Roca sedimentaria
De Biquipedia
As rocas sedimentarias son rocas que se forman por l'acumulazión de sedimentos que, sozmesos a prozesos fesicos e químicos (diachenesis), esdebienen materials de consistenzia més dura.
Se forman en cuencas sedimentarias, que pueden estar continentals u marinas. Tienen una disposizión en capas u estratos, que en luengache popular las claman faxas porque bistas en una lenera parixen faxas paralelas de materials rocosos.
Cubren més d'o 75 % d'a superfizie terrestre, formando una cobertura sedimentaria sobre una base formata por rocas margaticas e, en menor mida, metamorficas. Sin d'embargo lo suyo bolumen total ye chicot cuan se comparan sobre tot con as rocas magmaticas.
As rocas sedimentarias se carauterizan por dos rasgos esenziales:
- Presentan una estrutura estratificata, con capas produzitas por lo carauter progresibo pero tamién discontino d'o prozeso de sedimentazión. Ixas capas se claman estratos.
- Contienen a sobent fósils, e a begatas son formatas por acumulazión de fosils.
A més as rocas sedimentarias gosan estar més permiables, sobre tot as detriticas, lo que faborexe a zirculazión e acumulazión d'augua sotorrana e atros fluitos como os idrocarburos.
Pueden clasificar-sen por lur chenesis en:
- Rocas detriticas, formatas por acumulazión de trozos d'atras rocas que s'han erosionato e han depositato por grabedat. As rocas detriticas se clasifican por la mida d'os trozos de roca, e de mayor a menor son almendróns, piedras d'arena, limolitas e archilitas.
- Rocas organochenas, formatas con restos de sers bibos. As més abundants s'han formato a partir de partes duras mineralizatas, sin d'embargo belatras s'han formato a partir de partes organicas e son las rocas organicas como o carbón u o petrolio.
- Rocas quimicas u rocas de precipitazión quimica, formatas por deposito de sustanzias que enantes yeran disueltas. Un exemplo en son as ebaporitas u rocas formatas por sals acumulatas por sobresaturazión de l'augua d'a mar.
