Mula

De Biquipedia
Ir ta: navego, busca
Iste articlo tracta sobre a mula que ye un animal domestico. Ta altros emplegos d'o termin «mula» se veiga Mula (desambigación).
Equus asinus x E. caballus
Mula
Una mula pardilla, pasturando a rebasto.
Denominacions populars
Mula, masto, "macho", azembla
Estato de conservación
Status iucn2.3 LC.svg
Seguro (IUCN)
Clasificación scientifica
Dominio:
Eukaryota
Reino:
Animalia
Filo:
Chordata
Clase:
Mammalia
Orden:
Perissodactyla
Familia:
Equidae
Chenero:
Equus
Especie:
Equus asinus x Equus caballus

A mula (d'o latín <MULA,[1] con identico significau) u azembla[2] (de l'arabe andalusín <az-zamila, «abrío» u «bestia de carga»[3]) ye un equino domestico hibrido y estéril, naixiu por cubrir-se una yegua con un guarano.

A parola «mula» designa especificament a os exemplars de sexo femenino, mientres que os masclos se conoixen como «mastos» u con a voz castellana «machos». A parola masculina «mulo» practicament no tiene uso en aragonés nian en castellano d'Aragón, estando «masto» (y a suya equivalent castellana, «macho») a forma predominant de dicir-les a las mulas de sexo masculino en Aragón.

Descripción[editar | editar código]

A mula ye un animal de mida gran, semellant a la d'o caballo, y mas grandiza que os suyos parients somers y mulatos. Manimenos, tiene una masa muscular tansament menor que a d'os caballos (y una fuerza fisica menor, anque no significativament), pero un caracter manso que recorda mas a'l d'os somers, a qual cosa a transforma en una combinación óptima d'as aptitutz ta treballo que podrían ofreixer todas dos especies prochenitoras: fuerza y mansedumbre.

As mulas acostumbran a heredar o patrón de distribución d'as colors de pelache d'a raza caballar: a mayoría son muinas (negras) u pardillas (marrons), anque tamién en i ha tordas (grisas) y dica parcialment blancas (as que son «palomas» gosan estar-ne por albinismo y son excepcionals) u malladas, y a clara delimitación de zonas claras en os someros, como o mueso u as ganyas arredol d'os uellos, son muito mas difuminadas que en a raza asnar. Manimenos, muitas mulas y mastos tordillos heredan d'os suyos ancestros someros a raya negra que a aquells les recorre a crinera y o lumo y les arriba dica la coda. Muitas d'ixas tienen tamién a «cruceta», una linia curta transversal, sobre as espaldas, que ye caracteristica d'os burros.

As orellas d'as mulas gosan estar mas largas que en o caballo, pero no tant conspicuas como en o somero. A mida d'os pabellons auriculars depende de l'individuo, y oscila amplament d'entre a mida de como as tienen os burros y as de como os caballos. A coda ye crinosa, como en o caballo, y no remata en un chubillo u pelacho como en os somers.

Problemas cheneticos de l'entrecruz[editar | editar código]

A mula ye un entrecruz d'un somero y una yegua.

As mulas son quasi siempre estérils, y en os pocos casos documentaus de fertilidat, as crías estión chicorronas y febles. A esterilidat s'atribuye a lo diferent numero de cromosomas que tienen as especies d'as quals son dimanadas (os somers en tienen 62 y os caballos 64). Realment, a mula ye una bestia semi-estéril; totz os mastos (masclos) son estérils porque tienen un problema d'a glandula seminal, mientres que as fembras pueden fer ovulos fértils eventualment.

Quan os cromosomas fan recombinación, d'antes no queden en a metat d'a dotación cromosomica de l'animal, se reparten a l'azar. Totz ixes ovulos que hereden a dotación mezclada d'a yeugua y d'o guarano resultarán estérils y no podran fecundar-se, pus tendrán un numero impar de cromosomas. Sindembargo, quan os esparzos ovulos formaus no hereden si que a dotación orichinal de nomás uno d'os prochenitors d'a mula podrán fecundar-se. O porcentache d'ovulos fértils ye baixo sobre-manera.

Por ixe motivo, si en ixa ovulación en concreto (nomas que una entre muitos ciclos ovulatorios) a mula fuese cubierta con un caballo, o naiximiento sería d'un potro caballar, mientres que si a cubrise un somero en naixería un pollinet. No s'ha conoixiu garra caso d'una mula que librase un hibrido parellano a ella. Tamién car se desprende d'ixo que as mulas tienen uteros funcionals y que pueden estar emprenyadas de manera natural, anque en os zaguers anyos s'han produciu muitas prenyaduras experimentals con intervención humana, por fecundación in vitro u, mas que mas, por implantación embrionaria post-fecundación (con zigotos de somero u de caballo, ta que as mulas fesen de madres portaderas).

En os escasos casos a on que una mula queda prenyada con un ovulo propio o embarazo ye problematico. A taxa d'alborto ye muit alta, anque tecnicament a mula ye capable de suportar o embarazo y o embrión ye cheneticament de raza (caballar u asnar) pura. Bells autors en relacionan ixe aspecto con un alcurzamiento d'os telomeros y que os animals naixius sufren d'envellimiento prematuro. Manimenos por a escasa muestra documentada d'animals naixius asinas a demostrabilidat d'isto ye difícil.

Imachens[editar | editar código]

Se veiga tamién[editar | editar código]

Referencias[editar | editar código]

  1. (es) Voz «mula» en a edición en linia d'o Diccionario de la Real Academia Española, consultau o 9 de septiembre de 2012.
  2. (an) VIDALLER TRICAS, Rafel (2004). Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza. ISBN 978-84-8986-235-7
  3. (es) Voz «acémila» en a edición en linia d'o Diccionario de la Real Academia Española, consultau o 9 de septiembre de 2012.

Vinclos externos[editar | editar código]