Republica Popular de China

Plantilla:Infobox País A Republica Popular de China (en chinés 中华人民共和国 Zhōnghuá Rénmín Gònghéguó) ye un país situato en l'este d' Asia, o cuatreno mas gran d'o mundo en cuanto a amplaria territorial.

A suya población ye de 1.325.992.000 habitants (estimación de 2008) en una superficie de 9.596.960 km², con una densidat de población de 138 hab/km². Ye o país con mayor numero d'abitans d'o mundo.

As ciudatz mas importans son Pequín (a capital), Xangai, y Hong Kong, totas con mas de 10 millons d'abitans, y bi ha arredol de 40 ciudatz de mas d'1 millón.

Cheografía fesica

Foto de satelite de China

A Republica Popular de China (RPCh) ye o segundo país mas amplo d'Asia, dimpués de Rusia, y o terzero u cuatreno mas gran d'o mundo. No se puet calcular prou bien a suya superficie debito a las disputas territorials entre China y a India, en concreto Askai Chin y Trans-Karakoram, y tamién os diferents metodos emplegatos ta calcular a superfizie d'os Estatos Unitos fan que pueda estar cualsiquiera d'istos dos o terzer país mas amplo. China tien mugas con 14 países: Afganistán, Vietnam, Bután, Cazaquistán, Coreya d'o Norte, India, Laos, Mongolia, Myanmar, Nepal, Pakistán (en o territorio desputato por a India d'o Caxmir), Quirguisistán, Rusia y Tachikistán. Tamién muga con a mar Amariella, a mar de China Oriental y a mar de China Meridional.

Mont Everest, punto más alto de China e d'a Tierra

Debito a la suya amplaria territorial bi ha una ripa de paisaches y zonas climaticas en China. A l'este, a lo largo d'a costa d'a mar Amariella y d'a mar d'a China Oriental, bi ha planas alubials con una alta densidat de población. A zona costera d'a mar d'a China Meridional ye mas montañosa y a lo sud de China domina a orografía de chicotas sierras. En o zentro de l'aria oriental bi son os deltas d'os ríos mas grans: o rió Amariello y o Yangtze. Atros ríos importants son o Río d'as Perlas, o Mekong, o Brahmputra, l'Amur, o Huai He y o Xi Jiang.

A l'ueste mandan as grans cordeleras, mas que mas o Himalaya, a mayor altaria d'a cuala ye o mont Everest, y os altiplans que caracterizan a mayor parti d'o paisache arido d'os disirtos d'o Takla-Makan y o Gobi. Debito a la sequera y as practicas agricolas perchudicials, as tormentas d'arena son comunas mientres a primabera. A espansión d'o disierto de Gobi ye a causa prencipal d'istas tormentas que afecten a lo noreste chinés, y encluso a Coreya y Chapón.

Encara que s'han aprobatas politicas y regulazions ambientals dende 1979, o meyo ambient en a China contina deteriorando-se, ya que muito a sobén se mira mas por o desembolique economico que por o meyo ambient. A mas, encara que China ha ratificato lo Protocolo de Kyoto, como país en bías de desarrollo no tien denguna limitación a las suyas emisions de diocsido de carbonio. Debito a la suya rapeda industrialización, China se ye combertindo en un d'os emisors mas grans de gases de carbonio que contribuyen a lo escalfamiento global.

Estrutura politica

O president chinés Hu Jintao e o president estatonitense George W. Bush

A Republica Popular China tien un sistema politico unipartidista, con predominancia d'o Partito Comunista Chinés, sistema de tipo autoritario y restritibo con as libertaz como a libertat d'espresión, a libertat d'asoziazión u a libertat de reunión. Dende os años 1970, sindembargo, o rechimen chinés ha feito una chicota evolución, encara que con muitos prozesos imbolutibos.

Asinas, en 1982 se proclamó una nueba Constituzión, que dá o poder lechislatibo a o Congreso Nazional Popular de China, formato por 3.000 miembros, esleitos indreitament por os diferents nibels administrativos chineses, con un mandato d'una duración de 5 añadas; bi ha un Comité Permanent. O poder executibo ye d'un Consello de Gubierno formato por un president de Gubierno y os suyos menistros, y por un president de China. Sindembargo, a propia Constitución reconoxe y asegura la predominancia d'o Partito Comunista Chinés, que ye quien nombra a los candidatos a ocupar os cargos politicos en o país.

Organizazión politico-almenistratiba

Articlo prencipal: Organizazión politico-almenistratiba de China

Mapa almenistratibo de China

A Republica Popular China se dibide oficialmente en tres nibels:

1. A nibel provincial o país se dibide en 23 provincias, 5 rechions autonomas, 4 municipios baixo churisdición zentral (u municipalidaz), y 2 rechions administrativas espezials.
2. A nibel de destritos, as provincias y rechions autonomas se dibiden en prefecturas autonomas, destritos, destritos autonomos y ciudatz;
3. A nibel cantonal, os destritos y destritos autonomos se reparten en cantons, cantons de minorías etnicas y poblatos.

Asinas os nibels provincial, destrito y cantonal se flecsibilizan ta adaptar-se a las particularidaz etnicas u economicas d'o territorio: as rechions autonomas, prefecturas autonomas y destritos autonomos son divisions de 1^er u 2º nibel abitatas por as 55 etnias minoritarias que tienen a suya propia autonomía ta fer leis espezificas. As municipalidaz de Pequín, Tianjin, Xangai y Chongqing encluyen belunas d'as mayors ciudatz d'o mundo y son baixo administración dreita. A la fin, as antigas colonias europeyas de Hong Kong y Macao mantienen una gran autonomía como rechions administrativas espezials, conserbando o suyo propio sistema economico y chudicial, amás de muitas caracteristicas propias d'estatos independients, como a suya propia moneda, dominio d'Internet, prefixo telefonico, bandera, etz. Baixo iste modelo Taiwán se considera una d'as 23 provincias d'a Republica Popular China, encara que en la practica la isla ye independient, y se troba almenistrata por o rechimen d'a Republica de China dende a fin d'a Guerra Civil de 1949.

Divisions de nibel provincial
Provincias
Anhui	安徽	Hainan	海南	Hunan	湖南	Qinghai	青海	Taiwán	台湾
Fujian	福建	Hebei	河北	Jiangsu	江苏	Shaanxi	陕西	Yunnan	云南
Gansu	甘肃	Heilongjiang	黑龙江	Jiangxi	江西	Shandong	山东	Zhejiang	浙江
Guangdong	广东	Henan	河南	Jilin	吉林	Shanxi	山西
Guizhou	贵州	Hubei	湖北	Liaoning	辽宁	Sichuan	四川
Rechions autonomas
Guangxi	广西	Mongolia Int.	内蒙古	Ningxia	宁夏	Xinjiang	新疆	Tíbet	西藏
Monezipalidaz
Pekín	北京	Chongqing	重庆	Shanghái	上海	Tianjin	天津
Rechions Administrativas Espezials
Hong Kong	香港	Macao	澳门

Desputas territorials

A mas de reclamar o territorio d'a Republica de China, a Republica Popular de China tien bellas desputas territorials con atras nazions:

• Aksai Chin, un territorio almenistrato por China y reclamato por a India.
• Arunachal Pradesh (u Tibet d'o Sud), almenistrato por a India y reclamato por China.
• Islas en a Mar d'a China:
  • Islas Paracel, administratas por China y reclamatas por a Republica de China y Vietnam.
  • Islas Spratley, reclamatas por a Republica Popular de China, a Republica de China y Vietnam. A mas, parti d'istas islas ye reclamata por Malaisia, Filipinas y Brunei.
  • Islas de Senkaku y Diaoyu, reclamatas por a Republica Popular de China y a Republica de China.

Enrastres externos

• (en) Information, Links, History and more of China. Información e istoria de China