O Lumo de Muro

O Lumo de Muro (/o'lumo.'muro/, en castellano y oficialment, «Humo de Muro») ye un lugar aragonés en o municipio d'A Fueva, en a provincia de Uesca y comarca d'o Sobrarbe. A suya población ye de 17 habitants (2010)

O Lumo ye una aldeya historica de Muro de Roda, que se troba en a man fovana debaixo d'o tozal que domina a dita población fortificada, en a ribera d'a Usía y en a boca de l'estretimiento que a conduce cara t'a ribera de Mediano. Guarda camins tradicionals con a resta de nuclios que formón o municipio historico d'o Muro de Roda, a mayoría d'os quins en l'actualidat son despoblaus, y se troban en as garras d'o Tozal de Muro de Roda. Dica l'absorción de o dito municipio en A Fueva en a decada de 1960, O Lumo exerciba como cabecera municipal.

Ye o solo lugar que encara guarda un camín que o comunique con o despoblau de Ministirio, á 1,5 kilometro de O Lumo en as garras d'o Tozal de Muro. Dista bells 2 km de Fumanal, 2,5 km d'O Pamporciello (totz dos en dirección norte) y cosa como 2,7 km d'Arasanz, en dirección nord-este dende O Lumo. Á 1 km en dirección sud, en a cuentra de a Usía, se troba o lugar de Palo, y en sud-este o santuario de Santa María de Bruís.

En O Lumo de Muro se troba, á demés, a Casa Clavería; un casal fortificau d'o sieglo XVI que en l'actualidat se troba reformau y sirve ta restaurant con o nombre de Mesón Las Bodegas de Clavería. O restaurant tiene tamién un parque zoolochico chicorrón, que ha nombre El Rancho de Clavería, que fundamentalment exposa una colección d'animals domesticos y de grancha y bella especie un poquet más exotica como estrucios.

Toponimia

Existe una teoría que afirma que o nombre de O Lumo de Muro (por o costumbre altoaragonés d'eludir a preposición, se prenuncia «O Lumo' Muro») dimana d'a parola latina «lumbus» y no pas de o fumo. O toponimo oficial «El Humo de Muro», en castellano, se va creyar por una mala interpretación d'a prenunciación local d'a parola aragonesa «Lumo», en interpretando-la como «L'Umo» u «L'Humo» por una error. A traducción correcta hese estau «La Loma de Muro».

Manimenos, una altra teoría afirma que a parola «lumo» sería en verdat un apocope de dos parolas iberas, «lur» y «umo», que significarían «tierra» y «grasa», a traviés de bella forma de tipo «lu'umo» («tierra fértil»). Isto, d'alcuerdo con l'autor d'a teoría, valdría mismo ta O Lumo de Muro como ta O Lumo de Ranyín, pus os dos lugars presentan buenas fincas a man de dos corsos d'augua que de siempre as habrían feito fácils ta meter de regano.

Demografía

Evolución demografica

1992 1994 1996 1997 1998 1999 2000 2001 2002 - - - - - - 19 17 17

2003 2004 2005 2006 2007 2008 2009 2010 2011 18 17 15 18 20 20 20 17 -

2012 2013 2014 2015 2016 2017 2018 2019 2020 - - - - - - - - -

2021 2022 2023 2024 2025 2026 2027 2028 - - - - - - - - - -

1990- : población de dreito. Fuent: Intercensal en l'INE, Series de población en l'INE y Relación d'unidatz poblacionals en l'INE.

Fiestas

• Segundo cabo de semana de mayo, Fiesta Mayor.
• 24 d'agosto, romería de Sant Bartolomeu, en puyando t'a ilesia de Sant Bartolomeu que ye en Muro de Roda.

Enrastres externos

• Se veigan as imáchens de Commons sobre O Lumo de Muro.