Quercus humilis
De Biquipedia
| Caxico | ||||||||||||||||
|---|---|---|---|---|---|---|---|---|---|---|---|---|---|---|---|---|
 fuellas de Quercus humilis |
||||||||||||||||
| Clasificazión zentifica | ||||||||||||||||
|
||||||||||||||||
| Nomenclatura binomial | ||||||||||||||||
| Quercus humilis Mill. |
Quercus humilis ye una espezie de caxico con carauteristicas intermeyas entre os caxicos marzeszents e os caxicos comuns e tien muita fazilidat pa ibridar con diferents espezies de caxicos. Cheobotanicament ye una espezie con submediterrania carauteristica.
Ye un arbol que por un regular tien una altaria de 10-15 m, encara que puede plegar dica os 20 e 25 m e a begatas no pasa de 5. A corona ye irregular, ubierta e poco tupida, dixa beyer as brancas retuertas e protechitas por una crosta acrebazata e de color pardo-zenisa.
As rametas e as fuellas naxen pubeszents. As fuellas son bariables en testura, forma, lobulazión e grau de pubeszenzia cuan son desembolicatas de tot. Ban dende coriazias a membranazias, e o contorno ba dende obovato dica cuasi eliptico, e ye frecuent una asimetría en a base. Bi ha zinco a güeito pars de nierbos secundarios e atros tantos lolubos laterals, que pueden no ser egual de largura. O tomento con o que crexen se puet perder cuasi de tot en o faz, pero en o embés se mantién encara prou denso. As fuellas tienen de meya entre 5-12 cm de largura, 3-6 d'amplaria e o peziolo, glabreszent en a maturez ba dende 5 a 12 mm.
[editar] Distribuzión e abitat
A distribuzión bordeya a zona norte de l'aria de clima mediterranio dende Anatolia dica os Perinés, ocupando a més zonas de Corzega. Zerdeña, Sezilia e bellas islas d’a Mar Echeya. Por o norte plega dica o Europa Zentral, on tiende a restrinchir-se a las solanas, tenendo a suya distribuzión os enclaus més septentrionals en Polonia e Alemaña.
En España Quercus humilis e as formas ibridas que se suposa que en deriban (Quercus cerrioides) ocupan prenzipalment o exe Perinenco, tenendo a muga ozidental en a cuenca alta de l'Ebro, por exemplo en o redol de Bitoria, (pero l’aria compacta tien o cabo en Nabarra), y a muga meridional en forma de tres enclaus en as Sierra de Prades, Cardó e Puertos de Bezeit, (luent d'un aria compacta que tien o cabo en o Montseny).
Se puet trobar en altarias dende o ran d'a mar dica os cuasi 1900 m d'altaria, pero en os cabos d'este rango no forma selbas propias, e fa parte de selbas dominatas por atros arbols. L'altaria topografica més tipica d'os caxicars de Q.humilis son os 400-1500, y eszepzionalment os 1700.
Prezisa de 600 mm añals e bien repartitos tota l'añata, fuera d'a isoyeta d'os 140 mm en berano no forma selbas. Mientres que en Zentroeuropa ocupa solanas, en a Peninsula Iberica ocupa pacos e zonas alteras, compensando macroclimas més secos.
Puede aguantar chelatas e calors estibals moderatas. A lo sur d'os Perineus bibe en zonas con temperaturas meyas en chinero dica –3 ºC e 22 ºC en agosto.
Ocupa gran bariedat de suelos pero prefiere os suelos neutros e basicos, que predominan en l’aria iberica d’a suya distribuzión, con sostratos de calsinera, salagón e almendrón. Ni requiere suelos profundos ni con guaire capazidat de retenzión d’augua, e puet crexer dica en suelos on aflora o sostrato rocoso.
[editar] Formazions de Quercus humilis
Bels autors suposan que una selba matura d’este caxico no yera una masa zerrata e densa, e serían formazions claras on a luz podese entrar bien e lo argumentan basando-sen en que a corona ye poco tupida e a la desichenzia de luz que tien pa crexer. D’os cuatre caxicos marzeszents ye o que rechita dende a zueca con mayor fuerza e lo que tien un desembolique estolonifero menos acusato. Bels autors matizan que a l’ombre li ha intresato este aclarato pa espleitar pasturas a la sombra d’os caxicos.
Os caxicars de Quercus humilis son una clara transizión entre as selbas caduzifolias e as selbas mediterranias. En os estrato arborio e arbustibo predominan as espezies caduzifolias, pero a diferenzia d’as selbas caduzifolias o matical ye bien desembolicato, lo que lo fa parexito a las selbas mediterranias. O estrato erbazio ye bien desembolicato, lo que lo fa parexito a las selbas caduzifolias, encara que no bi ha terofitos.
O estrato arborio en condizions poco alteratas tien una altaria de 10-15 m, e una cobertura entre o 70 e 100%. As espezies que acompañan més a sobent a Quercus humilis en diferents clases de caxicars son Sorbus torminalis, a zerollera Sorbus domestica, Sorbus aria, os azirons Acer opalus, Acer campestre, Acer monspessulanum, os tilers Tilia platyphyllos e os latoners Celtis australis. A presenzia de fayos u Quercus petrea ye en os ecotons, en o primer caso con en o ecotón con o fayar con buxo. Os perenifolios més comuns son as carrascas, o taxo, o pin nasarro, e sobre tot o pin royo. Estos dos pins pueden sostituir-lo en puestos con clima més continental u seco u cuan l’ombre degrada o caxicar con a espleitazión forestal.
O estrato arbustibo ye un matical contino que se desembolica bien por a poca densidat d’as coronas d’os arbols. A cobertura orizontal plega a lo 70-100 % encara sigan més lumerosas as espezies caduzifolias, en Europa Ozidental l’acompañant més cutiano d’o Quercus humilis ye un perennifolio, o buxo. De feito Braun-Blanquet describió O caxicar de Quercus humilis con buxo como asoziazión fitosoziolochica en o mazizo de Cévennes e sirbió pa clasificar-ie as selbas de Quercus humilis d'Europa ozidental. As atras espezies acompañant més comuns son a senera, os artos Crataegus monogyna e Crataegus laevigata, l’arañón Prunus spinosa, Viburnum lantana, Lonicera xylosteum, Ligustrum vulgare, l'avellanera Corylus avellana, Cornus sanguinea, Coronilla emerus e diferents galabarderas Rosa pimpinellifolia, Rosa arvensis, etc...
O estrato erbazio cubre entre o 40% y o 70 % d’a superfizie e no bi ha que espezies perens, de fueras d’a presenzia de bel cheranio borde de cabo a cuan. Espezies que son posibles de trobar son: Helleborus foetidus, Primula veris columnae, Hepatica nobilis, Fragaria vesca, Stachys officinales, Euphorbia amigdaloides, Galium vernum, Polygala calcarea, Pulmonaria longifolia, Hieracium murorum, Potentilla montana, Ranunculus nemorosus, Arum maculatum, Epipactis helleborine, Brachypodium phoenicoides, Brachyopodium sylvaticum, Poa nemoralis e Bromus erectus.
Entre as plantas tipo tuca trobamos a yedra, a rubia, a nueza negra, Lonicera etrusca, Lonicera periclymenum e Clematis vitalba.
