Ir al contenido

The Searchers (cinta)

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Iste articlo ye sobte una cinta de western estausunidense de 1956; ta atros usos, se veiga The Searchers.
The Searchers
Títol The Searchers
Póster teatralizau d'a cinta, obra de Bill Gold.
Póster teatralizau d'a cinta, obra de Bill Gold.
Ficha tecnica
Dirección John Ford
Aduyant de dirección Wingate Smith
Dirección artistica James Basevi
Frank Hotaling
Producción Cornelius Vanderbilt Whitney
Guión adaptau Frank S. Nugent
Basau en The Searchers, novela d'Alan Le May
Musica Max Steiner
Soniu Hugh McDowell Jr.
Howard Wilson
Fotografía Winton C. Hoch
Montache Jack Murray
Escenografía Victor A. Gangelin
Vestuario Charles Arrico
Maquillache Web Overlander
Peluquería Fae M. Smith
Efectos especials George Brown
Actors John Wayne
Jeffrey Hunter
Vera Miles
Ward Bond
Natalie Wood
Datos y cifras
País(es) Estaus Unius
Anyo 1956
Debantadera 16 de mayo de 1956
Chicago (Illinois, Estaus Unius)
Chenero(s) Cine de western
Cine epico
Cine de drama
Durada 119 min.
Idioma(s) Anglés
Companyías
Productora(s) C.V. Whitney Pictures
Distribución Warner Bros.
Presupuesto 3,75 millons de dólars
Informacions en bases de datos especializadas:
Tráiler de The Searchers.
Inicio d'a cinta.
Primer plano de John Wayne (Ethan Edwards).
Ethan Edwards (John Wayne) en una escena d'a cinta.
Debbie Edwards (Nathalie Wood) en una escena d'a cinta.
Una escena d'a cinta rodada en Monument Valley.
War Bond, Capitán mosén Samuel Johnston Clayton, en una escena d'a cinta.
War Bond, Capitán mosén Samuel Johnston Clayton, y Ethan Edwards (John Wayne) en una escena d'a cinta.
War Bond, Capitán mosén Samuel Johnston Clayton, y Patrick Wayne, Tenient Greenhill, en una escena d'a cinta.
Vera Miles, Laurie Jorgensen, en una escena d'a cinta.
Jeffrey Hunter, Martin Pawley, en una escena d'a cinta.
John Wayne, Ethan Edwards, en o campamento comanche.
Una escena d'a cinta.
War Bond, Capitán mosén Samuel Johnston Clayton, y Ethan Edwards (John Wayne) en una escena d'a cinta.
Una escena d'a cinta.

The Searchers (títol orichinal en anglés, en aragonés Os buscadors, enguerada en Aragón con o títol en castellano de Centauros del desierto, Centauros d'o desierto en aragonés) ye una cinta de cine estausunidense de western revisionista epico-dramatico dirichida en 1956 por John Ford seguntes un guión adaptau por Frank S. Nugent (basau en a novela The Searchers, d'Alan Le May), con una dirección de fotografía de Winton C. Hoch y una Banda Sonora Orichinal obra de Max Steiner. Producida por Cornelius Vanderbilt Whitney ta la suya productora C.V. Whitney Pictures, en l'elenco d'a cinta se troban, entre d'atros, os actors John Wayne, Jeffrey Hunter, Vera Miles, Ward Bond u Natalie Wood. A cinta se filmó en Technicolor VistaVision.

The Searchers ye ambientada en Texas en os anyos 1860 en os anyos posteriors a la Guerra civil estausunidense mientres as guerras indias de Texas y se rodó en Edmonton (Alberta, Canadá) y en os estaus d'Arizona, California, Colorado y Utah en Estaus Unius. Dende lo suyo enguero tenió un destacau exito de taquilla y de critica y fa parte d'a lista de cintas consideradas as millors. En 2008 l'American Film Institute incluyó The Searchers en o suya lista AFI 10 top 10 considerando-la como la millor cinta de western y en l'anyo 2007 la mesma AFI la incluyó en a suya lista AFI 100 anyos...100 cintas en 12ena posición entre las cintas de toda la historia d'o cine estausunidense. Se tracta d'una cinta que amanixe a ormino en cualsiquier lista d'a critica u d'a prensa especializada como una d'as cintas millor valoradas. En l'anyo 1989 la Biblioteca d'o Congreso d'Estaus Unius la seleccionó ta la suya conservación en o National Film Registry (Archivo Nacional de Cintas) en estar considerada "culturalment, historica u estetica significativa", estando una d'as primeras 25 cintas seleccionadas ta lo dito archivo.[1] En l'anyo 2012 a revista Sight & Sound editada por o British Film Institute la clasificó como la setena millor cinta de toz os tiempos en a lista The Sight & Sound Greatest Films of All Time 2012 seguntes a critica.[2] A revista Cahiers du Cinéma en a suya lista d'as millors 100 cintas de Cahiers du Cinéma colocó en 2008 a The Searchers en a 10ena posición entre las 100 millors cintas de toz os tiempos.[3]

Antiparte, The Searchers estió a primer cinta de bella importancia en tener un making-off filmau aldredes, que demandó que se fese lo mesmo John Ford. En ixe making-off s'amuestran a mayor parte d'os aspectos relativos a la realización d'a cinta, incluyindo-ie las labors de localización de escenarios y la suya adecuación, a construcción de decoraus y las tecnicas de filmación.

Argumento

Dimpués d'una ausencia de ueito anyadas, Ethan Edwards torna en 1868 en a casa d'o suyo chirmán Aaron en l'ueste de Texas. Ethan heba participau como militar en l'exercito confederau d'os Estaus Confederaus d'America mientres a Guerra civil estausunidense y aparentment en rematar ixa guerra con a suya redota heba participau en a guerra franco-mexicana, como facioron cuantos antigos soldaus confederaus. Cuan torna porta con él una gran cantidat de monedas d'oro de dubdoso orichen y tamién una medalla militar d'as suyas luitas en Mexico, medalla que regala a la suya sobrina Debbie, que tien 8 anyadas. Mientres ye en casa d'o suyo chirmán i plega un grupo d'os Texas Rangers, y li remeran que, como antigo soldau confederau, ha de prestar churamento de fidelitat a los Estaus Unius, cosa que finalment no fa.

Bien luego de plegar Nathan, un grupo d'indios comanches roban o vacumen perteneixent a Lars Jorgensen, un d'os vecins d'Aaron, y los Texas Rangers mandaus por o capitán Samuel Clayton (qui tamién ye lo mosén d'o lugar) marchan a perseguir-los, adhibindo-se-lis Ethan, encara que no ha prestau churamento. Finalment, troban a lo vacumen muerto y comprenden que lo robo ha estau nomás que una estratachema ta fer que estasen luent mientres que los comanches atacaban os ranchos d'a redolada. Toz tornan a escape entazaga menos Ethan, qui dixa descansar a lo suyo caballo antis de tornar. De tornada va trobando-los en haber muerto agotaus los suyos caballos, y finalment plega en o rancho d'o suyo chirmán ta trobar-ie la grancha cremada y asasinaus lo suyo chirmán, su esposa y Ben, lo fillo menor. Pero no troba a Debbie ni a Lucy, la filla gran, porque las han secuestrau los comanches.

Dimpués d'un breu funeral, os Texas Rangers marchan a perseguir a los comanches y a las mullers secuestradas, en fendo-ie parte d'o grupo tamién Ethan, Martin Pawley (chirmán adoptivo de Lucy y Debbie) y Brad Jorgensen, qui festechaba con Lucy. Cuan a la fin troban a on han acampau os comanches, Ethan creye que cal atacar-los frontalment, pero lo capitán Clayton prefiere estar mas cauteloso, en temer que de fer un ataque frontal os comanches maten a las mullers. Cuan finalment plegan aíntro d'o puesto d'acampada, los comanches han fuyiu. Continando la persecución, os Rangers cayen en una emboscada, a on muitos quedan ferius. En considerar que han quedau pocos hombres útils ta continat enta debant, Clayton decide reblar y nomás que Ethan, Martin y Brad deciden continar a persecución. Bien luego Ethan troba lo cuerpo de Lucy, asasinada y fácil que violada, pero no lo lis diz a los atros.

Cuan tornan a trobar o puesto d'acampada d'os comanches a la siguient nueit, Martin creye ver a Lucy en o campamento, pero alavez Ethan li diz que él ha trobau a Lucy y él mesmo l'ha enfosau. Martin, furioso, se capuza contra lo campamento y los comanches lo matan. Ethan y Brad continan en solitario la persecución pero en plegar as nieus de l'hibierno lis pierden a pista y deciden tornar entazaga de momento. Ethan y Brad marchan enta casa d'os Jorgensen, a on la suya filla, que yera festechando con Brad, s'amuestra entusiasmada. Tanimientres, en casa d'os Jorgensen Ethan troba una carta que li ninvía Futterman, un comerciant a qui heba prometiu una recompensa si li facilitaba bella pista, y Ethan decide marchar, con Brad seguindo-lo con a carranya d'a choven Jorgensen, que diz a Brad que no l'atalayará. Cuan plegan en a botiga de Futterman, iste lis explica que ha conoixiu que a Debbie l'ha secuestrau una tribu d'os comanches, os comanches Nawyecka, mandaus por o chefe "Scar" (Cicatriza). Continan a suya encerca, y un anyo dimpués, Brad finalment ninvía una carta a los Jorgensen, a on explica que mientres ixa anyada tenioron que matar a Futterman (qui quereba robar a bolsa de monedas d'oro que heba visto que teneba Ethan) y que él mesmo, Brad, s'ha trobau causau con una mesacha comanche, cosa que encoleriza a la choven Jorgensen. Brad tamién explica que han trobau a la suya "esposa" muerta en un campamento comanche atacau por soldaus de l'exercito estausuidense, que bi heban feito una mortalera.

Continan la rechira, pasando por un fuerte de l'xercito y finalment dentrando en Mexico, a on finalment un mexicano los puet portar debant d'o chefe "Scar". La suya sorpresa ye de trobar a Debbie, que ya ye una mesacha, en a tienda d'o chefe, estando-ne aparentment a suya muller. Debbie lis diz que ella ya s'ha convertiu en una comanche y que quiere continar estando-lo, y Ethan prefiere matar-la a tener una sobrina comanche, pero Brad la esfiende, encara que Ethan li explica que una d'as cabelleras que "Scar" lis heba ensanyau bien entripau yera la de la mai de Brad. Y "Scar" quiere matar-los a los dos.

Elenco[4]

Actor Papel Notas
John Wayne Ethan Edwards
Jeffrey Hunter Martin Pawley
Vera Miles Laurie Jorgensen
Ward Bond Capitán mosén Samuel Johnston Clayton
Natalie Wood Debbie Edwards con 15 anyadas
John Qualen Lars Jorgensen
Olive Carey Mrs. Jorgensen
Henry Brandon Scar / Cicatriza
Ken Curtis Charlie McCorry
Harry Carey Jr. Brad Jorgensen
Antonio Moreno Emilio Gabriel Fernandez y Figueroa
Hank Worden Mose Harper
Beulah Archuletta Look
Walter Coy Aaron Edwards
Dorothy Jordan Martha Edwards
Pippa Scott Lucy Edwards
Patrick Wayne Tenient Greenhill
Lana Wood Debbie Edwards de nina
Gertrude Astor Convidada a la voda No acreditada
Pipe Line Begishe Indio comanche No acreditau
Exactly Sonnie Betsuie Indio comanche No acreditau
Danny Borzage Curdionista en o funeral No acreditau
Ruth Clifford Muller loca en o fuerte No acreditada
Carmen D'Antonio Carmen No acreditada
Tommy Doss Musico en a voda No acreditau
Pete Grey Eyes Indio comanche No acreditau
Feather Hat Jr. Indio comanche No acreditau
Nacho Galindo Tabernero maxicán No acreditau
Chuck Hayward Hombre en a voda No acreditau
Jack Tin Horn Indio comanche No acreditau
Harry Black Horse Indio comanche No acreditau
Away Luna Indio comanche No acreditau
Robert Lyden Ben Edwards No acreditau
Cliff Lyons Coronel Greenhill No acreditau
Peter Mamakos Jerem Futterman No acreditau
Mae Marsh Muller con capa en o fuerte refirmando a la loca No acreditau
Frank McGrath Texas Ranger No acreditau
Bob Many Mules Indio comanche No acreditau
Jack Pennick Sarchento en o fuerte No acreditau
Lloyd Perryman Mucico en a voda No acreditau
Chuck Roberson Texas Ranger en a voda No acreditau
Smile White Sheep Indio comanche No acreditau
Many Mules Son Indio comanche No acreditau
Percy Shooting Star Indio comanche No acreditau
William Steele Nesby No acreditau
Chefe Thundercloud Chefe comanche No acreditau
Terry Wilson Texas Ranger No acreditau
Billy Yellow Indio comanche No acreditau

Producción

La cinta s'ambienta en as planas d'o norueste de Texas clamadas con un toponimo en castellano, Llano estacado, en sinyalar-ie los espanyols cuan Texas formaba parte de l'Imperio espanyol toz os puestos a on se podeba trobar augua, en estar una plana desertica. Sindembargo, la filmación no se fació en ixe puesto, so que en Monument Valley, en os estaus d'Arizona y Utah. Tamién se flmoron bellas escenas en Mexican Hat en Utah, en o canyón Bronson en Los Angeles y en o Parque Nacional Elk Island en Alberta (Canadá).

O rodache se fació en VistaVision, una variant con mas definición y amplo de pantalla que heban creyau os incheniers d'a Paramount Pictures en 1954, nomás que dos anyos antes.

Ta lo papel de Martin Pawley Ford inicialment pensabe en l'actor Fess Parker, que en ixas envueltas yera conoixiu en interpretar o papel de David Crockett pero Walt Disney, con qui Parker teneba un contracto vichent, se negó mesmo sin decir-le cosa a Pareker, qui anyadas dimpués lamentaba que ixo heba estau muit desfavorable ta la suya carrera cinematografica.

Como curiosidat, ista ye la primera d'as solas tres cintas producidas por Cornelius Vanderbilt Whitney ta la suya productora, estando la segunda The Missouri Traveler (1958, Jerry Hopper) y la tercera The Young Land (1959, Ted Tetzlaff, con Patrick Wayne, lo fillo de John Wayne).

Premios

Premio Calendata Edición Categoría Premiau Notas
Premios Globos d'Oro 1958 15ena edición Globo d'Oro a lo Millor Actor Revelación de l'Anyo Patrick Wayne

Antecedents historicos

Bellas notas que s'han conservau de l'autor d'o relato orichinal, Alan Le May, indican que ta lo papel d'os buscadors s'inspiró en un personache real, Britton Johnson, un rondaire afroamericán qui rescató a su muller y a su filla que heban raptau los comanches en 1865. Posteriorment Britton fació a lo menos atros tres viaches en territorio indio en o Territorio de Kansas en rechira constant d'una atra nina secuestrada, dica que lo matoron os kiowa en 1871.[5] Tanimientres, bellos criticos cinematograficos que The Searchers s'inspiró en un atro caso real, escaiciu en 1836, cuan en a masacre de Fort Parker, en l'actual Parque Estatal de Fort Parker en Texas, os indios secuestroron a Cynthia Ann Parker, una nina de 9 anyadas que convivió 24 anyadas con os comanches casada con uno d'os suyos chefes y estió la mai d'o chefe comanche Cuanah Parker. James W. Parker, tío de Cynthia, estió gran parte d'a suya vida buscando-la, mesmo que Ethan en a cinta. De feito, istos estioron belluns d'os 64 casos de ninos raptaus por os comanches que Alan Le May estudió ta la suya novela. Ta l'ataque d'a Caballería a lo poblau comanche, fácil que la inspiración se trobe en o feito real, a batalla d'o río Washita en 1868, cuan o 7eno Rechimiento de Caballería mandau por George Armstrong Custer atacó un campamento cheyenne en l'actual Oklahoma, podendo-se inspirar tamién en a batalla de North Fork of the Red River en 1872, tamién contra los comanches, cuan o 4eno Rechimiento de Caballería mandau por Ranald S. Mackenzie fació presos a 124 mullers y ninos comanches en engarcholando-los en Fort Concho.

Criticas

Bosley Crowther en The New York Times calificó The Searchers como:[6]

Un western esgarrador (...) encara que con un luengache excesivo en os suyos anuncios (...) Dende Frank S. Nugent, cual guión d'a novela de Alan Le May ye una mica picant, dica l'elenco y tecnicos, ye lo logro honesto d'un equipo bien uniu

Ronald Holloway en Variety comentaba que:[7]

bellament montau en a tradición de Shane (encara que) una mica decepcionant por a suya extensión y repetitividat (...) o sello de dirección de John Ford ye inconfudible. Se concentra en os personaches y establixe un estau d'animo definiu. Tanimientres, no ye suficient ta superar muitas d'as debilidaz d'a historia

O critico Rogert Ebert consideraba a lo personache interpretau por John Wayne, Ethan Edwards,[8]

...un d'os personaches mas convincents que Ford y Wayne mai no hesen creyau (...) De feito The Searchers parixe estar dos cintas. A historia d'Ethan Edwards ye cruda y solitaria, un retrato d'a obsesión y en ella se puet veyer a inspiración de Paul Schrader ta Travis Bickle en Taxi Driver (...) a cinta aíntro d'ista cinta involucra la trama englera segundaria romantica y los personaches colocaus ta lo desafogo comico, incluyiu lo vecín sueco Lars Jorgensen, que fa servir un accento de vodevil, y Mose Harper, un ababol tractau como una mascota (...) ista segunda vertient no en tien garra intrés y qui valora The Searchers aspera pacientment lo retorno enta la historia principal

Ta lo critico Quim Casas:[9]

Centauros del desierto ye un western-revelación (...) dixó descolocaus mesmo a los esfensors que a los detractors d'o cine de John Ford, mesmo que a qui veyeba en John Wayne la imachen d'o triunfalismo nortamericán, heroico, valient, inmaculau (hue) la cinta contina cauptivando y desconcertando simultaniament (...) o trazón que dixó en ixas envueltas estió bien fundo (...) tien o caracter d'una autentica odisea. Pasan os anyos, cambian as estacions, la nieu cubre lo suelo y l'hibierno amaga lo sol, pero Ethan y lo choven Martin continan cabalgando ta saber d'a chicota Debbie

Sobre o racismo

Un d'os temas principals que se tractan en ista cinta ye l'actitud d'os colonos blancos enta los amerindios. Ford no estió lo primero en tractar cinematograficament iste aspecto pero la suya descripción d'a dureza d'o tracto enta los amerindios estió sorprendent, mas que mas ta las cheneracions posteriors. Roger Ebert diz que:[8]

Creigo que Ford yera tractando, de manera imperfecta, mesmo niervosa, de representar o racismo que chustificaba lo chenocidio

En o corazón de The Searchers se troba l'actuación de Wayne como l'alticamau y vengativo Ethae Edwards. Dende l'alazet d'a suya rechira, clarament ye menos intresau en rescatar a Debbie que en vengar-se d'os comanches por a muerte d'o suyo chirmán y d'a suya familia.

En una entrevista en 1964 en a revista Cosmopolitan, Ford deciba:

Bi ha bella cosa de verdat en l'acusación de que l'indio no ha estau retratau de manera precisa u chusta en o western, per nuevament, ista acusación ha estau una cheneralización ampla y, a sobén, inchusta. L'indio no dio la bienvenida a l'hombre blanco... y no estió diplomatico... Si los blancos l'han tractau inchustament en as cintas, desafortunadament ixo s'escaició a ormino en a vida real. Bi heba muito prechudicio racial en a Ueste.

Ed Lowry diz que:

Mientres que se describe a los comanches como totalment despiadaus, Ford lis atrubui motivacions a las suyas accions y lis atorga una dignidat adecuada con una civilización argüellosa. Mai no vemos a los indios cometer atrocidaz mas escarrachants perpetradas por l'hombre blanco

Grey Marcus comenta que:

Wayne ye clarament Ahab (...) Él ye lo buen heroi estausunidense qui s'empenta a sí mesmo dillá de toz os oriellos conoixius y enta la locura, o suyo compromiso con a honor y la decencia se cremó dica convertir-se en un nuclio de venganza

Benton Prestley considera que Ford indica que la crueldat de Scar tamién ye morivada por a venganza ("Dos fillos asasinaus por hombres blancos. Por cada fillo preno muitas cabelleras").

Sobre lo personache d'Ethan Edwards, Randy Roberts y James S. Olson creyen que:[10]

Tamién ye un maniaco obsesionau. Os colonos blancos no son simplament l'avantguardia abanzada d'a civilización; son racistas. Os indios no son nomás que nobles salvaches, son asasins salvaches. La muga no ye un puesto d'oportunidaz, ye un rillazo... En o personache d'Ethan Edwards, John Wayne heba extendiu a l'heroi d'o western dica la muga d'o mal

Tamién o mestiache ye un tema omnipresent en a cinta. De feito nomás prencipiar a cinta Martin recibe una mirada amargada d'Ethan en indicar que él tien un ueiteno de cherokee. Ethan diz cuatas vegadas en a cinta que matará a su sobrina antes de que "viva con un indio", u que "vivir con un comanche no ye vivir". Mesmo un d'os personaches mas amables d'a cinta, Laurie (interpretada por Vera Miles), li diz a Martin cuan iste explica que ha de protecher a su chirmana adoptiva que "Ethan li ficará una bala en o cerebro. Te digo que Marta quererba que lo fese".

A violación de mullers blancas por os indios ye un tema implicito en a cinta. No se representa garra escena d'una violación real, pero como diz Alexandra Heller-Nicholas,[11] "o secuestro, o captiverio y la violación implicita de Debbie (...) impulsan a narrativa". Glenn Frankel diz que en a vida real "a violación yera un escaicimiento d'a vida de muitos captivos, encara que no gosaba charrar-se entre las mullers que fuyioron u fuoron rescatadas de tornada enta lo mundo de l'hombre blanco".

Ethan y Marta

Un atro aspecto intresant d'a trama argumental ye la relación entre los personaches d'Ethan y Marta, la suya cunyada, entre los cuals bi ha una obvia atracción. Encara que garra dialogo en fa alusión, en a cinta bi ha cuantas referencias visuals a la suya relación. Bel critico ha sucheriu que ista pasión tacita implica que Debbie, a qui se describe especificament como una nina de ueito anyadas, en tornat Ethan d'una ausencia de ueito anyadas, podría estar filla suya. Ista posibilidat adhibe un atro matiz a la busca obsesiva de Debbie por parte d'Ethan, la suya repugnancia a pensar que ella podría estar vivindo como una indichena india y la suya decisión final de portar-la enta casa ta dimpués marchar él. Dillá d'as motivacions mas evidents tamién podría representar a necesidat d'un pai que se sient culpable de salvar a la filla que tenió en enganyando a su chirmán ta dimpués albandonar-la.

Influyencias

The Searchers ha teniu muita influyencia en cuantas atra cintas. David Lean la veyó repetidament ta que l'aduyase a prechinar millor la presentación d'un paisache en a pantalla mientres se preparaba ta rodar Lawrence of Arabia,[12] y a dentrada d'Ethan Edwards en The Searchers a traviés d'una ampla pradera, se repite a traviés d'un amplo desierto de Sharif Ali en Lawrence of Arabia. Sam Peckinpah fació una referencia a las secuelas d'a mortalera y a la escena d'o funeral en Major Dundee (1965) y, seguntes una resenya de 1974 de Jay Cocks, Bring Me the Head of Alfredo García de Peckinpah contién dialogos con "tributos directos a clasicos como The Treasure of the Sierra Madre de John Huston y The Searchers de John Ford".[13]

A cinta de 1967 de Martin Scorsese Who's That Knocking at My Door presenta una secuencia en a que los dos personaches principals charran sobre The Searchers y de feito en una enquesta ta Sight & Sound Scorsese incluyiba The Searchers entre las suyas doce cintas favoritas.[14]

Scott McGee, en un articlo ta Turner Classic Movies afirmaba que Steven Spielberg, Martin Scorsese, John Milius, Paul Schrader, Wim Wenders, Jean-Luc Godard y George Lucas han estau influyenciaus y han feito bel tipo d'homenache a The Searchers en o suyo treballo. En particular s'ha citau por as suyas similituz a Paris, Texas de Wim Wenders, ganadora d'a Palma d'Oro en a 37ena edición d'o Festival de Cine de Canas.[15]

Ista cinta tamién influyó en bellos aspectos d'a saga cinematografica de Star Wars, de George Lucas.[12] A escena en que Ethan Edwards troba cremando-se la grancha d'a suya familia se veye reflexada en Star Wars de 1977 cuan o personache de Luke Skywalker troba la suya grancha cremada por os soldaus d'asalto imperials.[16] The Searchers tamién influyó en a precuela de 2002 d'ista serie, Star Wars Episode II: Attack Of The Clones, cuan Anakin Skywalker conoix que un d'os miembros d'a suya familia ha estau secuestrau por un grupo de Tusken (encara que astí la secuestrada no ye la sobrina, so que la mai) y en venganza Anakin masacra a los secuestradors, mesmo que fa Ethan en a batalla culminant en o campamento comanche. Tamién as escenas inicials de Rogue One: A Star Wars Story (2016, Gareth Edwards) son reflexo d'as de The Searchers, cuan o personache de Jyn Erso se veye amagau por sus pais cuan atacan a suya grancha, mesmo que los pais de Debbie l'amagan a ella cuan os comanches atacan a suya grancha.

A cinta Searchers 2.0, dirichida en 2007 por Alex Cox inclui muitas discusions sobre The Searchers y d'atras cintas que tractan o tema d'a venganza. En ista cinta os personaches asisten a la prochección d'una supuesta nueva versión de The Searchers dirichida por Ted Post y protagonizada por James Mitchum como Ethan Edwards y Telly Savalas como Scar, encara que en realidad mai no s'ha feito ixa suposada tal nueva versión (Ted Post en realidad heba dirichiu una nueva versión de Stagecoach de John Ford, tamién dita Stagecoach).

O creador d'a serie de televisión Breaking Bad, Vince Gilligan, declaró que lo final d'o episodio final d'a serie, Felina, estió influyenciau por a cinta.[17]

A cinta d'o cine canadiense Maliglutit (2016, Zacharias Kunuk y Natar Ungalaaq) ye una nueva versión parcial de The Searchers. En Maliglutit, ambientada en 1913, un hombre inuit troba que han secuestrau a su muller y a su filla. Tanimientres, Zacharias Kunuk, un d'os directors d'a cinta, descartó la trama orichinal sobre los conflictos entre blancos y pueblos indichenas y nomás emplegó en a cinta que personaches inuit, explicando que lo tema d'o racismo no yera un tema que estase previsto tratar en a cinta.[18]

Una frase que lo personache d'Ethan Edwards repite muitas vegadas, "that'll be the day", estió la inspiración de Buddy Holly ta la suya canción That'll be the day, cuan veyó la cinta en un cine de Texas.[19]

Se veiga tamién

Referencias

  1. ↑ (en) ENTERTAINMENT: Film Registry Picks First 25 Movies, en Los Angeles Times, 19 de setiembre de 1989.
  2. ↑ (en) The Greatest Films Poll, Sight & Sound en a web d'o British Film Institute.
  3. ↑ (en) Cahiers du Cinéma 100 Films.
  4. ↑ (en) The Searchers en Internet Movie Database.
  5. ↑ (en) Negro Brit Johnson, Dennis Cureton & Paint Crawford en Fort Tour Systems, Inc..
  6. ↑ (en) Bosley Crowther: Screen: The Searchers Find Action; Entertaining Western Opens at Criterion "Animal World" Shown At Little Carnegie, en The New York Times, 31 de mayo de 1956.
  7. ↑ (en) Ronald Holloway: The Searchers , en Variety, 13 de mayo de 1956.
  8. ↑ 8,0 8,1 (en) Rogert Ebert: The Searchers.
  9. ↑ (es) Quim Casas: Películas clave del western, Ediciones Robinbook, S.L., Barcelona, 2007, ISBN 978-84-96222-88-5, p.126-128.
  10. ↑ (en) Randy Roberts y James S. Olson: John Wayne: American, 1995, p. 423.
  11. ↑ (en) Alexandra Heller-Nicholas: Rape-Revenge Films: A Critical Study. McFarland]], 2011. p. 71. ISBN 9780786486922.
  12. ↑ 12,0 12,1 (en) Eric Snider: What's the Big Deal?: Lawrence of Arabia (1962) en MTV, 11 de mayo de 2011.
  13. ↑ (en) Jay Cocks: Horseless Headsman en a revista Time.
  14. ↑ (en) Scorsese's 12 favorite films.
  15. ↑ (en) Stan Jones: Wenders' Paris, Texas and the "European Way of Seeing". European Identity in Cinema. Bristón y Portland, Intellect Books. p. 52. ISBN 1-84150-916-7.
  16. ↑ (en) Jason Serafino: The Films That Inspired The "Star Wars" Saga en TechTimes.
  17. ↑ (en) Dan Snierson: "Breaking Bad": Creator Vince Gilligan explains series finale, en Entertainment Weekly.
  18. ↑ (en) Kate Taylor: Two of Canada’s top films look to preserve the Inuit way of life, en The Globe and Mail, 12 de chinero de 2017.
  19. ↑ (en) Bob Grene: WANT SOME NEWS TO MAKE YOU GRIN?, en Chicago Tribune.

Vinclos externos

Obteniu de "https://an.wikipedia.org/w/index.php?title=The_Searchers_(cinta)&oldid=2118870"