Berroy

De Biquipedia
Ir a la navegación Ir a la búsqueda
Berroy
Localidat d'Aragón
125.Berroy.jpg
Envista de Berroy en l'anyo 2013.
Entidat
 • País
 • Provincia
 • Comarca
 • Municipio
Lugar
Flag of Aragon.svg Aragón
Flag of Huesca (province).svg Uesca
Sobrarbe
Fiscal
Población
 • Total

0 hab. (2011)
Altaria 1026 m.
Distancia
 • 2,7 km
 • 25 km
 • 119 km

enta Fiscal
enta L'Aínsa
enta Uesca
Codigo postal 22373
Parroquial
 • Diocesi
 •Arciprestato

Chaca
Biescas

Berroy ye un lugar d'o municipio de Fiscal, en a comarca de Sobrarbe y a provincia de Uesca. Ye despoblau dende os zaguers anyos 1960.[1]

Se troba a meya altura en a punta de Berroy, arredol d'os 1.000 metros d'altitut, en posición de solano y con buenas envistas sobre a cuenca meya d'o río Ara, que se conoix como Ribera de Fiscal. Cerca i esnaviesa la carretera nacional N-260 entre Fiscal y Samianigo, razón por a qual un d'os túnels de la dita infrastructura lieva o suyo nombre: o túnel de Berroy.

Cheografía[editar | editar código]

Berroy ye en un conchunto de faixas a meya altura en a punta de Berroy, arredol d'a cota 1.000 metros sobre o libel d'a mar, en a baixant de solano. O lugar aprofita un cantimplano un poquet más benigno que la media en a baixant, y se troba rodeyau d'os paretons d'o que heban estau as faixas de cautivo.

Cal puyar dende Lardiés, o lugar habitau que ye más cerca, que se troba bells cientos de metros por debaixo.[1] En l'actualidat, ye de tot invadiu por a broza y especialment por especies punchudas, como barzas, gabarderas y artos, por o que no ye mica comodo de visitar.

As casas de Berroy son en a part de dezaga y de ponient de la ilesia. No pareix que haigan seguiu una organización urbana determinada.[1] Muitas son enrunas huei, producto d'os más de 50 anyos de no vivir denguno, y mesmo grans árbols creixen por as carreras y en os solars.

Ilesia[editar | editar código]

A ilesia de Berroy en 2013.

A ilesia ye un edificio d'o sieglo XVI, consagrada pa Sant Remón Nonato, de dimensions modestas y un campanal recio, d'una planta más en altura, anexo en a cabecera, que data d'a mesma epoca y muestra encara aspilleras pa defensa de lugar porque yera o primer edificio que se trobaba por o camino de Lardiés.

O templo ye Bien d'Intrés Cultural pa Aragón, con codigo SIPCA 1-INM-HUE-003-109-185.[2] O suyo estau en 2013 yera de semi-ruina, con o tellau espaldau t'adintro d'a nau y o campanal fendiu de firmes grietas, por o que cal esperar que si no ye caito ya, cairá de forma inminent.

Sant Remón Nonato ye tamién o santo patrón de Berroy, y en a suya honor se feba la Fiesta o 31 d'agosto.[1]

Historia[editar | editar código]

Berroy amaneix la primer vegada en un documento en l'anyo 992.[3][4]

En 1378, i ha testimonio que en Berroy teneba o suyo casal o infanzón Domingo Ximénez de Berroy.[5]

En 1842, Berroy ye un municipio autonomo que amaneix en o Censo d'a Matricla Catastral con 15 casas ubiertas y 111 habitants.[6] En 1857, 15 anyos dimpués, ya s'heba integrau en o municipio de Fiscal,[6] como tamién fizon os consistorios d'Arresa, Borrastre, Sant Chuste y Lardiés.

En 1845, Pascual Madoz aporta bellas informacions de Berroy en o suyo Diccionario geográfico-estadístico-histórico de España y sus posesiones de Ultramar. Con que en istas medianías de sieglo XIX nos trobamos con un lugar d'economia agraria y terreno aspro,[7] de 7 casa ubiertas y 2 arruinadas (segunt Madoz), con ilesia parroquial con mosén y sacristán mantenius a vicinal.[7] Tiene una fuent pero no s'aprofeita si que pa beber, sin que se i dé cultura de regano.[7] De 28 cafizadas de terreno que tiene a localidat, nomás 28 son mesas en cultura, con 2 cafizadas de selva y una de matullar, y a resta; pa pastura de ganaus lanars.[7]

D'alcuerdo con Madoz, Berroy produciba trigo, hordio, cebau, millo y centeno (tot cerials de secano), y se complementaba con ganau de uellas.[7] En 1842 pagó contribución de 2231 Reals.[7]

Toponimia[editar | editar código]

Estau actual d'as carreras adintro d'o nuclio de Berroy.

Tot pareix que apunta que Berroy ye un toponimo con orichens prerromanas.[4] Seguntes Gerhard Rohlfs ye un equivalent semantico de Berrac (departamento de Gers) y Berry (Aisne), derivaus de l'antroponimo Berra documentau en Galia Cisalpina. Tamién podría descender d'os antroponimos galos Verrius y/u Verres, con a terminación -oi que indicaría tendencia.[4] D'alcuerdo con ixo, Berroy podría significar «o lugar de Berra», « lugar de Verres» u «de Verrius».

Atras interpretacions lo fan remontar a bo-roy, «rei d'os bueis» u «rei d'os belgas»,[4] de tradición celta. Un autor diz que ye una forma hibrida entre o celta «berg», montanya, y a parola latina «rubeus», royo, por o que significaría «montanya roya».[4]

Fiestas[editar | editar código]

Se veiga tamién[editar | editar código]

Referencias[editar | editar código]

  1. 1,0 1,1 1,2 1,3 1,4 (es) Berroy en Despoblados en Huesca, consultau o 19 de febrero de 2019.
  2. (es) Iglesia de San Ramón Nonato, en o censo de patrimonio aragonés. Consultau o 19 de febrero de 2019.
  3. (es) Toponimia mayor aragonesa, rechira de Pascual Miguel Ballestín en 2007. Consultada o 19 de febrero de 2019.
  4. 4,0 4,1 4,2 4,3 4,4 (es) Miguel Ballestín, Pascual. Toponimia Mayor de Aragón. Gara d'Edizions. Zaragoza, 2014. ISBN 978-84-8094-070-2.
  5. (es) Los Berroy o Borroy, consultau o 19 de febrero de 2019.
  6. 6,0 6,1 (es) Berroy en Alteraciones de los municipios en los Censos de población desde 1842. Consultau o 19 de febrero de 2019.
  7. 7,0 7,1 7,2 7,3 7,4 7,5 (es) Historia de Berroy, consultau o 19 de febrero de 2019.

Vinclos externos[editar | editar código]


Lugars d'o municipio de Fiscal
Albella | L'Arresa | Berroy | Borrastre | Burgasé | Cámbol | Caixol | Castellar d'a Guarga | Chabierre d'Ara | Chanovas | Cheret | Chinuabel | Chiral | La Cort de Tricas | Fiscal | Lardiés | Ligüerre d'Ara | Muro d'Ara | Planiello | Puyuelo d'a Solana | Sant Chuste | Sant Felices d'Ara | Sant Felices d'a Solana | Sant Martín de Puitarás | Santa Olaria d'Ara | Sasé | Semolué | Tricás | La Velilla | Villamana