a denominación oficial en 1918 con a caita d'o Imperio Austro-hongaro.

Luenga y parla

Envista d'o casco viello de Ragusa.

Ragusa estió un d'os zaguers nuclios de resistencia d'o idioma dalmata, y a parla de Ragusa, o ragusán ye una d'as suyas millors fuents pa la suya conoixencia.

O ragusán romanz desapareixió, pero a diferencia d'en atras grans ciudatz de Dalmacia como Chadra no estió por un proceso d'italianización, y estió o idioma eslavo o que desplazó a lo idioma neolatín. En tiempos d'a dominación otomana en os Balcans, la plegada d'immigrants serbos dende Herzegovina occidental y la suya integración en a sociedat ragusana permitió lo predominio lingüistico eslavo. Tamién a diferencia d'atras partz de Croacia a branca d'o serbo-crovate que se parlaba yera a mesma que en Herzegovina, Montenegro y Serbia, o Štokavski. O xtokavisco de Ragusa conoixió un desembolique literario en os sieglos XVI y XVII.

En tiempos d'o illirismo os intelectuals crovates como Ljudevit Gaj abandonoron o Kajkavski de Zagreb como modelo lingüistico, preferindo a parla eslava xtokavisca de Ragusa, permitindo dimpués compartir u creyar una mesma luenga literaria que os serbos, montenegrins y bosniacos.

Curiosidatz

En Ragusa han estau rodadas muitas scenas de la serie Game of Thrones, en concreto las relacionadas con la capital King's Landing ("grau d'o rei"). Lo fenomeno social relacionau con la serie ha atraito encara mes turismo a la ciudat y a la costa dalmata, con rutas turisticas relacionadas con los scenarios de la serie.

Vinclos externos

• Se veigan as imáchens de Commons sobre Ragusa.
• Pachina web oficial municipal de Ragusa.
• Casco viello de Ragusa en o Centro d'o Patrimonio d'a Humanidat d'a UNESCO.