Francisco Ascaso
| Francisco Ascaso | |
|---|---|
 |
|
| Información personal | |
| Calendata de naixencia: | 1 d'abril de 1901 |
| Puesto de naixencia: |  Almudévar (Plana de Uesca) |
| Calendata de muerte: | 20 de chulio de 1936 |
| Puesto de muerte: |  Barcelona (Catalunya) |
| Ocupación: | Activista politico y sendical |
Francisco Ascaso Abadía (Almudévar (Plana de Uesca), 1 d'abril de 1901 - Barcelona (Catalunya), 20 de chulio de 1936) estió un anarquista aragonés melitant d'a CNT, primo de Joaquín Ascaso y conoixito por o suya actividat politica y sendical chunto con Durruti.
[editar] Biografía
Naixe d'una familia de treballadors d'o campo d'o lugar d'Almudévar (Plana de Uesca), que dimpués será en Zaragoza, en o vico d'a Madalena. En ista ciudat prene contacto con a CNT y empecipia a suya actividat embrecando-se en as luitas socials.
En 1920 estió engarcholato en o Palacio de Villahermosa d'a carrera Predicadores (Pedricadors) de Zaragoza, allora garchola.
En 1922 ye en Barcelona en o grupo "Los Solidarios" (Os Solidarios), grupo creyato ta fer accions contra os pistoleros d'a patronal que asesinaban sendicalistas, y a on i son Durruti, Ricardo Sanz, Antonio Ortiz, Gregorio Jover y García Oliver, entre atros.
En 1923 ye acusato d'a muerte d'o cardenal Juan Soldevila (asesinato en Zaragoza o 4 de chunio) y engarcholato nuevament en a garchola d'a carrera Predicadores. Eslampa y s'exilia ta Francia, chunto con Durruti y García Oliver. D'aquí irá t'America con Durruti, participando en quantas accions con anarquistas archentins. Dimpués tornarán ta Francia, a on i serán aturatos y acusatos en chunio de 1926 d'atentar contra o rei d'Espanya, Alifonso XIII, que lugo vesitará París. No trobando pruebas d'ixa acusación, son forachitatos d'o país.
En 1931, con l'arribada d'a Segunda Republica, torna ta Espanya, creyando o grupo "Nosotros" (Nusatros) y participando en quantas insurreccions.
En 1932 ye forachitato y levato t'Africa.
En 1934 ye nombrato secretaire cheneral d'o Comité Rechional d'a CNT de Catalunya.
O 18 de chulio de 1936, quan empecipia a guerra civil, Francisco Ascaso se troba en Barcelona dirichindo os melitants d'a CNT. Muere dos días dimpués, o 20 de chulio, en a enrestida t'o quartel d'as Atarazanas, d'un disparo en a frent.
[editar] Veyer tamién
[editar] Vinclos externos
- (es) Francisco Ascaso en l'Ateneo virtual de A las barricadas.org
- (es) Francisco Ascaso en nodo50.org
- (es) Biografías de Ferrer i Guardia, Durruti y Francisco Ascaso en Red libertaria.net
- (ca) Francisco Ascaso en Enciclopèdia.cat
- (es) Francisco Ascaso en a Gran Enciclopedia Aragonesa
- (es) A biografía de Francisco Ascaso en un foro sobre a guerra civil espanyola
- (es) Biografía de Francisco Ascaso en una pachina sobre as Brigadas Internacionals
- (es) Biografías de Francisco Ascaso y Carlo Giuliani en Rojo y negro.info
