Bison bonasus

De Biquipedia
Ir ta: navego, busca
Bison bonasus
Wisent.jpg
Bison bonasus en a selva de Białowieża.
Estato de conservación
Status iucn3.1 EN es.svg
Clasificación scientifica
Dominio: Eukaryota
Reino: Animalia
Filo: Chordata
Clase: Mammalia
Orden: Artiodactyla
Familia: Bovidae
Subfamilia: Bovinae
Chenero: Bison
Especie: B.bonasus
Nomenclatura binominal
Bison bonasus
Linné, 1758

O bisont europeu (Bison bonasus (L., 1758)) ye a especie europea de bisont. Plegó a estinchir-se en estato salvache pero a partir d'exemplars en catividat que proveniban de Polonia y o Caucas lo reintroducioron primero en o Parque Nacional de Białowieża (Polonia) y dimpués en bells parques nacionals d'Europa centro-oriental.

S'interpreta que nunca no ha estato present en o cabo occidental d'o continent europeu[1] y que arribó en Europa en o Würm IV dende Norteamerica,[1] (ye muit pareixito a Bison bison). Os primers bisonts europeus modernos ocupaban medios ubiertos, por eixemplo en Dinamarca os primers modernos amanixen en o Dryas primerenco y Preboreal (enta 9950 anyos BP) en una tundra con selvetas que quan se zarroron pa cutio facioron que desapareixesen os bisonts. As citas de Chulio César en Alemanya y Belchica y Fortunatus en a Galia son dudosas (podrían referir-se en realidat a Bos primigenius, pero sindembargo parlan de grans rabanyos en migración, como fan actualment os bisonts americans.

O bisont europeu desapareixió de Suiza en o sieglo VIII, de Francia enta o sieglo X, de Rumanía en 1762,[1] d'os países balticos en 1755,[1] d'Alemanya en 1893,[1] en 1919-1921 de Polonia (selva d'a Białowieża),[1] y en 1919-1925 d'o Caucaso.[1]

O 25 d'agosto de 1923 fue fundata a Sociedat Internacional pa a Preservación d'o Bisont, y gracias a la suya labor estió posible a reintroducción d'a especie en o medio natural. A seu d'esta sociedat estió en realidat o Zoo de Francfurt, on trayoron exemplars de zoolochicos y coleccions privatas sin distinción de subespecies, y tamién d'a reserva de Schorfheide (á lo nor-noreste de Berlín), agafatos en 1934 gracias a o intrés que despertó en Hermann Göring, que yera chefe d'as organizacions nacionals alemanas de caza. En ixe inte o numero de bisonts yera por o menos de 56. En l'anyo 2004 nomás en Polonia bi heba més de 600 exemplars. [2]

En l'anyo 2004 se publicó en os meyos de comunicación que o rei d'Espanya Juan Carlos I mató un bisont en o refuchio de Czerwony Dwor en Polonia, estando prohibita a caza d'o bisont, pagando a cantidat de 7.000 euros. [3]

Zoonimia[editar | editar código]

Bison bonasus in ZOO Praha

En a "la Flor de las Ystorias d'Orient" parlan de Bufles en l'aria d'a Mar Caspia y o Caucas, podrían estar tanto o Bison bonasus como Bubalus bubalis:

las aguas de aq(ue)lla mar son dulçes et hay grant habundancia de bue(n)os pexes et en aquella encontrada se troban bufles saluages et otras bestias assaz en aquella mar ha yslas do fan sus nidos muchos auzelles et...

Ye dudoso si parlan de bisons en o Libro d'el Trasoro u si se refieren a los uros:

ot(r)os ya buy(e)s saluages en alamanya q(ue) han gra(n)t cue(r)po e son b(ue)nos para carga e pora vino trahe(r) .

En a "Cronica de los Conquiridors" escriben bisont y en plural bisontes u bisontos:

Et de alli auant fue clamada (^aq(ue)lla) aq(ue)lla montanya el mont del Rey el qual mont se crian los bisontes que son fieras delas quales pa(n)nonia abu(n)da Et segu(n) dize solino en(e)l libro delas cosas memorables distincion .xxij. que los bisontos an los cuellos et los crines a manera de seda son orribles et mas fieros que toros et son muyt ligeros et si son presos nu(n)ca se puede(n) amansar / Et dize paulo diacono quel Reconocio vn a(n)ciano hombre digno de fe que el auia visto vn tal cuero de bisont q(u)i fue muerto en aq(ue)l mont q(ue) quinze hombres estando el vno cerca el otro iazie(n)do sende podrien cobrir

Se veiga tamién[editar | editar código]

Referencias[editar | editar código]

  1. 1,0 1,1 1,2 1,3 1,4 1,5 1,6 (es) ARRIBAS, Óscar. Fauna y paisaje en los Pirineos en la Era Glaciar. Lynx Ediciones. ISBN 978-84-87334-71-9
  2. (es) El Rey mató al "rey de la pradera".
  3. (es) El Rey mató al "rey de la pradera".

Vinclos externos[editar | editar código]