Anarquismo

De Biquipedia
Ir ta: navego, busca
Articlo d'os 1000
A bandera negra ye tradicionalment uno d'os simbolos anarquistas.

L'Anarquismo ye o termin chenerico que se da a las teorías y movimientos estremos que gritan ta a oposición y abolición de toda autoridat, hierarquía y forma de control social per considerar-las indeseyables, innecesarias y nocibles. A parola "anarquía" deriva d'o prefixo griego a αν (an) "no", y d'a radiz d'o verbo a αρχω (arkho), "gubernar".

L'autoridat refusata per os anarquistas incluye a de mena politica (o Estato), economica (o capitalismo), relichiosa (a Ilesia), cultural (o patriarcato) u qualsiquier forma d'explotación u d'opresión. D'a mesma forma, os anarquistas pretenden abolir tota mena de lei u tractato imposativo asinas como os suyos prencipals instrumentos, a coacción y a violencia, ta conseguir rematar con as quantas menas de dominación d'o ser humán per os suyos concheners.

A intención ye de desembolicar y consiguir l'anarquía, que reconoixe a plena libertat y autonomía d'os individuos, devantando sociedatz alazetatas en os pactos libres, a libre asociación, a horizontalidat, a iniciativa y o emparo mutuo. Existen quantos metodos proposatos per as diversas escuelas y tendencias que fan parte d'o movimiento anarquista t'a consecución d'istos fins, perén a traviés de meyos consonants con ells como son os conceptos d'a autochestión u l'acción dreita.

Con movimientos precursors dende l'antigüidat, l'anarquismo se desembolica finalment en o sieglo XIX, a traviés de diferents escuelas, amanexindo bellas d'as esperiencias libertarias más significativas mientres o sieglo XX, esdevenindo dende allora un movimiento de contino en conexión con muitos temas contemporanios. Asinas y frent d'a hechemonía d'a globalización neo-liberal y d'a cayita d'os estatos socialistas, l'anarquismo se presenta en o sieglo XXI como una alternativa socialista libertaria t'a existencia y o repunte politico y cultural y t'a revolución social.

Radizes filosoficas de l'anarquismo[editar | editar código]

Os libertarios han esplanicato que realment as ideyas anarquistas han estato dende perén presents en a humanidat, mesmo han dito que a cooperación y l'aduya mutua entre os individuos yeran qualidatz conaturals a la naturaleza humana, d'astí que a vegatas se mencione a expresión "anarquismo moderno" ta nombrar a las teorías que se desembolican en o sieglo XIX.

As radizes filosoficas de l'anarquismo moderno se documentan en o Renaiximiento y en a Ilustración. En o Renaiximiento se desembolican os alazetz d'o pensamiento critico, antimás d'amanixer l'humanismo con caracteristicas como l'antropocentrismo frent d'o teocentrismo d'a epoca anterior, o pacifismo y l'optimismo. Con a Ilustración, plegoron os conceptos de racionalismo, ideyalismo y individualismo, asinas como a busca d'un sistema social y politico alazetato en as ideyas de libertat, igualdat y fraternidat.

Anticipando o desembolique de l'anarquismo en atros campos que superan l'ideyolochico, y como respuesta a l'excesivo racionalismo y t'a mesma Ilustración, amanixió o Romanticismo en zaguerías d'o sieglo XVIII enfocando-se a subversión cultural y o retorno a la creatividat como facultat primordial d'o ser humán que lo leva a destruir totas as demás cadenas. O desembolique d'o socialismo utopico y l'ambito filosofico d'os primers teoricos anarquistas modernos ye influenciato per os romanticos.

Historia de l'anarquismo[editar | editar código]

O primer emplego conoixito d'a parabra "anarquía" apareixe en a obra Os siet contra Tebas (467 aC) d'Esquilo. Os anabaptistas d'o sieglo XVI en Europa son a vegatas consideratos como los precursors de l'anarquismo moderno. Un atro que ye considerato como precursor de l'anarquismo moderno ye Gerrard Winstanley, qui publicó un panfleto a on preconizaba a propiedat vecinal y social u en favor d'una organización economica organizata basando-se en as chicotas comunidatz agricolas d'o sieglo XVII. Os socialistas utopicos, asinas como bellas formas radicalizatas d'o liberalismo tamién han estato consideratos precursors de l'anarquismo moderno.

En 1793, William Godwin publicó "Una pregunta respective d'a chusticia politica", una obra en a que presentaba a suya visión d'una sociedat libre amás d'una cretica d'o gubierno. Belluns consideran iste texto como o primer tractato anarquista, decindo que Godwin ye o establidor de l'anarquismo filosofico. Pierre-Joseph Proudhon estió o primer individuo en denominar-se a sí mesmo un "anarquista". Proudhon esfendeba una economía de mercato a on os individuos fesen l'intercambeo d'o producto d'o suyo treballo. O valor d'intercambeo d'as mercaderías adintro d'iste sistema economico sería determinato por a cantidat de treballo que s'hese invertito en a suya producción.

Alto u baixo a meyatos d'o sieglo XIX os principios anarquistas s'estendilloron per Europa de forma significativa, prevocando rs primeras grans descusions en a Primera Internacional entre Karl Marx y Mikhail Bakunin, precipiando asinas o distanciamiento entre anarquistas y marxistas. Con a important emigración que bi heba en ixas envueltas enta os países americans, l'anarquismo s'estendilló tamién per ixe continent. En Europa o mutualismo ubrió camín enta l'anarquismo colectivista y iste mas tardi a l'anarcosendicalismo. Allora s'empecipioron a veyer descusions entre anarquistas colectivistas y comunistas libertarios. L'anarcosendicalismo fue dimpués influito per o sendicalismo revolucionario.

En Estatos Unitos s'estendilló l'anarquismo individualista con Josiah Warren, Benjamin Tucker u Henry Davíd Thoreau, anque en zaguerías de sieglo con a inmigración europea l'anarcosendicalismo tamién tenió importancia, como contrimuestra a vada cheneral per a chornada laboral de ueito horas d'1 de mayo de 1886 que levó tres días más tardi a la Revuelta de Haymarket, en una escalada de celebracions que dió orichen a l'actual celebración de l'1 de mayo como Día Internacional d'os Treballadors.

O sieglo XX conoixió bellas revolucions anarquistas como a mexicana, a ucrainesa u a espanyola. En ista zaguera, se dió en Aragón una d'as más importants experiencias libertarias de totz os tiempos quan se facioron milenta colectividatz que fuoron suprimitas dimpués per l'acción d'as autoridatz republicanas espanyolas.

En as zagueras anyadas d'o sieglo XX y primeras d'o sieglo XXI, a sublevación zapatista (1994), a batalla de Seattle (1999), a expansión d'o movimiento d'"okupacions" y d'o movimiento de ecoaldeyas mas que mas per Europa y Estatos Unitos, o emplego d'o software libre y o desembolique d'o conoiximiento libre, l'archentinazo (2001-2002) con as suyas asambleyas de vico, piquets y ocupacions de fabricas, o conflicto con o mayestros d'Oaxaca con as asambleyas populars y o movimiento estudiantil autonomo chileno (totz dos en 2006), son consideratos como fenomens en os que as influencias libertarias han estau y son presents.

Escuelas d'o pensamiento anarquista[editar | editar código]

Entre l'anarquismo utilitarista de William Godwin, o mutualismo de Pierre-Joseph Proudhon, o egoísmo etico de Max Stirner, o colectivismo de Mikhail Bakunin, o individualismo radical de Benjamin Tucker, o comunismo libertario de Piotr Kropotkin u l'anarquismo voluntarista de Errico Malatesta, as escuelas d'o pensamiento anarquista en a filosofía politica y economica son variatas; son d'alcuerdo en o prencipal pero con quantos puntos d'anvista diferents d'o que una sociedat sin gubierno habría d'estar.

Concepcions d'una sociedat anarquista[editar | editar código]

Antiparte, os anarquistas han teorizato cómo se podría levar l'administración cutiana en un rechimen d'autogubierno. S'han exposato quantas menas d'organización, dende a visión sendicalista dica a visión d'as asociacions vecinals. Istos modelos administrativos, belluns más alazetatos en una organización formal y institucionalización y atros fendo un mayor enfasi en o espontaneinismo, gosan mezclar conceptos como l'autorganización, l'autonomía, l'asambleya, a democracia dreita y a decisión per consenso.

D'a mesma forma, se han proposato quantos modelos economicos, mas que mas alazetatos en a chicota propiedat y/u en a propiedat cooperativa, tenendo l'autochestión como principio. Son pensatos ta enamplar a soberanía d'os individuos y reducir a dependencia d'unos respective d'atros u en tot caso desembolicar una interdependencia satisfactoria entre ells, ta que cada un pueda levar una vida plena.

Fenomén cultural[editar | editar código]

O lingüista Noam Chomsky.

L'anarquismo se troba en a cultura popular en muitas expresions, entre ellas ye con facilidat reconoixible a que ye representata per presonas famosas u tamién por grupos musicals que publicament s'han identificato como anarquistas. Anque bells anarquistas refusan de parar cuenta en tals individuos famosos per estar prou elitistas, as siguients feguras son eixemplos prominents d'autoconsideratos anarquistas: