Espineta

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Superfície anterior d'a espineta
Superfície posterior d'a espineta

A espineta, punta d'o peito u esternón ye un ueso d'o tórax, plan, impar, central y simetrico, composau por cuantas piezas soldadas.

Encara que se considere un ueso de l'escleto axial ligau a las costiellas, no tiene lo mesmo oriche embriolochico que las costiellas y tiene mas relación con la cintura toracica.[1] En lo ser humán y los atros mamiferos se troba en a parti meya y anterior d'o tórax, s'articula por alto con as clavillas y en os suyos cantos laterals s'articulan as costiellas verdaderas y as falsas.

Tién dos caras, l'anterior y a posterior, dos cantos laterals y dos estremos: o superior u base y o inferior u vertice.

Anatomía comparada y evolución[editar | modificar o codigo]

La espineta apareixe en los amfibios y no ye present en los peixes. La espineta de los anuros y urodelos no bi ha una chunta con las costiellas. En muitos reptils la espineta ye un cartilago que cierra lo tórax articulando-se con las costiellas enta dezaga y los costaus y con la cintura pectoral por debant. Ni los ofidios ni los quelonios tienen espineta por diferents razons (reducción de miembros u substitución por atra estructura). Las aus tienen una espineta gran con una carena pa la inserción de los musclos toracicos importants pa mover las alas. Los mamiferos tienen un esternón largo con "nodos" pa la fixación de las costiellas.[1]

Denominacions[editar | modificar o codigo]

Lo cultismo esternón ye amprau de lo griego στέρνον - stérnon y que significa "peito". En la obra de Galén ya se nombraba con este termin griego a la espineta.

En aragonés occidental bi ha denominacions como ueso o peito (Hu 101),[2] punta lo peito (Hu 102),[2] punta peito,[3] u simplament peito (Hu 104) [2] u peto Hu 105.[2] Maninemos, en l'Alto Aragón ye mes comuna la denominación espineta, mesmo coexistindo con las anteriors en la zona occidental.[2]

En castellano d'Aragón bi ha denominacions como tapa (de)l pecho, tabla (de)l pecho, que pueden entrar en l'aragonés y trobar-sen tan a lo norte d'Aragón como Benás (taula'l pecho).[2]

Referencias[editar | modificar o codigo]

  1. 1,0 1,1 (es) ROMER, Alfred Sherwood, PARSONS, Thomas S.: Anatomía comparada. Editorial Interamericana, 1981. p 140.
  2. 2,0 2,1 2,2 2,3 2,4 2,5 (es) ALVAR LÓPEZ, Manuel: Atlas lingüístico y etnográfico de Aragón, Navarra y Rioja. Tomo VII. Institución Fernando El Católico. Departamento de Geografía Lingüística, Institución Fernando el Católico de la Excma. Diputación Provincial de Zaragoza, 1983. Mapa nº 966 esternón, lámina 1.159.
  3. (es) BARCOS, Miguel Ánchel, El Aragonés Ansotano: estudio lingüístico de Ansó y Fago; Gara d'Edizions. Zaragoza, 2007, p 236.