Club Deportivo Ebro
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
| C. D. Ebro | |||||||||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|
 | |||||||||||||||||||||||||||
| Datos | |||||||||||||||||||||||||||
| Nombre oficial | Club Deportivo Ebro | ||||||||||||||||||||||||||
| Embotada(s) | Arlequinaus | ||||||||||||||||||||||||||
| Establito | 1942 | ||||||||||||||||||||||||||
| Reestablito | 1961 | ||||||||||||||||||||||||||
| President |  Jesús Navarro
| ||||||||||||||||||||||||||
| Dir. esportivo |  Pepe Cuevas
| ||||||||||||||||||||||||||
| Entrenador |  Manolo Sanlúcar
| ||||||||||||||||||||||||||
| Instalacions | |||||||||||||||||||||||||||
| Nombre | Pedro Sancho | ||||||||||||||||||||||||||
| Localidat | Zaragoza | ||||||||||||||||||||||||||
| Aforo | 1.000 espectadors | ||||||||||||||||||||||||||
| Devantad. | 9 de setiembre de 1990 | ||||||||||||||||||||||||||
| Zaguera temporada | |||||||||||||||||||||||||||
| Liga | Segunda RFEF (Grupo III) | ||||||||||||||||||||||||||
| 2021-22 | 9eno | ||||||||||||||||||||||||||
| Equipacions | |||||||||||||||||||||||||||
| |||||||||||||||||||||||||||
| Pachina oficial d'o club | |||||||||||||||||||||||||||
O Club Deportivo Ebro ye un club de fútbol aragonés, d'o barrio zaragozano de L'Almozara. Fue establito en 1942 y actualment chuga en a Segunda Federación (Grupo III).
Historia
[editar | modificar o codigo]Os primers anyos
[editar | modificar o codigo]En l'anyo 1942, en mel meyo d'os anyos de posguerra, una colla de vecins d'o barrio zaragozano de l'Almozara encabezaus por o sinyor Calavia fundarán o Club Deportivo Ebro. L'Almozara, conoixida ta par d'alavez popularment como La Quimica por estar o puesto a on se trobaban diferents industrias quimicas d'a ciudat, yera un barrio humilde y obrero, caracteristicas que definirian a o nuevo club y serían un d'os suyos sinyals d'identidat. En istos primers anyos l'Ebro feba servir ya a suya tipica chambreta arlequinada azula y blanca con pantalons y calzas de color negra. A suya seu social se trobaba en Paseyo d'Echegaray y Caballero nº 1, en l'antigo Bar Ebro, chunto a l'actual Plaza d'Europa y muit amán d'o río que le da nombre, l'Ebro. L'equipo prencipia a competir ixa mesma temporada 1942-43, estando president Ismael Calavia Murillo -fundador d'o club- en Tercera Rechional, a zaguera categoría organizada por a Federación Aragonesa de Fútbol, rematando en seisena posición y puyando ta Segunda Rechional debiu a la reestructuración d'as categorías ixe anyo.
En as siguients temporadas chugará en ista nueva categoría en un grupo formau prencipalment por equipos d'a ciudat de Zaragoza y beluno de l'aria metropolitana y d'a capital uescana. Rematará en una sobrebuena tercera posición en a edición de 1943-44 ta conseguir en 1944-45 o subcampionato d'a categoría por dezaga nomás d'o C.D. Lasalle. Por no tener un campo de chuego propio o CD Ebro habió de chugar istos primers anyos en o campo de Sant Antonio, anexo a o Campo de Torrero, estadio d'o Zaragoza C.F. y situau en o barrio d'o mesmo nombre. A temporada 1945-46 rematará en ueitena posición y en 1946-47 seteno, ganando amás iste anyo o Campionato d'Aragón d'Aficionaus y clasificando-se asinas ta chugar o Campionato d'Espanya. L'anyo 1947-48 torna a conseguir a tercera posición en liga por dezaga de C.D. Celta y C.D. Eléctricas Reunidas, puyando asinas a Primera Rechional. Será ista 1948-49 manimenos a suya zaguera temporada en competicions oficials, ya que en 1949 dimpués d'o suyo zaguer partiu en Ayerbe o club se retira d'a competición y desapareixe.
A refundación
[editar | modificar o codigo]Doce anyos dimpués, en a temporada 1961-62, prencipia a segunda etapa d'o club zaragozano. Un d'aficionaus a o fútbol residents en o barrio encabezaus por antigos y futuros directivos d'o CD Ebro como Victoriano Herrando, Santiago Sediles, Paulino Larena, José Cester, José Gallén y Armando Guerra tornan a refundar o club que prencipiará chugando en categorías rechionals. Important ye mas que mas l'aduya de Domingo Vela, ex-portero d'o Real Zaragoza C.D. en a temporada 1953-54 que fació d'entrenador. A seu se troba por ixas envueltas en o Bar Ebro situau en a carrera d'o mesmo nombre. Entre atros torneyos l'Ebro ferá parti d'a Copa Primavera u a Copa Pepsi-Cola, chugando a mas cuantos partius amistosos. A cifra de socios puyará en os siguients anyos dica os doscientos en 1964, por o que en chinero de 1965 se redactarán os estatutos d'o club con l'obchectivo de constituyir una chunta directiva y dar-se d'alta en a Federación Aragonesa.
O president yera Victoriano Herrando, o tresorero Fernando Gómez y o secretaire Armando Guerra, estando vocals Vicente Sopesens, Paulino Larena, Santiago Sediles, Domingo Vela, José Gallén, Blas González y Miguel Asso. Dau que no teneban campo propio habrán de chugar os suyos partius en o Campo d'os Escolapios, a on chugarán a Copa Primavera de 1965 y ganarán a Copa Pepsi-Cola. Manimenos os problemas asociaus a las chicotas dimensions d'o colechio ta inscribir-se en a Federación Aragonesa, fan que o CD Ebro haiga de tresladar os suyos partius como locals a o campo tierra de Sant Gregorio, situau en o norte d'a ciudat. A temporada 1965-66 prencipia con o cambeo a o nuevo president Joaquín Moncín Anglada por Victoriano Herrando y chugando en Segunda Rechional categoría en a que rematarán en cuatreno puesto.
A siguient temporada 1966-67 o president Julio Hernández del Río chestiona a creyación d'un equipo filial chovenil, formau por a fusión con o Club Hesperia y que competirá con o nombre de Ebro-Hesperia en o Campionato de Chovenils. Atra vegada tornan a tresladar-se os partius como local enta o Campo de Delicias, propiedat d'o Club de Fútbol Renfe que ta par d'alavez chugaba en Tercera División, situau chunto a la gara de Delicias.
En a resta d'a decada de 1960 o CD Ebro continará chugando en Segunda Regional, sin trobar un campo propio que le permitise puyar enta a Primera Rechinal. En istos zaguers anyos o suyo president estió José Francisco Gavín Mené.
Pelegrinache por as categorías rechinals
[editar | modificar o codigo]En a decada de 1970 se chugo en diferents campos federativos como Sant Gregorio (Cascallo), Picarral u Miralbueno. Andrés Velilla y José Martínez estioron presidents en istas primeras epocas. En rematar a temporada 1972-73 tornó a baixar-se a Tercera Rechional con Domingo Vela Navarro. En l'anyo 1974 con a reestructuración de categorías d'a Federación Aragonesa a Segunda Rechional pasa a decir-se Segunda Rechional Preferent y a Tercera Regional cambea de nombre a Segunda Rechional. Ya en 1975 prene o mando d'a presidencia José María Sánchez y en 1979 o ex-chugador d'a entidat José Luís Bailera Martínez. A seu social d'o club se treslada dende o Bar Ebro enta o Bar Dalmau y l'equipo remata a temporada 1979-80 en segunda posición por dezaga d'o C. D. Movera puyando asinas a Primera Rechional.
Puyada a Tercera División
[editar | modificar o codigo]
Ya en a decada de 1980 o president José Luis Bailera prencipia a modernización o club, tresladando a celebración d'os partius enta o Campo d'Escolapios (en l'actual Pabillón de L'Almozara) y mirando d'embrecar asinas, con l'aduya de nuevos directivos como Jacinto Bailo y José Mª Díez, a os vecins d'o barrio en l'equipo. Dura poco tiempo o debut d'o club en Primera Rechional, tornando a la fin d'a temporada 1980-81 a Segunda Rechional en rematar decinueno.
Dimpués de rematar seiseno a temporada 1981-82 y doceno a temporada 1982-83 ye en iste zaguer anyo, con Manuel Bayo Monterde como president, cuan una colla de vecins d'o barrio de l'Almozara como Miguel Bernal, Fernando Bermejo, José L. Rived, Romeo, Roy, Abadía, Martínez, Cañete, Cebollada, Iturriaga, Mainar, Friestas, Viñas, Rubio u Herrando entre atros s'unirán a l'equipo, formando-se amás categorías inferiors de chovenils, infantils y alevins que serán os inicios d'o futuro Club Deportivo Ebro. L'equipo arlequinau contina chugando en Segunda Rechional, rematando seteno en a temporada 1983-84 y ueiteno en a 1984-85, puyando en os siguients anyos consecutivament a Primera Rechional y dimpués a Rechional Preferent. Con Benito Ansón como president se rematará a temporada 1988-89 en ueitena posición y se ganará o campionato de liga en a campanya 1989-90, puyando asinas a la fin a Tercera División.
A la fin un estadio propio
[editar | modificar o codigo]En prencipiar a suya primera temporada en a maxima categoría d'o fútbol nacional, o club prencipia a chestionar con o Concello de Zaragoza a creyación d'un estadio en uns terrenos d'a carrera Sierra de Barrior situaus chunto a o río Ebro y que será baltizau con o nombre de Campo d'El Carmen y enguerau o 9 de setiembre de 1990 en un partiu oficial de Liga con victoria d'os locals debant de l'A.D. Sabiñánigo. O campo, encara de tierra, ye o primero en a historia d'o club que ye d'a suya titularidat. En ista primera temporada 1990-91 en a categoría l'equipo arlequinau rematará en docena posición, quedando dimpués deceno en a campanya 1991-92 y nueno en a temporada 1992-93, tornando a baixar enta Rechional Preferent dimpués de rematar decinueno en a temporada 1993-94.
Asinas, dimpués de rematar cuatreno en a temporada 1994-95, se consigue o segundo puesto en a 1995-96 dezaga d'o Club Atlético Monzón, chugando a promoción ta puyar a Tercera División debant d'a S.D. Tarazona; y puyando dimpués d'un 2-1 en casa y una victoria por 1-2 en a localidat turiasonense.
En a suya tornada a la primera división aragonesa, os arlequinaus rematarán a temporada 1996-97 en deciueitena posición baixando atra vegada a Rechinal Preferent. Igual que a zaguera vegada dimpués de dos temporadas en a categoría quedando setenos en a edición de 1997-98 y segundos en 1998-99 a un punto nomás d'o lider, o C.D. San Gregorio Arrabal, torna a puyar-se automaticament a Tercera división. En ista zaguera temporada 1999-00 se rematará en quincena posición a pocos puntos d'o descenso con Jesús Navarro en a presidencia y Enrique Oviedo en o banquiello.
Confirmación en Tercera División
[editar | modificar o codigo]
En a temporada 2000-01 se remata en docena posición con Julio López como entrenador, encara que en a siguient campanya 2001-02 a plegada de Juan Carlos Arribas como nuevo tecnico fa que o club de l'Almozara remate l'anyo como cuatreno clasificau, chugando asinas a liga de promoción a Segunda B que rematará en zaguera posición dezaga de Peña Sport F.C., S.D. Lemona y C.D. Tropezón.
China-chana manimenos o club s'afianza en a Tercera división, quedando por un regular en as posicions de metat de tabla sin guaires opcions de puyar, pero tamién con a tranquilidat de veyer dende luent os puestos de descenso. En a siguient temporada 2002-03 rematará onceno con Pedro Antonio Moreno como entrenador y en 2003-04 será doceno con o mesmo técnico, rematando catorceno en 2004-05. Dimpués de rematar onceno succesivament en os anyos 2005-06 y 2006-07, baixa a la fin en a temporada 2007-08 a Rechional preferent dimpués de rematar deciseteno, zarrando asinas un ciclo de nueu temporadas chugando de contino en a Tercera división.
Pasará dos anyadas chugando en Rechinal preferent, rematando cuatreno en 2008-09 y campión d'o grupo I en a edición de 2009-10, tornando asinas atra vegada a l'anyo venient a la primera categoría d'o fútbol nacional.
O suenio d'a Segunda B
[editar | modificar o codigo]Prencipia a decada de 2010 con Jesús Navarro como president y con a renovación d'o Campo d'El Carmen en l'anyo 2010 instalando-se cespede artificial. L'obchetivo ta os siguients anyos ye prencipiar estabilizando-se en a Tercera división ta mirar de puyar enta a Segunda división B, convertindo-se asinas l'Ebro en o segundo club en importancia d'a ciudat dimpués d'o Real Zaragoza. D'a man de Juan Carlos Ruiz de Lazcano como secretaire tecnico prencipia a reorganizar-se o club, rematando en trecena posición en a temporada 2010-11, doceno en 2011-12 y a la fin tercero en 2012-13 por dezaga de C.D. Sariñena y Andorra C.F., chugando asinas a promoción ta puyar a Segunda B, estando eliminaus en cuatrenos de final por a S.D. Compostela con un resultau de 4-0 en a capital gallega y empaz 2-2 en casa.
Ta par d'alavez l'equipo chovenil prencipia a obtener muit buenos resultaus, dando asinas a cantera buenos chugadors ta o futuro d'o primer equipo. En a temporada 2013-14 se remata en trecena posición, por o que se ferán nuevas incorporacions ta amillorar en a siguient campanya. Asinas ye como en 2014-15, dimpués de luitar toda a temporada contra o C.D. Teruel, l'Ebro se proclama campión d'o Grupo XVII de Tercera división por primera vegada en a suya historia. Con Rodríguez Loreto como entrenador se chugara a eliminatoria de campions de tercera contra o C.D. Varea, primer clasificau d'o Grupo XVI riojano, ganando por 1-0 en El Carmen y empatando en Logronyo y puyando asinas a Segunda B.
Estadio
[editar | modificar o codigo]
Chuga en Campo Municipal de Fútbol L'Almozara-El Carmen de Zaragoza, situato en o barrio de L'Almozara, chunto a o río Ebro.
En a suya historia o Club Deportivo Ebro ha chugau tamién en atros campos d'a ciudat de Zaragoza:
- Campo de Sant Antonio (1942-1949).
- Campo d'os Escolapios (1961-1965).
- Campo de Sant Gregorio (1965-1966).
- Campo de Delicias (1966-1970).
- Campo de Picarral (1970-1976).
- Campo de Miralbueno (1976-1980).
- Campo d'os Escolapios (1980-1990).
- Campo Municipal de Fútbol L'Almozara-El Carmen (1990-actualidat).
Equipación
[editar | modificar o codigo]- Primera equipación: Camiseta azul y blanca arlequinada, pantalons azuls y calzas azuls.
- Segunda equipación: Camiseta verda, pantalons verdes y calzas verdas.
Evolución de l'uniforme
[editar | modificar o codigo]
|
|
|
|
|
|
|
| ||||||||||||||||||||||||||||||||||||||||||||||||||||||||||||||||||||||||||||||||||||||||||||||||
Escudo
[editar | modificar o codigo]O escudo ha evolucionau dende a fundación d'o club dica l'actualidat, encara que s'han conservau os elementos prencipals. O primer escudo d'o Club Deportivo Ebro en l'anyo 1942 yera un escudo de forma suiza dividido en cuatre cuartels en cruz, o primero y tercero d'archent y o segundo y cuatreno d'azur, con as divisions entre cuartels y o canto d'o escudo d'oro. En o segundo cuartel se trobaba, centrada, una pilota de fútbol d'archent. Sobre o tot una banda d'archent con a leyenda C.D.Ebro de sable.
En 1965, ya dimpués d'a refundación d'o club, i apareixen as primeras modificacions. O canto d'o escudo ye d'archent, fusionau con a banda que agora ye nomás sobre os dos cuartels superiors. A leyenda con o nombre d'o club ye d'azur y a pilota d'o segundo cuartel ye descentrada enta a ezquierda. Ta rematar as dos modificacions mas important, en punta mantelau s'incluyen tres franchas d'azur sobre fundo d'archent y as colors d'os cuartels s'invierten, trobando-se agora o primer y tercer cuartels d'azur y o segundo y cuatreno d'archent.
As modificacions posteriors serán menors. En 1982 desapareixe o borde d'o escudo y a pilota d'o segundo cuartel torna a trobar-se centrada. En 2001 os cantos d'a banda con o nombre d'o club son d'archent. O zaguer cambeo dica l'actualidat ye en 2014, cuan se moderniza o escudo, achustando a suya amplaria y deixando nomás dos barras d'archent entre as barras d'azur d'a punta que amás son mas gordas (antis mas bi'n heba cinco). A pilota d'o segundo cuartel se'n torna d'azur. Tamién en iste anyo se fa una versión simplificada d'o escudo ta fer-la servir como logo corporativo. As diferencias mas importants entre o escudo y o logo son que en iste zaguero o tono d'azul ye mas claro que no en o escudo oficial, a pilota ye substituyida por un punto azul y a banda con o nombre d'o club ye centrada sobre tot o escudo y no nomás sobre os dos cuartels superiors.
-
1942 -
1965 -
1982 -
2001 -
2014 -
Logo corporativo
Chugadors
[editar | modificar o codigo]- Categoría prencipal: Futbolistas d'o CD Ebro
Anyadas
[editar | modificar o codigo].jpg)
|
|
- Anyadas en Segunda Federación[1]: 2.
- Anyadas en Segunda División B: 6.
- Anyadas en Tercera División: 19.
Records d'o club
[editar | modificar o codigo]- Millor posición en a liga (en Segunda División B): 6eno (temporada 2017/18).
- Pior posición en a liga (en Segunda División B): 12eno (temporada 2016/17).
Títols
[editar | modificar o codigo]Títols nacionals
[editar | modificar o codigo]- Campión d'a Tercera División (1): 2014/15 (Grupo XVII).
Títols rechionals
[editar | modificar o codigo]- Zaguers títols rechionals
- Campión d'a Rechional Preferent (1): 2009/10 (Grupo I).
- Subcampión d'a Rechional Preferent (2): 1995/96 (Grupo II), 1998/99 (Grupo I).
Refencias
[editar | modificar o codigo]- ↑ Incluyindo l'antiga denominación de Segunda División RFEF
Vinclos externos
[editar | modificar o codigo]- Oficials
- (es) Pachina web d'o CD Ebro
- (es) Facebook d'o CD Ebro
- (es) Twitter d'o CD Ebro
- Altros
_pictogram.svg){kind=small}
| Control d'autoridaz |
|
|---|
Datos: Q3573032