Ribera

De Biquipedia
Ir ta: navego, busca
Iste articlo tracta sobre a ribera d'os ríos. Ta atros usos de «ribera» se veiga Ribera (desambigación).
A ribera de l'Ebro en a Riocha.

A ribera (d'o latín <RIPARIA) ye l'aria de terrenos plans y accesibles que se troba en os arredols d'un río, que pueden ser ocupaus por selvas de ribera u sotos, gleras u, por contra, trobar-se mayoritariament aprofitaus ta l'agricultura. Puet ocupar totalment u parcial a plana aluvial d'o río.

En Aragón, a sobén se fa extensivo o termin ribera ta referir-se a las poblacions que i ha en o corso d'o rio, y como extensión d'iste uso, fa parte de a toponimia oficial en o nombre de qualques comarcas en as que a presencia d'un río ye principal, historicament y cheografica, en as relacions d'entre os lugars que as forman.

En textos meyevals de a zona occidental d'Aragón (as comunidatz aragonesas y a Ribera Alta de l'Ebro) se troba tamién l'uso d'a parola bega (d'o vasco <ibaiko, d'«ibai», río) como parola romance:

et est illa peza in illa bega de Magalon

Ista parola fa parte d'un lexico común en as luengas ibero-romances occidentals, y s'escribe «vega» en castellano y asturleyonés.

Usos[editar | editar código]

Dende o punto d'envista de l'agricultura, as riberas son zonas muit fértils por l'acumulación de sedimentos que s'ha dau historicament y encara se da. Son tamién zonas en as que a instalación de reganos ye más fácil, pus resulta economico construir-ie un rete de zeiquias y regallos que permitan quitar l'augua d'o propio río ta abastecer os cautivos. Isto augmenta considerablement a productividat de os terrens de ribera, o que lieva aparellau un incremento en o numero d'asentamientos humanos a lo largo d'a historia, y de a población que cada asentamiento gosa tener.

Como resultau de tot isto, as riberas suelen estar as zonas más densament pobladas. Isto lieva bells riesgos asociaus, pus como os terrenos a on que s'instala as ditas poblacions son a sobén inundables, l'impacto d'as creixidas d'o río en a población humana puet estar directo. Tradicionalment iste riesgo se neutralizaba de forma parcial en instalando os lugars en puestos altos, como os pueyos, que además permitiban a millor defensa y a posibilidat que se cosirase a ribera dende o nuclio habitau. Manimenos, en o sieglo XX y sieglo XXI, muitos lugars han deixau de contemplar ista mesura de prevención en a edificación, y s'ha dedicau a tierra más baixa a usos que no son purament agropecuarios, tot permitindo-se a extensión de cascos urbans en o cul de a ribera, sobre terrenos potencialment inundables a malas que i haiga una riguada.

Imáchens[editar | editar código]

Se veiga tamién[editar | editar código]