Ribera de Fiscal

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A Ribera de Fiscal ye o nombre que se da a o sector central d'a valle de l'Ara dende aproximadament a boquera de lo río Forcos dica lo congosto de Baluport. Forma una subcomarca natural en Sobrarbe de la cual a cabecera ye o lugar de Fiscal, pero que historicament ha contau con atros nuclios con buena cosa de población como Chanovas, y atros mas chicos como Sant Felices, Albella, Arresa, Santa Olaria, etc.

A Ribera de Fiscal se troba de tot adentro d'o termin municipal de Fiscal, moderno, y coincide alto u baixo con o que dende o sieglo XIX heba estau os termins historico de Fiscal y d'Albella y Chanovas. O termino historico de Burgasé (valle de la Solana) no fa parte d'a ribera de l'Ara propiament dita.

A valle de la Solana ye una valle lateral muit relacionada, que se desaugua en l'Ara a traviés d'es dos barrancos que se'n diz «Guargas»: a Guarga de Caixol y a Guarga de Burgasé. Anque en bellas guías y publicacions han amaneixiu como termins intercambeables, no en son pas, y a Ribera de Fiscal se refiere estrictament a la valle principal recorrida por o río Ara.

Cheografía

A Ribera la delimitan as garras d'a punta de Berroy por l'ueste y a valle d'o barranco de Sant Salvador tot contino. A sierra de Canciás debuixa toda una crencha por en sud y va dica achuntar-se con a sierra de Gabardón.

A punta de la Ferrera, por alto de Chanovas, se'n va ta meter-le una inclusa por o sud zarrando-se contra l'Ara por debaixo d'ixe lugar. As estribacions d'o tozal Pecuto, que como garras portentosas baixan dende a sierra de Nabaín, le zarran contra l'Ara por a ripa norte. Entre as dos formacions forman o congosto de Chanovas u de Baluport, que ye la salida que le queda a l'Ara pa marchar d'a Ribera.

Por o costau norte, as versants d'as diferents estribacions y sarratos que se despinchan dende a sierra de la Corona deseparan a Ribera de Fiscal contra la valle de la Solana, anque bel lugarichón (Muro de Solana) s'aposenta alto en a corona d'un cerro y no ha quiesto renunciar a tener envistas sobre as dos valles.