Navallo
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Un navallo u balset ye una basa u basón artificial u natural que reculle bel tiempo l'augua de plevia y a on puet abrevar lo bestiar.
Los navallos se pueden fer con la tecnica de la piedra seca, primero fendo un foyo d'un metro y meyo de fondura y uns 6 m de diametro y dimpués fendo paretz de piedra seca con un contorno circular arredol d'ixe foyo menos por un puesto pa permitir tanto que entre la chent como l'augua.
Los navallos son puntos importants en la distribución de muitos anfibios en zonas secas de lo Sistema Iberico oriental. La valua ecolochica de beluns de los navallos ha motivau que un navallo de Lo Toro (Alto Palancia) siga protechito dende lo 5 de noviembre de 2004 con tot lo Parache Natural Municipal El Pozo Junco con una superficie de 7,05 ha muito cerca de la muga con la comarca de Gúdar-Chabalambre. En Altura (Alto Palancia) bi ha muitos Alchipes-Navallos de piedra seca declaraus "patrimonio agricola".
Son equivalents de los navallos de lo Sistema Iberico las lavanhas d'Occitania y, dica cierto punto y en atro ambient climatico y ecolochico, los dew pounds u "estanyos d'agualera" d'Anglaterra.
Toponimia
Por estar puntos importants pa los pastors muitos navallos reciben denominacions concretas orichinando microtoponimos. La parola "navallo" se troba tal y quiento en la toponimia aragonesa de puestos a on l'aragonés de la Val de l'Ebro desapareixió fa sieglos como Azuara, Blesa, Ferrera de los Navarros, Loscos, Moyuela, Muniesa, Novallas, Plenas, Tosos y Villanueva de la Uerba, y como navajo en la zona de l'aragonés d'as comunidatz aragonesas y de las comarcas churras, remontando-se a navacho. En las comarcas churras trobamos lo macrotoponimo actual Navajas que se remonta a Navachas.
Los toponimos navazo de la Sierra d'Albarracín y Rincón d'Ademuz y las suyas redoladas representan un cambio de sufixo documentau ya en la baixa Edat Meya y común con lo castellano de muitas zonas.
En lo dominio galaicoportugués bi ha muitos toponimos con navalho u navallo, lo mesmo que en lo dominio astur-leyonés lavayu, navayu (u navachu en l'asturiano occidental de dos zonas montanyosas). Bi ha una aldeya en lo concello d'Ayer dita Ḷḷavayos, un lugar en lo concello de Grau dito Lavayos y una Sierra de Llavayos en Parres. En Figueruela de Abajo (Zamora) bi ha dos microtoponimos con la parola lavayo.
Tamién por la suya importancia en la ocupación y explotación de lo territorio cerca d'ells bi ha chacimientos arqueolochicos u muestras d'arte rupestre, y por ixo bi ha nombres de puestos arqueolochicos con las parolas lavajo, navajo u navazo en castellano (en zonas d'influencia de l'aragonés a sobén navajo). Un eixemplo en ye Prado del Navazo.