Hasemania nana

De Biquipedia
Ir a la navegación Ir a la búsqueda
Hasemania nana
Kobbertetra Hasemania nana.jpg
Hasemania nana
Denominacions populars
Tetra d'arambre, tetra de puntas de plata, hasemania
Estato de conservación
Status iucn2.3 LC.svg
Seguro (IUCN)
Clasificación scientifica
Dominio:
Eukaryota
Reino:
Animalia
Filo:
Chordata
Clase:
Actinopterygii
Orden:
Characiformes
Familia:
Characidae
Chenero:
Hasemania
Especie:
H. nana
Descripción
Hasemania nana
Lütken, 1875

O tetra d'arambre[1] u tetra de puntas de plata[2] (nombre scientifico: Hasemania nana (Lütken, 1875)) ye una especie de peix d'augua dulce d'a familia Characidae, nativo de ríos y rigachuelos tropicals de Sudamerica.

Descripción[editar | editar código]

Ye un peix pelachico d'augua dulce, que habita en ríos y rigachuelos d'America d'o Sud, especialment en a cuenca d'o río Amazonas y os suyos afluents.[3] Vive en bandas.[4]

Os adultos mesuran bells 2,7 centimetros de largaria media,[5] anque muitos eixemplars en buenas condicions pueden creixer dica os 5 centimetros.[4]

O cuerpo ye prolargau, fusiforme, y comprimiu lateralment[5] como en a mayoría de caracidos. Tiene os musclos translucidos, como tamién pasa en atras especies de tetras, y se veye a traviés d'o suyo cuerpo, podendo-se diferenciar bien o paquet visceral en o sector toracico, de color más iridescent.

Predomina la color narancha (como l'arambre, d'astí ixe nombre) en o cuerpo, con una linia lateral marcada de color narancha viva y una malla negra en a base d'a coda. Tiene dos alveolos amarilliscos a canto y canto d'a coda, en a base d'os suyos dos lobulos. En todas as aletas a color narancha ye más viva que en o cuerpo, y rematan con una taca blanca en a punta (que le vale o suyo nombre coloquial en os países anglosaxons; «silvertip tetra», tetra de puntas de plata).

Como todas as especies d'o chenero Hasemania, no presenta aleta adiposa, que ye una caracteristica por demés definidera d'a familia d'os caracidos. Se tracta por tanto d'una singularidat sinapomorfica d'iste chenero no tener-ne.

No tiene un dimorfismo sexual guaire aparent.[4] Os masclos pueden apareixer con a punta de l'aleta anal más blanca[5] que as fembras, as quals a tendrían más amariella.[6]

Hábitat[editar | editar código]

Ye un peix d'augua dulce propio de ríos y rigachuelos de Sudamerica. En i ha en as cuencas d'o río Purús, o río São Francisco y l'Amazonas,[4] en l'amazonia brasilenya.

Tiene costumbres pelachicos y gosa vivir en bandas numerosas en auguas lempidas, pero tamién en as turbias.[5] De regular, se'n troba en zonas de corrient no masa fuerte y con buena cosa de plantas aquaticas entre as quals pueda acubillar-se.[5]

Amenista auguas d'entre 6 y 7 puntos de Ph,[4] acidas, con una dureza Gh d'entre 4 y 8 ºd[4] (augua tova, con pocos carbonatos), como corresponde con a mayoría d'auguas de selva, en o suyo hábitat natural. Ista especie interpreta la baixada d'a dureza de carbonatos (Gh) d'o suyo medio como un indicador d'a creixida estacional d'os cursos d'augua, que pa os peixes tropicals gosa significar l'arribada d'a estación d'abundancia. S'ha descrito que una dureza Gh d'entre 1 y 4 ºd podría actuar como un desencadenador d'a frega en Hasemania nana.[6]


Imáchens[editar | editar código]

Referencias[editar | editar código]

  1. Nombre común proposau pa l'aragonés, a partir d'os nombres comuns en atras lenguas romances como o castellano tetra cobre, o portugués tetra-cobre u o francés tetra cuivré.
  2. Nombre común proposau a partir de l'anglés silvertip tetra.
  3. (es) Hasemania nana, consultau lo 16 d'agosto de 2018.
  4. 4,0 4,1 4,2 4,3 4,4 4,5 (es) Hasemania nana, consultau o 16 d'agosto de 2018.
  5. 5,0 5,1 5,2 5,3 5,4 (es) Hasemania nana, consultau lo 16 d'agosto de 2018.
  6. 6,0 6,1 (es) Hasemania nana. Consultau lo 17 de febrero de 2010.

Vinclos externos[editar | editar código]