Iris x germanica

De Biquipedia
Ir a la navegación Ir a la búsqueda
Iris x germanica
Iris germanica 0001.JPG
Iris x germanica
Denominacions populars
Lirio, lirio de cimenterio, lidio, lirio de muerto, lirio morau, iris labiau, lirio común, abozo, abozo azul, matapollo
Estato de conservación
Status iucn2.3 LC.svg
Seguro (IUCN)
Clasificación scientifica
Dominio:
Eukaryota
Reino:
Plantae
División:
Magnoliophyta
Clase:
Liliopsida
Orden:
Asparagales
Familia:
Iridaceae
Subfamilia:
Iridoideae
Tribu:
Irideae
Chenero:
Iris
Especie:
Iris germanica
Descripción
Iris germanica
L., 1753

Iris x germanica, dita popularment lirio de cimenterio u simplament lirio, ye a denominación scientifica d'una de planta bulbosa hibrida en o chenero Iris, miembro d'a extensa familia d'as iridacias, clasificada en a subfamilia d'as iridoidias y tribu d'as iridias.

Ye un d'os miembros más conoixius d'o chenero Iris y fue a especie tipo d'iste chenero en a suya primer descripción por Linneu en 1753, pero en l'actualidat diferents estudeos han mostrau que no se tracta d'una verdadera especie,[1] pus no existe ni ha existiu garra población silvestre d'a on dimanen os eixemplars actuals,[1] y a botanica tiende a considerar-la un hibrido entre diferents especies bordes d'Iris d'Europa,[2] anque domesticau y amplament distribuiu por a mano de l'Hombre.

Descripción[editar | editar código]

O lirio de cimenterio ye una iridacia de bulbo u con radiz tuberosa. As fuellas son basals (no i ha tallo), rectas u con una curva insignificant, que pueden fer más de 40 cm de largo. En produz entre 3 y 10 por bulbo. Tienen forma de fuella d'espada, con a nervadura paralela a las marguins, prou marcada, y color verde apagada, lustrosa.

As flors son muit caracteristicas. Brostan en una inflorescencia sobre tallo terminal, con bracteas en a base u no, pero despullau en l'ápiz. Se'n ha descrito de dica 120 cm d'alto, anque de regular en fa menos. As flors son trimeras, con tres sepalos poco destacables que muitas vegadas se secan a-escape, y tres petalos grans, de color violeta u azulada, con a parte más central blanca u con un bayo amariello, y se curvan ta dezaga quan son desplegaus de tot. Pueden tener macas u piquetas violetas de color más intensa que a resta.

A planta, muitas vegadas se propaga ella sola por multiplicación vechetativa, fendo radices adventicias que a boniquet pillan gruixor y desvienen rizomas y nuevos bulbos arredol d'a planta mai. Isto fa que tienda a creyar colonias individuals (clons cheneticos d'un solo individuo), o que baixo condicions favorables facilita la formación de bardizas mono-especificas sin guaire necesidat sisquiera de que intervienga l'Hombre.

Ixa facilidat de propagación, o feito d'estar autoctona d'Europa, en chunto con a suya resistencia (sobrevive sin dificultat en muitos tipos de climas) y as flors tan vistables que produz fan que haiga estau una planta ornamental muit apreciada: En a epoca de Carlo Magno, se'l menciona en os Capitulare de villis vel curtis imperii como flor de cautivo obligau en os chardins reyals. En a Peninsula Iberica, ha estau historicament una flor plantada con freqüencia en os cimenterios, y sobrevive qualques cheneracions sin a intervención humana.

Referencias[editar | editar código]

  1. 1,0 1,1 (en) STACE, C. A. (2010); New Flora of The British Isles. Cambridge (Reino Uniu). Cambridge University press. ISBN 9780521707725
  2. (en) Garden Bearded Irises en o portal d'a Pacific Bulb Society. Consultau o 21 d'abril de 2017.

Vinclos externos[editar | editar código]