Casablanca (cinta)

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Iste articlo ye sobre una cinta estausunidense de 1942; ta atros usos, se veiga Casablanca (desambigación).

Casablanca
Ficha tecnica
Dirección	Michael Curtiz
Dirección artistica	Carl Jules Weyl
Producción	Hal B. Wallis
Guión	Julius J. Epstein Philip G. Epstein Howard Koch Casey Robinson
Musica	Max Steiner
Soniu	Francis J. Scheid
Fotografía	Arthur Edeson
Montache	Owen Marks
Vestuario	Orry-Kelly
Efectos especials	Lawrence W. Butler
Actors	Humphrey Bogart Ingrid Bergman Paul Henreid Claude Rains Conrad Veidt Sydney Greenstreet Peter Lorre
Datos y cifras
País(es)	Estaus Unius
Anyo	1942
Chenero	Drama romantico
Durada	102 min.
Idioma(s)	Anglés
Companyías
Productora	Warner Bros. First National Pictures
Distribución	Warner Bros.
Presupuesto	1.039.000 dólars
Ficha en IMDb

Casablanca (títol orichinal en anglés en Estaus Unius y estrenata con ixe mesmo títol en Aragón) ye una cinta estausunidense de l'anyo 1942, dirichita por Michael Curtiz, que en o suyo reparto incluye a destacatos actors como Humphrey Bogart, Ingrid Bergman, Paul Henreid, Claude Rains, Conrad Veidt, Sydney Greenstreet u Peter Lorre.

Ye un drama romantico de 102 minutos de durada, producito por Hal B. Wallis ta Warner Bros. y First National Pictures, con un presupuesto de 1.039.000 dólars, considerata una d'as cintas miticas d'a Historia d'o Cine.

A cinta ye ambientata en a ciudat marroquina de Casablanca mientres a Segunda Guerra Mundial, quan ixa ciudat, una colonia francesa, yera administrata por a Francia de Vichèi, que colaboraba con o Tercer Reich contra os Aliatos. O protagonista d'a cinta, Rick (Humphrey Bogart), un antigo miembro d'as Brigadas Internacionals mientres a Guerra Civil Espanyola, tien dandalos sobre si aduyar a la suya antiga aimant, Ilsa Lund, interpretata por Ingrid Bergman, y a lo suyo esposo Victor Laszlo (Paul Henreid), un líder d'a Resistencia francesa, a fuyir ta Portugal y ta os territorios controlatos por os Aliatos, u bien d'entregar-los a la policía de Vichèi, representata por o capitán Louis Renault (Claude Rains).

Mientres o rodache d'as scenas d'a cinta, Bogart portaba d'alzas en os suyos zapatos ta que no se notase la diferencia d'altaria entre ell y Ingrid Bergman.

Sinopsi

En Casablanca, Humphrey Bogart interpreta a Rick Blaine, un ciudadán estausunidense que heba partecipato en a Guerra Civil Espanyola en as filas d'as Brigadas Internacionals y que, desencantato dezaga, ha esdevenito un presonache amargato vivindo en una chicota ciudat colonial francesa, a ciudat de Casablanca en l'actual Marruecos. Parte d'o suyo desencanto tien o suyo orichen en un aimor que hea tenito con Ilsa Lund (Ingrid Bergman) en París en 1940, chusto antis de dentrar-ie as tropas d'a Wehrmacht d'o Tercer Reich en chunio de 1940 dimpués de redotar a l'Exercito francés y a l'Exercito britanico en a dita Batalla de Francia. Rick marchó de París enta Marsiella y enta Marruecos, ta instalar-se en Casablanca, a on esdevenió un cinico propietario d'un café, o Rick's Café Américain. En esdevenir a ciudat en uno d'os zaguers puntos per on yera posible albandonar os territorios controlatos por a Francia de Vichèi aliata d'o Tercer Reich enta Portugal, un país neutral, o Rick's Café Américain esdevenió un puesto a on se podeba trobar a tota traza de chents: colaboracionistas, oficials alemans, policías franceses corruptos, refuchiatos que prebaban de fuyir...

En o suyo treballo en o bar, Rick cuenta con l'aduya de Paul (Paul Panzer), qui colabora con a Resistencia francesa, y tamién con un antigo amigo de París, Sam (Dooley Wilson), pianista en o café. Un cinico capitán de policía, o capitán Louis Renault (Claude Rains) ye o representant oficial d'o Gubierno de Vichèi en a ciudat, y para cuenta de servir a los alemans encara que sin enemistar-se muito con a Resistencia, fendo un equilibrio. Y no xublida recibir os sobornos de Rick ta mantener o suyo livel de vida y d'emplegar en o suyo beneficio o poder d'o suyo cargo oficial, mesmo ta fer conquiestas entre as mullers que han de fuyir de Casablanca.

Cambeos de guión en Espanya

En Espanya, a cinta fue censurata por o Gubierno franquista, ta fer de Rick Blaine no pas un antigo miembro d'as Brigadas Internacionals, sino un vulgar contrabandista d'armas en favor d'Etiopía mientres a invasión italiana en 1935 y mientres as luitas de guerrillas contra os italianos. Cal parar cuenta que os melitars sublevatos en Espanya contra os quals luitoron as Brigadas Internacionals yeran os gubernants d'o país en 1942 dimpués de ganar a guerra.

Premios

A cinta recibió o Premio Oscar a la Millor Cinta en 1943. O suyo actor prencipal, Humphrey Bogart, fue nominato a l'Oscar a o Millor Actor por a suya interpretación d'o presonache de Rick Blaine, encara que en zaguerías qui recibió o premio estió l'actor Paul Lukas. Antiparte, l'actor Claude Rains tamién fue nominato a l'Oscar a o Millor Actor Segundario por o suyo papel d'o capitán Louis Renault, estando a la fin o ganador d'o Premio Charles Coburn.

Vinclos externos

• Se veigan as imachens de Commons sobre Casablanca.
• (en) Casablanca en IMDb.