Río Seco (cuenca de Millars)

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Seco Montlleó - Monleón
Administración
Estaus	{{{estaus}}}
Territorios	Aragón
Cheografía
Longaria	km
Altaria d'o naixedero	m
Naixedero	Los Ojales (entre Puertomingalbo y Mosqueruela).
Desembocadura	Rambla de la Vídua (cerca d'Els Ivarsos)
Superficie d'a cuenca	km²
Cabal meyano	m³/s
Mapa
Lo río Seco en Aragón

Lo río Seco (en catalán Montlleó, en castellano Monleón) ye un tributario de la rambla de la Vídua por la suya marguin ezquierda. Tiene lo suyo naixedero en Los Ojales (entre Puertomingalbo y Mosqueruela), y caye en la rambla de la Vídua a on que s'ha posau la muga entre los termins municipals d'Aceneta, Culla y La Serra d'en Galceran, auguas enta baixo d'Els Ivarsos.

Auguas ent'alto de lo suyo naixedero de Los Ojales bi ha cualques cursos temporals d'augua que i complegan dende la versant sudoriental de la sierra de Mayabona (barranco del Portillo u de los Ojales, que fa de muga entre Mosqueruela y Puertomingalbo), dende Las Sampolas y Los Tormos (la rambla de Puertomingalbo), y dende la sierra de la Batalla (entre Puertomingalbo y Vistabella).

Auguas enta baixo de lo naixedero bi ha una foz fluvio-karstica con recolons que fa de muga entre los termins municipals de Mosqueruela y Vistabella. En este tramo ye lo puent de Marabillas (de zaguers de lo sieglo XIV), perteneixent a un camín reyal y azagador baixomedieval. Pocos km dimpués caye lo río Mallo, tributario por la ezquierda.

Lo río Seco caye en la rambla de la Vídua a on que s'ha posau la muga entre los termins municipals d'Aceneta, Culla y La Serra d'en Galceran, auguas enta baixo d'Els Ivarsos.

Hidronimia

L'hidronimo río Seco ye transparent y recurrent en aragonés. Ye documentau dende lo sieglo XIII y encara s'emplega. En latín medieval se latinizaba como rigus Sicus u rivus Siccus.

Se'n fizo mención en 1202 como ribosico u ribosito en la cesión de lo castiello de Puertomingalbo (en letra gotica la c y la t son muito pareixidas y se distinguen mal):

in frontaria sarracenorum castrum Linares et castrum de Avingalbon, quibus duobus castris hujusmodi dono et asigno terminos. Ex parte scilicet de illa Botorrida habeant pro terminis sicut aque diflunt versus ipsum castrum de Linares, ex altera uero parte sicut ambe Pene serrate includunt et dividunt versus ipsum castrum de Linares, habeant quoque pro terminis illas forcas que dicitur de Mont Lach et de Ribosito in intus usque ad Penam Golosam et de Pena Golosa usque ad Portum de Avingalon et sicut serra dividit et sendit versus Penam Calbam et de Pena Calba sicut aque diflunt versus prefatum castrum de Linares et de Vallelubrego usque ad Motoridam sicut aque diflunt versus item castrum de Linares.

Lo 5 d'octubre de 1203 lo rei Pero lo Catolico donó a Arnau de Palacín lo castiello de Bos u Val d'Ursera y fizo mención d'un rigus Sicus:

de Penna Golosa usque ad Fossas de Meo Cide, de Fossas de Meo Cide usque ad rigum Sicum de illa Moscarola et sicut tenet rigus Sicus usque ad Focem de Campo de Açeneda, et de Osea

En 1213 cuan lo mesmo rei donó lo castiello de Cuella a los templers tamién en fizon mención:

et ex alia parte usque Xodos et inde an Pinnam Gulosam, toto campo de Arzeda intus stante sicut rivus siccus ipsum dividit

En un texto de 1265 de l'archivo d'aldeyas de la Comunidat de Teruel se'n fa mención como una muga de lo termin de Mosqueruela:

deinde como partimos con Vispe (y viese al cabero de Montlat, y viese Rio Seco, y viere al cabero de Montlat, y cese a la Pena Rubia de fondos de las Casiellas y cese al cabero de las Posadas de Don Atorella, y cese a la Laguna negra de Fortanet y la Ferreruela y al Collado Frido, y como va la senda a la fuent de la Peniella, y como va la carrera al Puerto y torna a la Senda de los Cavalgadores, e toda cosa que vos fazades sea firme y estable a todos tiempos...

Tamién s'emplega actualment la denominación de río Monleón u riu Montlleó, que se remonta a un apelliu Monleón d'orichen aragonés pero que tiene la versión Montlléo u Monlleó en zonas catalanoparlants. Manimenos, Joan Coromines i Vigneaux considera que ye un hidronimo d'orichen arabe en mâ.l-cuyûn u "augua de los uellos". Se troba como microtoponimo ya en 1251, cuan Guillem d'Anglesola dió carta de población a Vistabella:

et de Penna Rubea ascendit usque ad Talayam altam que est inter locum qui vocatur Arçedol et castro de Boyo, et de Talaia alta vadit serra serra vadit ad Monteleoni, et de Monteleoni vadit ad Arçedolum, et de Arçedolo vadit carraria carraria usque in fundo de illo loco vocatur Mosquerola

Bibliografía

• (es) José Francisco Casabona Sebastián, Eduardo Gargallo Monforte: Mosqueruela: Guía de monumentos, paisajes, fiestas y servicios turísticos, Instituto de Estudios Turolenses, Teruel, 1999.
• (es) Prensa Diaria Aragonesa: Los ríos de Aragón. Río Martín. El Periódico de Aragón, Diputación General de Aragón, 2005.
• (es) Eduardo Viñuales Cobos (coordinador): Red natural de Aragón. nº 9, Gúdar-Javalambre Prames, 2006.
• (es) Javier Solsona Benages: Estudio toponímico del término municipal de Puertomingalvo (Teruel). Universitat Jaume I, 2001.
• (es) José Castillo Gil: La toponimia oral de las elevaciones macizas de Puertomingalvo (Gúdar-Javalambre, Aragón) y su rotulación con genéricos postizos a partir del siglo XX. Publicau en Onomàstica. Anuari de la Societat d Onomàstica, nº 2, 2016.
• (es) Enric Guinot: Els límits del regne, el procés de formació territorial del País Valencià medieval (1238-1500). Edicions Alfons El Magnànim. 1995.

• Datos: Q9071946
• Multimedia: Monleón River / Q9071946