Limo

Restas de limo en un coche dimpués d'una inundación

O limo ye un sedimento con particlas, de mida entre l'arena y l'archila, con un diametro entre 0,002 mm y 0,06 mm. Ye un sedimento clastico incoderent que lo trasportan en suspensión os ríos y l'aire.

En a Val de l'Ebro os limos son un sedimento tipico d'as vals con fondón plan y s'ha interpretato que ye d'orichen eolico, encara que no ye seguro.

En bells ríos como o Nilo, o limo sedimentaba en as riberas dimpués d'as inundacions anyals y yeran un terreno fertil pa l'agricultura, dica que ixo ha deixato de desvenir-se por la construcción de presas que retienen sedimentos en os entibos.

Por no tener cohesión, ye un terreno problematico pa edificar. En obras d'arquitectura u incheniería cal fer sistemas especials de cimentación.

Etimolochía

A parola "limo" provién d'o latín LIMUS con egual significato. A parola "limo" se documenta en aragonés meyeval en o "Libro d'el Trasoro":

Ang(u)ila es de ljmo de tierra por esto contece q(ue) qua(n)do mas la strenye(n) mas fuye o se slenga

encara es ot(r)a prueua q(u)ando la agua es cozida e(n) vn chico vaxello de coure q(ue) ella no faga arena nj ljmo

La anima del omne no es pas omne; mas su cuerpo, que fue feyto del limo de la tierra, solament es omne si anima habita enel

et la bondat dela augua puedes bie(n) ap(er)cebir si ella nasçe de planos e de maluados stanyos o de sofre o de cobite e q(ue) su color sia luzie(n)t e su sabor dolç e b(ue)na olor e q(ue) ella no aya nj(n)gu(n) ljmo dent(r)o

Mas yo digo quel om(n)e trobo p(er)don por tal como la febledat del peccar vino enel dep(ar)t del cue(r)po quj es ljmo e de tierra hu(n)jda

Tamién en romanz navarro en un inventario de biens d'a Ilesia de Santa María de Sangüesa:

Del limo dela tierra de que Adam nuestro padre fue formado

En aragonés actual u parlas altoaragonesas no bi ha informacions sobre a denominación d'este sedimento, manimenos l'uso d'a parola ha sobrevivito en o Baixo Aragón pa dicir a l'alga d'augua dulza Cladophora por o menos en Torrociella d'Alcanyiz y Castelserás.