Hematites
| Hematites | ||
|---|---|---|
 |
||
|
|
||
| Categoría: | oxidos (minerals) | |
| Clase: | 04.CB.05 | |
| Formula quimica: | Fe2O3 | |
|
|
||
| Color: | roya u grisa metalica | |
| Raya: | roya ciresa | |
| Lustre: | metalico | |
| Transparencia: | opaco | |
| Sistema cristalín: | romboedrico | |
| Dureza: | 5,5 - 6,5 | |
| Densidat: | 4,9 - 5,3 | |
O hematites u olichisto ye un mineral con formula Fe2O3, d'o grupo d'os oxidos y que cristaliza en o sistema romboedrico. A suya dureza ye entre 5,5 y 6,5 a suya color varía dende roya a grisa metalica pero a color d'a suya raya ye roya ciresa. Ye un mineral mena d'o fierro.
Presenta una important influencia cromatica en os materials cheolochicos tanto a escala de roca como de mineral. As rocas sedimentarias detriticas tendrán colors royas encara que a cantidat d'hematites siga baixa. Una piedra d'arena será ya roya por o menos con un 1% de hematites,[1] podendo denominar-se "rodeno". As archilas prenen una color roya tamién por a presencia d'hematites, y se puet veyer en determinatos horizonts B de bells suelos, y en materials sedimentarios d'empleno de cuenca, como en as archilas royas que dan color a Alfambra en arabe. Bells minerals incoloros pueden prener colors royas por a presencia d'Hematites, como se desvién en as variants d'o quarz como o chacinto de Compostela, que presenta impurezas d'archilas royas (por a presencia d'hematites).
Chacimientos[editar]
En o Sistema Iberico bi ha muitos chacimientos d'hematites. O chacimiento de fierro més important d'Aragón ye en Uellos Negros, espleitato dende tiempos d'os celtibers, dió nombre a tota Sierra Menera. Atros chacimientos de menor volumen se troban atros chacimientos importants son en Checa, en Oriuela, en Bezas (Val de Dornac), en Nogueras y Bronchals (Sierra Alata, a man d'a Penya d'el Cervero y o Cerro de Santa Barbara), en a redolada d'o Moncayo, (por eixemplo en o Barranco de Menera), en Anyón, en Tierga, en Trasobars, en Mesons d'Isuela, en Epila (Santuario de Rodanas), en Lo Fraixno, en Codos (Peña Acerillo), en Ferrera de los Navarros y en muitos atros puestos.
En os Pireneus bi ha chacimientos d'hematites en Barleto y Bielsa, en a Val de Chistau (Plans de Lavet), en l'Aneto, en Panticosa y en atros puntos. O fierro provinient d'o chacimiento d'a Val de Bielsa ye mencionato en textos comercials d'Albalat d'a Cinca y Monzón d'o sieglo XV como ferre de Belsa.[2]
En a Depresión de l'Ebro podemos trobar ruellos de glera u cantals d'hematites en os ríos u as faixas fluvials d'os ríos principals, provinients d'os chacimientos pirenencos u d'o Sistema Iberico, pero a hematites da una color royenca més u menos intensa a las archilas, limos y sallagons de tota esta antiga cuenca sedimentaria.
D'esta traza o hematites ye un minerals que influye en a toponimia aragonesa en a creyación de toponimos tanto por a influencia menera (Ferrera de los Navarros, Sierra Menera), como por a color que da a o terreno (Alfambra, Rubiuelos, Rubials, Rodenas, ecetra...).
Referencias[editar]
- ↑ Francisco Anguita Virella, Origen e historia de la Tierra. Editorial Rueda, 1998, pp425
- ↑ J Angel Sesma, Ángeles Líbano Léxico comercial en Aragón (Siglo XV) Institución Fernando el Católico, 1982
Bibliografía[editar]
- Olaf Medenbach, Cornelia Sussieck-Fornefeld "Minerales" Guías de la naturaleza Blume. 1990.
- Josefina Besteiro, Miguel Calvo, Andrés Pocoví, Emilia Sevillano, Minerales de Aragón. Mira Editores S.A, 1988.
